Міжнародны фестываль мастацтваў "Славянскі базар у Віцебску" | Беларуская культура | Belarus.by | Пра Беларусь | Belarus.by | Афіцыйны сайт Рэспублікі Беларусь
У Беларусь без візы на 30 дзён
Афіцыйны сайт Рэспублікі Беларусь
Выбары Прэзідэнта Рэспублікі Беларусь 9 жніўня 2020 года
Пра Беларусь

Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Пра Беларусь | Культура | Міжнародны фестываль мастацтваў "Славянскі базар у Віцебску"

Міжнародны фестываль мастацтваў "Славянскі базар у Віцебску"

Лагатып XXIX Міжнароднага фестывалю мастацтваў "Славянскі базар у Віцебску" (2020)
Лагатып XXIX Міжнароднага фестывалю мастацтваў "Славянскі базар у Віцебску" (2020)

Міжнародны фестываль мастацтваў "Славянскі базар у Віцебску" з'яўляецца візітнай карткай Рэспублікі Беларусь. На працягу многіх гадоў музычны форум садзейнічае развіццю дыялогу культур паміж рознымі народамі і краінамі.

Гісторыя Фестывалю

18 ліпеня 1992 года ў Віцебску прайшоў першы фестываль мастацтваў. Ля вытокаў фестывалю стаяла тры дзяржавы Беларусь, Расія і Украіна. Мэтай краін-арганізатараў было азнаёміць віцяблян і гасцей горада з песеннай творчасцю славянскіх народаў.

У 1993 годзе фестываль "Славянскі базар" стаў членам Міжнароднай федэрацыі арганізатараў фестываляў (FIDOF). У тым жа годзе пашырылася і геаграфія ўдзельнікаў: на флагштоку фестывалю ўпершыню з'явіліся сцягі Славакіі, Кыргызстана, Літвы, Турцыі, Балгарыі, Югаславіі.

З 1995 года фестываль праводзіцца пад асабістым патранатам Прэзідэнта Рэспублікі Беларусь Аляксандра Лукашэнкі. З таго ж года "Славянскі базар" стаў называцца "Міжнародным фестывалем мастацтваў".

У 1996 годзе фестываль упершыню трансліраваўся па сістэме спадарожнікавага тэлебачання, што зрабіла прагляд свята мастацтваў даступным жыхарам усёй планеты.

У 2009 годзе адбылося адкрыццё Алеі лаўрэатаў, удастоеных спецыяльнай узнагароды Прэзідэнта Рэспублікі Беларусь "Праз мастацтва да міру і ўзаемаразумення".

У 2011 годзе прайшоў юбілейны XX Міжнародны фестываль мастацтваў "Славянскі базар у Віцебску". За 20 гадоў у горадзе Віцебску пабывалі больш за 55 тысяч удзельнікаў з 68 краін свету. На галоўнай сцэне "Славянскага базару ў Віцебску"  у Летнім Амфітэатры   адбылося 316 канцэртаў, якія наведалі каля трох мільёнаў гледачоў.

Галоўнай інтрыгай фестывалю на працягу ўсяго часу яго існавання з'яўляецца міжнародны конкурс выканаўцаў эстраднай песні "Віцебск". Таксама ў рамках фестывалю праходзяць міжнародны дзіцячы музычны конкурс, кіна- і тэатральныя праграмы.

Фестываль немагчыма ўявіць без вернісажу пад адкрытым небам, дзе выстаўляюцца выдатныя працы сучасных мастакоў, без горада майстроў, у якім прадстаўлены народныя промыслы. На фестывалі традыцыйна праходзяць Дзень Саюзнай дзяржавы, гала-канцэрты майстроў культуры Беларусі, Расіі, Украіны, праграмы "Фестываль без межаў", "Тэатральныя сустрэчы", "Зорны час".

Плошча зорак "Славянскага базару"

Кожны год на легендарнай сцэне фестывалю ў Летнім амфітэатры ўручаецца заснаваная ў 2005 г. Прэзідэнтам Беларусі спецыяльная ўзнагарода "Праз мастацтва – да міру і ўзаемаразумення". Яе лаўрэатамі могуць стаць "дзеячы культуры і мастацтва, творчыя калектывы, арганізацыі, якія ўнеслі значны ўклад ва ўмацаванне міжнароднага культурнага супрацоўніцтва, прапаганду дасягненняў і ўзораў сусветнай мастацкай культуры, заснаваных на гуманістычных ідэалах і каштоўнасцях".

Па традыцыі імя новага ўладальніка ўзнагароды арганізатары трымаюць у сакрэце да дня адкрыцця фестывалю. І, як правіла, віншуе лаўрэата асабіста Прэзідэнт Беларусі.

Сімвал узнагароды – пазалочаная статуэтка дзяўчыны-музы, якая ў выцягнутых руках трымае вянок з валошак, а за яе спінай развяваецца накідка – знак творчага натхнення. Фігура дзяўчыны лунае, дакранаючыся адной нагой да паўсферы, што ўвасабляе зямны шар, які апяразвае стужка з надпісам "Праз мастацтва – да міру і ўзаемаразумення".

У 2009 годзе на ніжняй тэрасе Летняга амфітэатра з'явілася Алея зорак, якая пазней ператварылася ў Плошчу зорак. Тут лаўрэаты спецыяльнай узнагароды атрымліваюць права адкрыць імянны знак: у Віцебску гэта сімвал фестывалю – кветка валошкі – з імем уладальніка і годам уручэння.

Уладальнікамі ганаровай фестывальнай узнагароды і імянной валошкі на Плошчы зорак сталі:

Ці ведаеце вы, што...

У 2000 годзе фестываль устанавіў рэкорд, сабраўшы на сцэне прадстаўнікоў абсалютна ўсіх славянскіх народаў, якія жывуць на зямлі.

Фестываль двойчы прызнаваўся FIDOF "Лепшым фестывалем года" ў 2000 і 2004 гадах. У 2005 у Віцебску адбылася Асамблея гэтай міжнароднай федэрацыі, што стала прызнаннем высокага ўзроўню правядзення "Славянскага базару ў Віцебску".

На "Славянскі базар" – без візы

У 2019 годзе ў замежных гасцей форуму ўпершыню з'явілася магчымасць прыехаць на "Славянскі базар" без візы – пропускам на граніцы стаў білет на фестываль. Згодна з распараджэннем, падпісаным кіраўніком дзяржавы, грамадзяне дзясяткаў краін маглі ўехаць ва ўсіх пунктах пропуску праз Дзяржаўную граніцу Рэспублікі Беларусь. Плануецца, што і ў будучым фестывальны Віцебск зможа прымаць паклоннікаў форуму ў спрошчаным парадку.

Бязвізавы ўезд у 2020 годзе даступны з 6 па 25 ліпеня (АДНАК! прыехаць неабходна не пазней за дату, пазначаную ў білеце на канцэрт).

Каб наведаць "Славянскі базар" без візы, пры сабе неабходна мець:

  • дзеючы дакумент для выезду за граніцу (пашпарт), тэрмін дзеяння якога павінен перавышаць дату запланаванага выезду  Республікі Беларусь не меней чым на 90 суак. У выпадку прыезду на "Славянскі базар у Віцебску" білет на мерапрыемства фестывалю з'яўляецца заменай візы для грамадзян краін, з якімі Рэспубліка Беларусь мае візавы рэжым;
  • білет на фестываль (набываць білеты на мерапрыемствы форуму мастацтваў  неабходна ў афіцыйных аператараў – партнёраў фестывалю);
  • страхавы поліс (медыцынскае страхаванне, дзеючае ў Беларусі, на суму не менш як 10 тысяч еўра;
  • грошы (не менш як Br54, або каля 20 €, на кожны дзень знаходжання).

"Славянскі базар у Віцебску"-2019

У 2019 годзе Віцебск прымаў Міжнародны фестываль мастацтваў "Славянскі базар" з 8 па 17 ліпеня.

Урачыстая цырымонія і гала-канцэрт адкрыцця стартавалі ў Летнім амфітэатры 11 ліпеня. Афіцыйнае закрыццё адбылося 15 ліпеня, але, вядома, фестывальны марафон у Віцебску прадоўжыўся больш: дадатковыя мерапрыемствы прайшлі 8-10 і 16-17 ліпеня.

Асноўнымі падзеямі фестывалю сталі XVII Міжнародны дзіцячы музычны конкурс "Віцебск-2019" і XXVIII Міжнародны конкурс выканаўцаў эстраднай песні "Віцебск-2019". Права прадставіць Беларусь на конкурсах дасталася пераможцам нацыянальнага адбору – Ксеніі Галецкай і Івану Зданюку. Цікава, што ў бягучым годзе не праводзіўся паўфінал дарослага конкурсу: стаўка была зроблена на нацыянальныя адборы, якія прайшлі ў больш як у 20 краінах.

На дзіцячым конкурсе сімпатыі журы і гледачоў заваявала юная выканаўца з Беларусі: Ксеніі Галецкай дасталіся званне пераможцы музычнага спаборніцтва і спецыяльны прыз "Ліра". Першая прэмія прысуджана Анжэле Алберцян з Арменіі. Другую ўзнагароду журы падзяліла паміж украінцам Артурам і Анастасіяй Барбэ з Малдовы. Трэцяй прэміяй адзначаны Аннушка з Грузіі і расіянка Кіра Гагаладзэ.

Уладальнікам Гран-пры дарослага конкурсу стаў Адзільхан Макін з Казахстана – па выніках двух спаборніцкіх дзён ён лідзіраваў з вялікім адрывам ад іншых удзельнікаў. Лаўрэат першай прэміі – грузін Георгій Путкарадзэ, а другую ўзнагароду падзялілі спявачка Ілай з Ізраіля і прадстаўнік нашай краіны Іван Зданюк.

Па традыцыі на сцэне Летняга амфітэатра выступілі "зорныя" госці. Сярод іх – народная артыстка Грузіі Тамара Гвердцытэлі, якая ўзначальвала міжнароднае журы конкурсу "Віцебск-2019", спецыяльная госця фінальнага гала-канцэрта Сафія Ратару, а таксама рок-групы "Кіпелаў", "Сурганава і Аркестр", Аляксандр Панаётаў, Стас Міхайлаў, Валерый Лявонцьеў, Надзея Кадышава і ансамбль "Залатое кальцо". Маладзёжную публіку ў Віцебску сабраў канцэрт HIT NON STOP з удзелам MONATIK, Аліны Артц, Maruv, Вольгі Бузавай, ALEKSEEV і Serebro.

У рамках "Славянскага базару"-2019 у Дзень дружбы традыцыйна прайшоў канцэрт "Саюзная дзяржава запрашае". Галоўнымі тэмамі мерапрыемства сталі 20-годдзе "Саюзнай дзяржавы" і 50-гадовы юбілей знакамітага беларускага ансамбля "Песняры". Віншаванні ад Пятра Ялфімава, Анатоля Кашапарава, этна-трыа "Троіца", NaviBand, Варвары, групы "Сапрана Турэцкага" прагучалі з галоўнай віцебскай сцэны ў гэты дзень.

На іншых пляцоўках – у канцэртных залах і на вуліцах горада – таксама прайшлі любімыя публікай праекты. Сярод іх – "Тэатральныя сустрэчы", фэст вулічнага мастацтва "На сямі вятрах", лялечны квартал, вечары ў Віцебскай абласной філармоніі... Адбыліся на форуме і новыя мерапрыемствы: фестывальны Віцебск упершыню прыняў Dream Dance Fest – міжнародны танцавальны батл. А плошча Перамогі на час "Славянскага базару" ператварылася ў арт-прастору, дзе прайшоў грандыёзны опэн-эйр з удзелам беларускіх груп NaviBand, "Без Білета", "J:Морс". Яшчэ адной навінкай стала лядовае шоу ад прафесійнага класічнага балета на лёдзе з Санкт-Пецярбурга.

"Славянскі базар у Віцебску"-2020

XXIX Міжнародны фестываль мастацтваў "Славянскі базар у Віцебску" пройдзе з 16 па 19 ліпеня ў абноўленым фармаце і можа стаць адным з самых маштабных open air Еўропы. Як адзначаюць арганізатары, у гэтым годзе пляцоўкай фестывалю стане тэрыторыя цэлага горада: усе мерапрыемствы праграмы будуць працаваць толькі на вуліцы на вялікіх адкрытых пляцоўках.

Па-ранейшаму галоўная сцэна фестывалю – Летні амфітэатр. На ёй адбудзецца 7 самых маштабных мерапрыемстваў "Славянскага базару". Гэта адкрыццё, закрыццё, конкурс маладых выканаўцаў, які ў гэтым годзе пройдзе ў крыху іншым прачытанні (на яго заяўлены прадстаўнікі 18 краін). Гледачоў чакае і традыцыйны "Дзень Саюзнай дзяржавы", запланаваны ў цікавай творчай форме, калі на сцэне Летняга амфітэатра будуць прадэманстраваны лепшыя кінашлягеры розных гадоў. Таксама ў праграме – грандыёзны канцэрт "Залаты хіт", праект "Шансон ТБ – усе зоркі" і вялікі рок-вечар. Што датычыцца сольных канцэртаў, то ў 2020-м яны адменены: запатрабаваныя ў публікі артысты будуць максімальна задзейнічаны ў зборных праграмах.

Новая фестывальная пляцоўка з'явіцца ля канцэртнай залы "Віцебск". Гэта будзе сучасная сцэна са святлодыёднымі экранамі, сцэнаграфічнымі канструкцыямі, партэрам для гледачоў. Галоўнае мерапрыемства тут – дзіцячы музычны конкурс, у якім прымуць удзел прадстаўнікі 21 краіны.

Віцебская плошча Перамогі – дарэчы, самая вялікая ў Беларусі – у фестывальныя дні зноў будзе цэнтрам мерапрыемстваў для моладзі.

Яшчэ адной новай лакацыяй стане пляцоўка загараднага парку "Мазурына", на тэрыторыі якога пройдзе вялікі фестываль аўтагуку.

Папулярны праект у рамках "Славянскага базару" – фэст вулічнага мастацтва "На сямі вятрах" – таксама шырока выйдзе на вуліцы горада з канцэртамі і перформансамі. Цэнтрам прыцягнення стане Пушкінская плошча.

Філарманічны  дворык будзе аддадзены класічным відам мастацтва. Там жа прадставіць праграму лялечных спектакляў тэатр "Лялька".

"Славянскі базар у Віцебску" пройдзе з 16 па 20 ліпеня

"Зорны час" у прысутнасці фанатаў і "Букет дабра": як змяніўся "Славянскі базар"

Помнікі Вялікай Айчыннай вайны ў Беларусі
Партызанскі летапіс