Падзеі, факты, анонсы

Сцяг "Славянскага базару", Плошча зорак і начны опэн-эйр. Чым здзівіў фестываль 2016 года ў Віцебску?

5 ліпеня, Віцебск /Кар. БЕЛТА/. Да XXXV Міжнароднага фестывалю мастацтваў "Славянскі базар у Віцебску" засталося 11 дзён. БЕЛТА прапануе акунуцца ў рэтраспектыву: штодзённа ў архіўных матэрыялах расказваем пра самыя яркія моманты кожнага фестывалю па гадах. Сёння - пра фестываль 2016 года.

XXV Міжнародны фестываль мастацтваў "Славянскі базар у Віцебску" прайшоў з 14 па 18 ліпеня 2016 года. Дадатковыя мерапрыемствы адбыліся 12-13 і 19-20 ліпеня. Форум прыняў гасцей з 45 краін свету. Галоўнымі яго тэмамі сталі Год культуры, 71-я гадавіна Перамогі ў Вялікай Айчыннай вайне і, вядома, 25-годдзе самога фестывалю. 

У аснову афармлення музычнай падзеі лёг сіні колер - сімвал творчасці, адзінства і сяброўства, а лагатып фестывалю - васілёк - упрыгожылі люстраныя крышталі, бліскучыя шары з беларускім арнаментам і сцягамі краін, прадстаўнікі якіх удзельнічалі ў фестывалі.

Юбілейны фестываль заклаў новую традыцыю - на пляцоўцы каля Летняга амфітэатра побач са сцягамі краін-удзельніц паднялі сцяг "Славянскага базару". У 2016 годзе Алея лаўрэатаў спецыяльнай узнагароды Прэзідэнта Беларусі "Праз мастацтва - да міру і ўзаемаразумення" пашырылася да Плошчы зорак.

У дзень адкрыцця фестывалю ўпершыню адбылося святочнае шэсце. Больш за 500 чалавек сабраліся з розных куткоў Віцебскай вобласці: удзельнікі духавых і ваенных аркестраў, ансамбляў і танцавальных калектываў, барабаншчыкі і інш. Святочная калона прайшла па маршруце: плошча Перамогі - вуліца Леніна - плошча Свабоды - Плошча зорак.

Гала-канцэрт урачыстага адкрыцця стаў прызнаннем у любові да горада, артыстаў, арганізатараў і гледачоў. Адкрываючы фестываль, Аляксандр Лукашэнка сказаў: "Наш фестываль - равеснік суверэннай Беларусі. Ён рабіў першыя крокі ў год здабыцця Беларуссю незалежнасці. Ён развіваецца разам з краінай, і ў ім, як у люстэрку, адлюстроўваецца кожны этап станаўлення маладой дзяржавы. Прыемна, што цяперашні юбілейны форум стаў цэнтральнай падзеяй аб'яўленага ў Беларусі Года культуры".

На цырымоніі адкрыцця па традыцыі кіраўнік дзяржавы ўручыў спецыяльную ўзнагароду "Праз мастацтва - да міру і ўзаемаразумення" дырыжору Міхаілу Фінбергу і Нацыянальнаму акадэмічнаму канцэртнаму аркестру Беларусі.

Заслужаныя ўзнагароды атрымалі майстры мастацтваў, якія ўнеслі вялікі асабісты ўклад у станаўленне і развіццё фестывалю. Ордэн Францыска Скарыны Прэзідэнт уручыў спецыяльнаму карэспандэнту аддзела рэдактараў галоўнай дырэкцыі падрыхтоўкі тэлепраграм генеральнага прадзюсарскага цэнтра Нацыянальнай дзяржаўнай тэлерадыёкампаніі, заслужанай артыстцы Рэспублікі Беларусь, пастаяннай вядучай канцэртаў фестывалю "Славянскі базар у Віцебску" Алене Спірыдовіч.

На адкрыцці форуму мастацтваў пераможцы міжнароднага конкурсу выканаўцаў эстраднай песні "Віцебск" розных гадоў уручылі Аляксандру Лукашэнку памятны знак "Славянскі базар у Віцебску - 25".

Спецыяльным праектам, падрыхтаваным да 25-годдзя "Славянскага базару", стала канцэртная праграма "25 імгненняў лета", дзе выступілі ўладальнікі Гран-пры і лаўрэаты Міжнароднага конкурсу выканаўцаў эстраднай песні "Віцебск" розных гадоў у суправаджэнні Нацыянальнага акадэмічнага канцэртнага аркестра.

Шэраг фестывальных праектаў быў прысвечаны 75-годдзю з дня нараджэння заснавальніка і шматгадовага кіраўніка ансамбля "Песняры" народнага артыста Савецкага Саюза, народнага артыста Беларусі Уладзіміра Мулявіна. Нацыянальны акадэмічны народны аркестр Беларусі імя І. Жыновіча прадставіў рок-оперу "Песня пра долю", напісаную Уладзімірам Мулявіным паводле паэмы Янкі Купалы "Адвечная песня" ў сярэдзіне 1970-х і адноўленую на аснове аматарскага запісу.

У XXV Міжнародным конкурсе выканаўцаў эстраднай песні "Віцебск-2016" свае вакальныя магчымасці ўпершыню прадэманстравалі артысты з Аргенціны і Калумбіі. Журы ўзначаліў народны артыст Расіі Валерый Лявонцьеў. Конкурс праходзіў у тры этапы: у паўфінале ўдзельнікі выконвалі нацыянальны хіт, у фінале - славянскі хіт у суправаджэнні Нацыянальнага акадэмічнага канцэртнага аркестра Беларусі і фестывальны хіт у суправаджэнні фанаграмы "-1". Гран-пры заваяваў прадстаўнік Беларусі Аляксей Грос.

У XIV Міжнародным дзіцячым музычным конкурсе "Віцебск-2016" прыняло ўдзел 21 дзіця з 21 краіны, прычым гэта былі толькі дзяўчынкі. Журы ўзначаліў мастацкі кіраўнік і галоўны дырыжор Прэзідэнцкага аркестра Рэспублікі Беларусь Віктар Бабарыкін. Галоўная ўзнагарода дасталася выканаўцы з Расіі - Настассі Гладзілінай.

На сцэне Летняга амфітэатра прайшлі музычныя праграмы "Саюзная дзяржава запрашае", "Віцебск збірае сяброў", "Залаты хіт", сольныя канцэрты, у тым ліку арт-групы "Хор Турэцкага", якая ў 2016 годзе адзначыла 25-годдзе творчай дзейнасці.

Праект "Фестываль без межаў" прапанаваў праграмы класічных жанраў у выкананні артыстаў і калектываў з розных краін. Гледачоў пазнаёмілі з культурнай палітрай краін - удзельніц мерапрыемства - Кітая, Чэхіі, Ізраіля і іншых.

У 2016 годзе ў фестывальным Віцебску зноў прайшоў фэст вулічнага мастацтва "На сямі вятрах". Яго навінкай сталі вулічныя танцы і лялечныя спектаклі. У цэнтры горада можна было наведаць сем імправізаваных пляцовак.

У Мастацкім музеі Віцебска ў час фестывалю было арганізавана 7 выставачных праектаў. На фестываль з Пскова прывезлі дзве карціны Марка Шагала, а з Мінска - унікальны сярэбраны "пояс Вітаўта" і работы Івана Хруцкага, якія выстаўляліся ў Луўры. Таксама адбыліся выставы работ мастакоў Сербіі, Славакіі, Кітая, а віцебскія мастакі Таццяна і Юрый Рудэнка прэзентавалі свой новы праект "Анёлы над Віцебскам".

У ноч пасля закрыцця юбілейнага форуму ў культурна-спартыўным комплексе Летняга амфітэатра прайшоў першы опэн-эйр у рамках фестывалю - "VItebsk dance night".

"Горад майстроў" атрымае прапіску на вуліцах Талстога, Пушкіна і плошчы Свабоды. У яго рамках адбыліся спаборніцтвы ў мастацтве пляцення з лазы і свята-конкурс традыцыйнага касцюма "Сцяжкі майстэрства". На базе культурна-гістарычнага комплексу "Залатое кольца горада Віцебска "Дзвіна" прайшла выстава-кірмаш "Задзвінскі кірмаш", якая прадставіла ва ўсім багацці традыцыйныя віды рамёстваў, вырабы дэкаратыўна-прыкладной творчасці і многае іншае.

Асноўныя мерапрыемствы XXXV Міжнароднага фестывалю мастацтваў "Славянскі базар у Віцебску" пройдуць з 16 па 19 ліпеня, а першыя канцэрты адбудуцца ўжо 14 ліпеня.