Каляндар падзей у Беларусі

 КАСТРЫЧНІК 2025

Прэм'ера фільма "Чорны замак" па матывах рамана Уладзіміра Караткевіча

"Чорны замак" – гэта сучасная экранізацыя гістарычнага дэтэктыўнага рамана Уладзіміра Караткевіча "Чорны замак Альшанскі". Пры гэтым з моманту яго першай экранізацыі мінула ўжо 40 гадоў: у 1984-м на экранах прэзентавалі аднайменны фільм кінарэжысёра Міхаіла Пташука, зняты ў жанры гістарычнага дэтэктыва. На гэты раз за пераасэнсаванне рамана ўзяліся сцэнарыст Глеб Шпрыгаў і рэжысёр Кірыл Кузін. Яшчэ да афіцыйнай прэм'еры ў Мінску фільм "Чорны замак" быў удастоены спецпрыза журы конкурсу ігравых фільмаў і спецпрыза Выканкама СНД "Кіно без меж" на ММКФ "Лістапад-2024". Згодна з сюжэтам гістарычнай драмы, малады прафесар Антон Косміч (Яўген Шварц) аказваецца ў бядзе пасля таго, як старадаўняе Евангелле, якое належала роду Альшанскіх, трапляе ў яго антыкварны магазін. Каб выратаваць сябе і разгадаць тайны мінулага, ён адпраўляецца ў Альшаны... У экранізацыі аднаго з самых вядомых твораў беларускай літаратуры прынялі ўдзел Настасся Красоўская, Яўген Стычкін, Яўген Шварц і Віталь Кішчанка.

Калі: 12 снежня 2024 – 2 снежня 2025
Дзе: кінатэатры гарадоў Беларусі

Выстава "Кожная роля – галоўная" да 120-годдзя з дня нараджэння Стэфаніі Станюты

Выстава, прысвечаная 120-годдзю з дня нараджэння народнай артысткі Беларусі і СССР Стэфаніі Станюты, раскрывае яе жыццёвы і творчы шлях. У экспазіцыі прадстаўлены фотаздымкі, тэксты роляў, рукапісы, малюнкі, перапіскі з роднымі і знаёмымі, водгукі крытыкаў і паклоннікаў, дакументы. Наведвальнікі музея могуць убачыць фатаграфіі выдатнай артысткі з сынам-пісьменнікам Аляксандрам, які прысвяціў ёй кнігу, дакументы, звязаныя з Другім беларускім драматычным тэатрам у Віцебску, дзе многія беларускія артысты пачыналі свой шлях пасля навучання ў 1920-я ў вялікіх майстроў у Маскве. Стэфанія Станюта ў 1931-м пасля вяртання са студыі ММТ паступіла ў трупу Першага драматычнага тэатра (цяпер – Купалаўскага), дзе праслужыла 70 гадоў, выканаўшы каля 200 роляў і стаўшы сапраўднай легендай!

Калі: з 13 мая 2025 года
Дзе: Беларускі дзяржаўны архіў-музей літаратуры і мастацтва, вул. Кірыла і Мяфодзія, 4, Мінск
Даведацца больш

"Асенні салон"-2025 у Мінску

"Асенні салон з Белгазпрамбанкам" у новым сезоне прадставіць работы 260 маладых беларускіх майстроў, адабраных прафесійным журы з больш як тысячы ўдзельнікаў. Арганізатары ўжо называюць яго рэкордным па колькасці пададзеных заявак за ўсю дзесяцігадовую гісторыю выставы-продажу. Удзельнікі маштабнага праекта – сучасныя мастакі ва ўзросце ад 18 да 40 гадоў, аўтары работ, створаных за апошнія тры гады ў любых тэхніках і відах выяўленчага мастацтва. Госці могуць набыць карціны – больш за 90 працэнтаў з іх даступны на анлайн-платформе Аrtcenter.by, дзе можна атрымаць дадатковую інфармацыю аб кожнай рабоце, сканіруючы QR-код на этыкетцы.

Калі: 5 верасня – 19 кастрычніка
Дзе: Палац мастацтва, вул. Казлова, 3, Мінск

XVI Нацыянальны фестываль архітэктуры ў Мінску

Нацыянальны фестываль архітэктуры прысвечаны 90-годдзю Беларускага саюза архітэктараў – старэйшага творчага саюза рэспублікі. Цэнтральнай падзеяй абяцае стаць Мінскае міжнароднае біенале маладых архітэктараў "Леанарда". Гэта ўнікальны міжнародны конкурс, які праводзіцца раз у два гады і ў якім прымаюць удзел архітэктары ва ўзросце да 40 гадоў. Работы разглядаюцца па двух раздзелах – "Пабудова" і "Праект", у кожным з якіх устаноўлена па шэсць намінацый, і ацэньваюцца аўтарытэтным міжнародным журы. У рамках праграмы адбудуцца персанальныя выставы, архітэктурныя і сумесныя з іншымі напрамкамі мастацкай творчасці праекты, конкурсы па эстэтызацыі жылога асяроддзя.

Калі: 17 верасня – 25 кастрычніка
Дзе: Рэспубліканскі Дом архітэктара, вул. Карла Маркса, 14, Мінск

Выстава "Адкуль узяўся Бурачок?" да 185-годдзя Францішка Багушэвіча ў Мінску

Мацей Бурачок, Сымон Рэўка з-пад Барысава – такія жартаўлівыя псеўданімы ўзяў для свайго літаратурнага амплуа выдатны пісьменнік, адвакат і грамадскі дзеяч Францішак Багушэвіч. Яго знакамітыя паэтычныя зборнікі "Дудка беларуская" і "Смык беларускі", напісаныя лацінкай, сёння выдаюцца кірыліцай, а старыя аўтэнтычныя экзэмпляры –  вялікая рэдкасць. Аднак з вёскі Кушляны ў Смаргонскім раёне Гродзенскай вобласці, дзе вырас пісьменнік, у калекцыю Музея гісторыі беларускай літаратуры ў розныя часы паступалі сапраўдныя прадметы з мінулага. Наведвальнікі выставы, прымеркаванай да 185-годдзя Францішка Багушэвіча, змогуць зазірнуць у свет сядзібы і прайсці звілістымі сцежкамі паэта, а таксама ўбачыць прадмет інтэр'ера – буфет XIX стагоддзя са сталовай, які належаў сям'і Багушэвічаў.

Калі: да 28 снежня
Дзе: Дзяржаўны музей гісторыі беларускай літаратуры, вул. М. Багдановіча, 13, Мінск

Выстава "Набіванка: традыцыя і сучаснасць" у Полацку

"Набіванка", набойка, выбойка – гэта адна з тэхнік дэкарыравання тканіны з дапамогай трафарэтнай дошкі з рэльефным малюнкам, якая атрымала распаўсюджванне ў XVI–XVII стагоддзях у Віцебску, Магілёве, Полацку, Оршы, Бабруйску. Менавіта ў гэтых беларускіх гарадах у той час размяшчаліся буйнейшыя спецыялізаваныя майстэрні. З дапамогай набівання дэкарыравалі хатні тэкстыль (абрусы, ручнікі, прасціны), а таксама тканіну, з якой выраблялі элементы касцюма: сарафаны, кашулі, фартухі. Наведвальнікі выставы змогуць убачыць рамесную традыцыю адразу на двух узроўнях – гістарычным, які паказвае ўзнікненне і развіццё набіванкі ў XIX стагоддзі – першай палове XX стагоддзя на тэрыторыі Беларусі, і сучасным, што адлюстроўвае адраджэнне і пераасэнсаванне старадаўняга майстэрства ў работах майстроў нашага часу.

Калі: 19 верасня 2025 – 31 студзеня 2026
Дзе: Музей традыцыйнага ручнога ткацтва Паазер'я, вул. Войкава, 1, Полацк

Фестываль-кірмаш працаўнікоў вёскі "Дажынкі"–2025 у рэгіёнах Беларусі

Са старажытных часоў абрад дажынак у славянскім календары азначаў заканчэнне жніва на палях, і такім чынам нашы продкі адзначалі завяршэнне сельскагаспадарчага года. У Беларусі штогадовы фестываль-кірмаш працаўнікоў вёскі "Дажынкі" праводзіцца з 1996 года. Ён суправаджаецца цырымоніямі ўзнагароджвання працаўнікоў АПК, кірмашамі, выступленнямі фальклорных ансамбляў, майстар-класамі, конкурсамі і іншымі актыўнасцямі.

Калі, дзе:
20 верасня – Заслаўе (Мінская вобласць)
21 верасня – Ваўкавыск (Гродзенская вобласць)
3 кастрычніка – Лельчыцы (Гомельская вобласць)
4 кастрычніка – Белаазёрск (Брэсцкая вобласць)
4 кастрычніка – Чашнікі (Віцебская вобласць)
4 кастрычніка – Крычаў (Магілёўская вобласць)

28-ы Манхэтэнскі фестываль кароткаметражнага кіно ў Мінску

Штогадовы фестываль кароткаметражнага кіно Annual MANHATTAN SHORT Film Festiv аб'яднае звыш 100 тысяч кінааматараў з больш як 500 гарадоў свету на 5 кантынентах, якім давядзецца выбраць лепшы фільм і лепшага акцёра з фіналістаў гэтага года. Гледачы ўбачаць сучасны свет вачамі маладых рэжысёраў з сямі краін – Іспаніі, Ізраіля, Вялікабрытаніі, Нарвегіі, Нідэрландаў, Бельгіі і Мексікі, а таксама тры фільмы – з ЗША. Усяго ў праграме – 10 кароткіх кінагісторый, якія закранаюць актуальныя для пакалення тэмы. Гэта драматычныя і камічныя погляды на міграцыю, прымірэнне, жыллё, бацькоўства, цану маўчання, выпрабаванні і цяжкасці сталення...

Калі: 25 верасня – 5 кастрычніка
Дзе: кінатэатры "Перамога" і "Масква", SKYLINE Cinema ГЦ Galileo, Falcon Club CINEMA BOUTIQUE

Фэнтэзі-спектакль "МІРАС": новая праграма ў Белдзяржцырку

Унікальны фэнтэзі-спектакль "Мірас" стварылі беларускія і расійскія артысты ў сумесным праекце з Казанскім дзяржаўным цыркам. Беларускія гледачы азнаёмяцца з самабытнай гісторыяй і культурай татарскага народа праз тандэм цыркавога мастацтва і сучасных тэхналогій. Пад купалам мінскага цырка ажывуць старажытныя міфы і легенды, якія цесна пераплятаюцца з рэальнасцю, а традыцыі продкаў будуць адноўлены праз акрабатыку, музыку і магію. Акрамя таго, у новай праграме – жанглёры ў паветры, эквілібр, паветраныя гімнасты і турнікі, акрабатычная дарожка, наезнікі на конях, дрэсіраваныя мядзведзі, авечкі і, вядома, клаўнада…

Калі: 27 верасня – 30 лістапада
Дзе: Беларускі дзяржаўны цырк, пр. Незалежнасці, 32, Мінск

IX Міжнародны фестываль дакументальнага кіно краін СНД "Еўразія.DOC"

Фестываль дакументальнага кіно краін СНД "Еўразія.DOC" стартуе 29 верасня ў расійскім Смаленску, а 2 кастрычніка мерапрыемствы перамесцяцца ў Мінск. Адкрыецца форум стужкай Уладзіміра Сумашэдава "Вораг нумар тры", прысвечанай выдатнаму савецкаму мастаку і майстру фотамантажу Аляксандру Жытомірскаму. Усяго ў кароткай праграме фестывалю прадстаўлены 35 фільмаў-фіналістаў з 9 краін, адабраныя экспертным журы з больш як 350 прэтэндэнтаў. Галоўныя тэмы – 80-годдзе Вялікай Перамогі, завяршэнне Другой сусветнай вайны, неанацызм у XXI стагоддзі, міграцыйны крызіс на беларуска-польскай граніцы. Будуць прадстаўлены кінагісторыі пра лёс чалавека, мужнасць і пераадоленне, служэнне, работы, якія адлюстроўваюць погляд на еўразійскую прастору з пазіцый гісторыі, культуры, нацыянальных традыцый. Таксама ў праграме фестывалю–2025 – пазаконкурсныя і рэтраспектыўныя паказы, круглыя сталы і тэматычныя дыскусіі, майстар-класы, сустрэчы з аўтарамі, экспертамі і грамадскімі дзеячамі, прэс-канферэнцыі, выставы і спецыяльныя падзеі.

Калі: 2–3 кастрычніка
Дзе: кінатэатр "Перамога", вул. Інтэрнацыянальная, 20, Мінск
Даведацца больш

Гомельскі паўмарафон–2025

Гомельскі паўмарафон завершыць цэлую серыю маштабных лёгкаатлетычных забегаў гэтага сезона ў Беларусі. Праграма стартаў уключае тры дыстанцыі: сямейны забег (да 1 км), 7 км і паўмарафон (21 км 97 м). Традыцыйна самы папулярны 7-кіламетровы маршрут праходзіць па маляўнічых кутках тэрыторыі Гомельскага палацава-паркавага ансамбля і складзены такім чынам (старт – набярэжная ракі Сож), што госці горада змогуць не толькі патрэніраваць лёгкаатлетычныя навыкі, але і ўбачыць самыя атмасферныя мясціны абласнога цэнтра.

Калі: 4 кастрычніка
Дзе: набярэжная ракі Сож (вул. Набярэжная, 27, вяслярная база) – парк у межах палацава-паркавага ансамбля Румянцавых і Паскевічаў – гістарычныя кварталы, Гомель

CINEMA MEDLEY 1 і CINEMA MEDLEY 2 ад Imperial Orchestra на пляцоўцы "Мінск-Арэны"

Грандыёзнае шоу саўндтрэкаў Cinema Medley ў выкананні вялікага сімфанічнага аркестра Imperial Orchestra, аргана і зорных салістаў Санкт-Пецярбурга і Масквы заваявала паклоннікаў па ўсім свеце. У тым ліку і ў Беларусі музыканты бывалі ўжо не раз. Cinema Medley – гэта ўнікальны праект, які не мае аналагаў на планеце: Imperial Orchestra выступае ў фармаце 360, што дазваляе кожнаму гледачу атрымаць асалоду ад цудоўнага магутнага сімфанічнага гучання і добрага агляду з любога месца арэны. У адзін дзень, 4 кастрычніка, на самай вялікай крытай пляцоўцы краіны – "Мінск-Арэне" – будуць гучаць два шоу. У праграме CINEMA MEDLEY 1 "Інтэрстэлар" (13.00) сабраны галоўныя саўндтрэкі XX і XXI стагоддзя ад кампазітараў Ханса Цымера, Джона Уільямса, Дэвіда Арнольда, Раміна Джавадзі, Эндру Лойда Уэбера – з фільмаў "Шэрлак Холмс", "Піраты Карыбскага мора", "Зорныя войны", "Гары Потэр", "Інтэрстэлар", "Гульня прастолаў", "Бэтмен", "Гладыятар", "Пекла", "Прывід оперы", "Парк Юрскага перыяду", "Пачатак", "Спіс Шындлера"... Праграма CINEMA MEDLEY 2 "Опенгеймер" (19.00) – шоу, якое стала яшчэ больш маштабным і эпічным: да сімфанічнага аркестра далучыўся магутны хор. У праграму ўвайшла музыка не толькі з папулярных фільмаў, але і серыялаў. "Вельмі дзіўныя справы", "Мандалорац", "Мсціўцы", "Уладар кольцаў", "Опенгеймер", "Аватар" – усё гэта саўндтрэкі, якія можна эксклюзіўна пачуць толькі ў выкананні Imperial Orchestra.

Калі: 4 кастрычніка, 13.00 і 19.00
Дзе: "Мінск-Арэна", пр. Пераможцаў, 110, Мінск

49-я Міжнародная выстаўка-кірмаш па аптовым продажы тавараў лёгкай прамысловасці BTI–2025

BTI (BelTexIndustry) – найбуйнейшая галіновая выстаўка Рэспублікі Беларусь – аб'ядноўвае прадстаўнікоў бізнесу, лёгкай прамысловасці і fashion-індустрыі. Кожны год калекцыі будучага сезона прэзентуюць больш за 80 экспанентаў з Беларусі, Турцыі, Расіі, Кітая, Узбекістана. У рамках дзелавой праграмы пройдуць спецыялізаваныя семінары, бізнес-сустрэчы з удзелам кіраўнікоў вядучых прадпрыемстваў, прадстаўнікоў гандлю і СМІ, прэзентацыі кампаній, паказы калекцый адзення і абутку. Арганізатары – дзяржаўнае прадпрыемства "БелЭкспа" і канцэрн "Беллегпрам". Уваход на выставу свабодны пасля электроннай рэгістрацыі.

Калі: 8–10 кастрычніка
Дзе: ММВЦ BELEXPO, вул. П.Мядзёлкі, 24, Мінск
Даведацца больш: bti.by

Гастролі Бранскага тэатра драмы імя А.К. Талстога ў Мінску

Бранскі тэатр драмы імя А.К. Талстога прадставіць у беларускай сталіцы чатыры спектаклі. Адкрые праграму трагікамедыя "Апаведы  цыніка" паводле твораў Аркадзя Аверчанкі ў пастаноўцы Яўгена Качаткова. Цікава, што менавіта гэты спектакль перамог у намінацыі "Лепшая рэжысура" на XV Міжнародным фестывалі тэатральнага мастацтва "Славянскія сустрэчы" ў Гомелі (2023). Юных гледачоў чакае мюзікл "Адважнае шчаня Бенджамін" пра смеласць і баязлівасць, вернасць і здраду, любоў і абыякавасць. У гэты ж дзень дарослай публіцы пакажуць рамантычную камедыю "Каханне ў стылі баROCKка", вытрыманую ў сучасных рокавых рытмах – пра непазбежнасць выбару, барочную пышнасць і ўсёпераможнае каханне. Завершыць гастрольны тур камедыя "Лес" паводле аднайменнага твора Аляксандра Астроўскага.

Калі: 8–10 кастрычніка
Дзе: Беларускі дзяржаўны акадэмічны музычны тэатр, вул. Мяснікова, 44, Мінск

Бацькоўскі тыдзень у Беларусі: Дзень маці і Дзень бацькі

З 2022 года ў кастрычніку беларусы адзначаюць бацькоўскі тыдзень, які пачынаецца Днём маці (14 кастрычніка), а завяршаецца святам у гонар бацькаў (21 кастрычніка). Згодна са статыстыкай, у 2025 годзе ў краіне налічваецца 2,6 млн сем'яў, сярэдні памер сям'і – 2,9 чалавека. 43,7% сем'яў выхоўваюць дзяцей да 18 гадоў (у асноўным гэта адно дзіця – 57,3%). І, паводле слоў спецыялістаў, сёння бацькі не толькі адыгрываюць не менш важную ролю, чым маці, але і назіраецца тэндэнцыя павышэння адказнага бацькоўства. Сучасныя таты бяруць на сябе адказнасць за выхаванне дзяцей нават у выпадку разводу, распаду сям'і... Галоўны пасыл бацькоўскага тыдня – умацаванне сем'яў, папулярызацыя моцных адносін паміж мамамі, татамі і дзецьмі. Па ўсёй краіне пройдуць сотні мерапрыемстваў, прысвечаных самым родным людзям – канцэрты, сустрэчы, выставы, спартыўныя турніры.

Калі: 14–21 кастрычніка

Rene De La Garde з праграмай "Мелодыі Францыі" ў Беларусі

"Мелодыі Францыі" прагучаць у буйнейшых беларускіх гарадах у выкананні французскага спевака, паэта і кампазітара Рэнэ дэ ла Гарда. Аднойчы падмяніўшы хворага артыста, Рэнэ ва ўзросце 35 гадоў пачаў вакальную кар'еру. Яго прыемны голас, рамантычны вобраз, харызма і энергетыка хутка пакарылі публіку як у роднай краіне, так і за яе межамі. У праграме вечара акрамя твораў маладых аўтараў французскай эстрады і ўласных песень Rene De La Garde, прагучаць сусветныя хіты Джо Дасэна, Ванэсы Парадзі, Шарля Азнавура, Мірэй Мацьё, П'ера Башэле, Эдзіт Піяф, Бенджамена Б'яле, Патрысіі Каас... Як гаворыць сам Рэнэ, "гэта песні без часу: ад таго, што яны напісаны і выкананы сапраўды таленавітымі людзьмі, яны не старэюць".

Калі, дзе:
14 кастрычніка – КЗ "Мінск", вул. Кастрычніцкая, 5, Мінск 
15 кастрычніка – Абласны грамадска-культурны цэнтр, вул. Камуністычная, 1, Брэст
16 кастрычніка – Абласны цэнтр творчасці, пр. Міру, 23А, Магілёў
17 кастрычніка – Гарадскі цэнтр культуры, вул. Ірынінская, 16, Гомель

21-я Міжнародная спецыялізаваная выстаўка-кірмаш "ЛЕСДРЭЎТЭХ–2025"

Нуйбуйнейшае ў Беларусі мерапрыемства лесапрамысловага комплексу – "ЛЕСДРЭЎТЭХ" – прапануе шырокія магчымасці для пашырэння прадукцыі і паслуг на ўнутраным і міжнародным рынках, з'яўляецца зручнай пляцоўкай для прафесійнай камунікацыі і заключэння дагавораў. У праграме – сустрэчы з экспертамі, спецыяльныя прапановы для ўдзельнікаў, прэзентацыі і майстар-класы. Арганізатары – дзяржаўнае прадпрыемства "БелЭкспа" і Міністэрства лясной гаспадаркі Рэспублікі Беларусь. Уваход на выстаўку свабодны пасля электроннай рэгістрацыі.

Калі: 15–18 кастрычніка
Дзе: ММВЦ BELEXPO, вул. П.Мядзёлкі, 24, Мінск
Даведацца больш: lesdrevtech.by

Нэла Сальтца і Нацыянальны Прэзідэнцкі аркестр у Мінску

Упершыню на беларускай сцэне выступіць сусветна вядомы італьянскі трубач Нэла Сальтца, якога ведаюць як "трубу Марыконэ". За сваё жыццё ён запісаў больш за 400 саўндтрэкаў для кінакарцін і на працягу 34 гадоў супрацоўнічаў з "маэстра кінамузыкі" Эніа Марыконэ. Нэла Сальтца падрыхтаваў сумесную праграму з Нацыянальным Прэзідэнцкім аркестрам Рэспублікі Беларусь пад кіраўніцтвам галоўнага дырыжора Віталя Кульбакова. У эксклюзіўным канцэрце прагучыць музыка вялікага кампазітара Эніа Марыконэ з сусветна вядомых фільмаў – "Легенда пра піяніста", "Аднойчы ў Амерыцы", "Спрут", "Паштальён", "Сям'я", "Недатыкальныя" і інш.

Калі: 16 кастрычніка
Дзе: Палац Рэспублікі, пл. Кастрычніцкая, 1, Мінск

"Восеньскае падарожжа" па мясцінах Якуба Коласа ў Стаўбцоўскім раёне

У бягучым годзе спаўняецца 142 гады з дня нараджэння паэта і празаіка, драматурга і перакладчыка, крытыка і публіцыста, настаўніка літаратурнай моладзі Якуба Коласа (Канстанціна Міхайлавіча Міцкевіча). У кастрычніку знатакоў беларускай культуры і літаратуры запрашаюць адправіцца ў займальнае падарожжа па родных мясцінах народнага паэта Беларусі. Удзельнікам давядзецца наведаць знакавыя месцы, звязаныя з жыццём і творчасцю Якуба Коласа (мемарыяльныя сядзібы ў Акінчыцах, Альбуці, Смольні), паслухаць захапляльныя гісторыі пра яго дзяцінства і сям'ю, акунуцца ў атмасферу беларускай вёскі, а таксама паўдзельнічаць у інтэрактыўных і забаўляльных праграмах – ад гульняў і абрадаў да дэгустацый традыцыйных страў.

Калі: 18 кастрычніка
Дзе: музей Якуба Коласа ў Мінску – мемарыяльныя сядзібы ў Акінчыцах, Альбуці, Смольні – Нясвіж – Нясвіжскі замак – Мінск

ХХХІХ адкрыты фестываль аўтарскай песні, паэзіі і візуальных мастацтваў "Віцебскі лістапад"

"Віцебскі лістапад" аб'яднае ў творчым марафоне музыкантаў, паэтаў, мастакоў, перформераў. Фестываль у горадзе Шагала праводзіцца з 1987 года (да 2016 года – фестываль-свята аўтарскай песні) і з'яўляецца старэйшым у краіне форумам аўтарскай песні і паэзіі, які праходзіць на закрытай канцэртнай пляцоўцы, дзе выступаюць аўтары-выканаўцы з Беларусі і краін замежжа. Фармат традыцыйна змешаны: прыняць удзел па-ранейшаму можна як вочна, так і дыстанцыйна. Фестываль уключае ў сябе конкурсы аўтарскай песні, паэзіі, візуальнага мастацтва (вокладка кнігі, ілюстрацыя, нацюрморт, партрэт, сюжэтна-тэматычная кампазіцыя) і выканальніцкага майстэрства (музычны кліп, відэапаэзія), а таксама майстар-класы. Галоўнымі падзеямі стане паэтычны турнір і музычны батл сярод удзельнікаў.

Калі: 23–26 кастрычніка
Дзе: Цэнтр культуры "Віцебск", вул. Маякоўскага, 1, Віцебск

"Вялесава ноч" у Бярэзінскім біясферным запаведніку

Жамчужына Беларусі – Бярэзінскі біясферны запаведнік – уяўляе сабой старажытнейшую прыродную экасістэму і аб'ядноўвае 1348 балот. Традыцыйна ў кастрычніку ўсе прыродныя працэсы запавольваюцца, жывы свет паступова акунаецца ў сон. "Вялесава ноч" у славянскай традыцыі з'яўляецца святам пераходу з восені ў зіму і адзначаецца ў ноч з 31 кастрычніка на 1 лістапада. Нашы продкі верылі, што менавіта ў гэты час мяжа паміж светам людзей (Яві) і светам духаў (Наві) становіцца асабліва тонкай, а вартаўніком гэтага пераходу з'яўляецца Вялес – заступнік свойскай жывёлы, багацця, а таксама ведаў і мудрасці... Госці свята "Вялесава ноч" у Бярэзінскім запаведніку акунуцца ў загадкавы свет духаў і старажытных божастваў, зробяць містычнае падарожжа па "сцежцы міфаў", правераць свае веды міфалогіі ў займальным квізе, а таксама прадэгустуюць духмяныя травяныя адвары ля вогнішча на лясной паляне.

Калі: 25–26 кастрычніка
Дзе: Бярэзінскі біясферны запаведнік, вул. Цэнтральная, 3, в. Домжарыцы, Лепельскі раён, Віцебская вобласць

"Паўночны тралейбус": група "Ундэрвуд" і Канстанцін Хабенскі ў Мінску

Вядомы акцёр тэатра і кіно, рэжысёр, сцэнарыст, прадзюсар і мастацкі кіраўнік МХТ імя А.П. Чэхава Канстанцін Хабенскі і група "Ундэрвуд" прадставяць у Мінску музычную праграму "Паўночны тралейбус", прысвечаную Булату Акуджаву. У год стагоддзя вялікага паэта і музыканта артысты запісалі альбом "Праект О", які паступова набывае канцэртнае ўвасабленне. Акрамя песень, са сцэны прагучаць вершы, урыўкі з успамінаў паэта і яго сучаснікаў. Аб прычынах звароту да творчасці спяваючага паэта, заснавальніка аўтарскай песні Канстанцін Хабенскі гаворыць: "Па-першае, у маім дзяцінстве і юнацтве ў маёй сям'і гучала мноства песень Акуджавы, і я ўвабраў іх у сябе.  Па-другое, ужо ў перыяд студэнцтва і майго станаўлення, выконваючы гэтыя песні, я ўсведамляў, што яны па энергіі маюць права існаваць у іншым рэгістры..."

Калі: 29 кастрычніка
Дзе: КЗ "Мінск", вул. Кастрычніцкая, 5, Мінск