Каляндар падзей у Беларусі

СТУДЗЕНЬ 2026

Выстава "Кожная роля – галоўная" да 120-годдзя з дня нараджэння Стэфаніі Станюты

Выстава, прысвечаная 120-годдзю з дня нараджэння народнай артысткі Беларусі і СССР Стэфаніі Станюты, раскрывае яе жыццёвы і творчы шлях. У экспазіцыі прадстаўлены фотаздымкі, тэксты роляў, рукапісы, малюнкі, перапіскі з роднымі і знаёмымі, водгукі крытыкаў і паклоннікаў, дакументы. Наведвальнікі музея могуць убачыць фатаграфіі выдатнай артысткі з сынам-пісьменнікам Аляксандрам, які прысвяціў ёй кнігу, дакументы, звязаныя з Другім беларускім драматычным тэатрам у Віцебску, дзе многія беларускія артысты пачыналі свой шлях пасля навучання ў 1920-я ў вялікіх майстроў у Маскве. Стэфанія Станюта ў 1931-м пасля вяртання са студыі ММТ паступіла ў трупу Першага драматычнага тэатра (цяпер – Купалаўскага), дзе праслужыла 70 гадоў, выканаўшы каля 200 роляў і стаўшы сапраўднай легендай!

Калі: з 13 мая 2025 года
Дзе: Беларускі дзяржаўны архіў-музей літаратуры і мастацтва, вул. Кірыла і Мяфодзія, 4, Мінск
Даведацца больш

Выстава "Набіванка: традыцыя і сучаснасць" у Полацку

"Набіванка", набойка, выбойка – гэта адна з тэхнік дэкарыравання тканіны з дапамогай трафарэтнай дошкі з рэльефным малюнкам, якая атрымала распаўсюджванне ў XVI–XVII стагоддзях у Віцебску, Магілёве, Полацку, Оршы, Бабруйску. Менавіта ў гэтых беларускіх гарадах у той час размяшчаліся буйнейшыя спецыялізаваныя майстэрні. З дапамогай набівання дэкарыравалі хатні тэкстыль (абрусы, ручнікі, прасціны), а таксама тканіну, з якой выраблялі элементы касцюма: сарафаны, кашулі, фартухі. Наведвальнікі выставы змогуць убачыць рамесную традыцыю адразу на двух узроўнях – гістарычным, які паказвае ўзнікненне і развіццё набіванкі ў XIX стагоддзі – першай палове XX стагоддзя на тэрыторыі Беларусі, і сучасным, што адлюстроўвае адраджэнне і пераасэнсаванне старадаўняга майстэрства ў работах майстроў нашага часу.

Калі: 19 верасня 2025 – 31 студзеня 2026
Дзе: Музей традыцыйнага ручнога ткацтва Паазер'я, вул. Войкава, 1, Полацк

Інтэрактыўны выставачны праект "Змрок Сярэднявечча" ў Мінску

Наведвальнікі сталічнага археалагічнага музея "Верхні горад" зробяць інтэрактыўнае падарожжа ў свет таямнічага і змрочнага Сярэднявечча (XII–XVI стст.), якое часта называюць Цёмнымі вякамі ў гісторыі чалавецтва. І нядзіўна: яшчэ пяць стагоддзяў таму на рыначнай плошчы кожнага еўрапейскага горада стаяў эшафот, а каля гарадскіх варот – шыбеніцы. У экспазіцыі, прысвечанай правасуддзю, прадстаўлены метады дазнання і прылады катаванняў, якія прымяняліся ў перыяд інквізіцыі і палявання на чарадзеяў і ведзьмаў: маскі ганьбы, дыба, скрыпка пляткарак, слуп ганьбы, іспанскі бот, гарота, ведзьміна збруя, груша пакут… Створаныя для праекта па старадаўніх тэхналогіях экспанаты суправаджаюцца гравюрамі, малюнкамі і карцінамі, якія паказваюць іх у дзеянні, а таксама гістарычнымі каментарыямі.

Калі: 19 верасня 2025 – 18 студзеня 2026
Дзе: археалагічны музей "Верхні город", вул. Кірылы і Мяфодзія, 6, Мінск

Выстава "Гонар. Доблесць. Годнасць" у Нясвіжскім замку

Акунуцца ў свет параднай і паляўнічай зброі могуць наведвальнікі Нясвіжскага замка на працягу года. Выдатныя ўзоры афіцэрскай параднай зброі (корцікі, шпагі, шашкі, шаблі), камзольныя і ведамасныя шпагі, масонскія рытуальныя мячы, экзатычная зброя розных краін – каштоўныя артэфакты сабраны і прадастаўлены прыватным калекцыянерам Анатолем Грышуком. Як адзначыў уладальнік, упершыню цікавасць да гісторыі зброі праявілася, калі ён знайшоў уланскую шаблю ўзору 1932 года, якая належала бацьку. А дзед служыў у імператарскай арміі і ахоўваў Мікалая II, калі манарх прыязджаў у нашы краі на манеўры ў 1892 годзе. Выстава расказвае і пра культуру палявання, дзе зброя – не толькі прадмет мастацтва, але і сімвал улады, інструмент дэманстрацыі перавагі над прыродай. Адметнасцю выставы стала інсталяцыя – фігура вершніка на кані, закаванага ў бліскучы даспех крылатага гусара ВКЛ. Госці таксама змогуць прымераць сярэдневяковыя даспехі, адчуўшы іх цяжар, і зрабіць фота побач з фігурай Мікалая Радзівіла Сіроткі.

Калі: 31 кастрычніка 2025 – 31 кастрычніка 2026
Дзе: Нацыянальны гісторыка-культурны музей-запаведнік "Нясвіж", вул. Замкавая, 2, Нясвіж, Мінская вобласць

Выстава "Забытае майстэрства перапіскі" ў Гродне

Зазірнуць у пісьмы гістарычных асоб Беларусі ХVI–ХХ стагоддзяў упершыню змогуць наведвальнікі Гродзенскага гісторыка-археалагічнага музея. У экспазіцыі прадстаўлена дзелавая перапіска караля Стафана Баторыя, прыватная перапіска ўладальніка Косаўскага палаца Вандаліна Пуслоўскага і яго дачкі Марты Красінскай, гісторыка і краязнаўца Аляксандра Ельскага, гродзенскай пісьменніцы Элізы Ажэшка. Асаблівае месца адведзена пісьмам часоў Вялікай Айчыннай вайны і перапісцы беларускіх пісьменнікаў Якуба Коласа, Васіля Быкава, Міхася Васілька, Аляксея Карпюка. Дапоўняць выставу разнастайныя інструменты для пісьма, сярод якіх – чарніліцы, бутэлечкі для чарніла, пёравыя ручкі, скрынкі для пёраў, алоўкі, латок для паперы, прэс-пап'е…

Калі: з 20 лістапада
Дзе: Гродзенскі гісторыка-археалагічны музей, вул. Замкавая, 20, Гродна
Даведацца падрабязней

Казачны балет "Шчаўкунок" у Мінску

Кожную зіму адзін з сімвалаў Раства і Новага года – "Шчаўкунок" – вяртаецца на падмосткі і экраны. У лістападзе ў беларускім Вялікім тэатры адбылася прэм'ера новай версіі самага казачнага балета П.І. Чайкоўскага. Вельмі прыгожую творчую інтэрпрэтацыю ўвазе публікі прадставіў балетмайстар, харэограф, аўтар лібрэта Ігар Колб. Атрымаць асалоду ад класічнай версіі спектакля ў пастаноўцы народнай артысткі Беларусі Кацярыны Фадзеевай можна ў Беларускім дзяржаўным акадэмічным музычным тэатры. А 10 і 11 студзеня камерную версію "Шчаўкунка" па лібрэта Марыуса Петыпа пакажуць юныя выхаванкі Балетнай школы Марыны Вежнавец.

Пазнаёміцца з рознымі пастаноўкамі "Шчаўкунка" па ўсім свеце можна дзякуючы кінапаказам праекта TheatreHD: 21 снежня знатакоў чакае прэм'ера балета Юрыя Посахава ў прамой трансляцыі са сцэны музычнага тэатра імя Станіслаўскага і Неміровіча-Данчанкі ў Маскве (12:00, Skyline Cinema), 24 снежня гледачы акунуцца ва ўтульную калядную гісторыю са сцэны Дрэздэнскай оперы (19:00, ГЗЦ Palazzo), а пад заслону 2025-га – 30 і 31 снежня – легендарны балет у Вялікім тэатры Расіі ў пастаноўцы Юрыя Грыгаровіча пакажуць у кінатэатры "Перамога".

Калі, дзе:
28 лістапада 2025 – 29 сакавіка 2026 – Вялікі тэатр Беларусі, пл. Парыжскай Камуны, 1, Мінск
25–27 снежня 2025, 11 студзеня і 1 лютага 2026 – Беларускі дзяржаўны акадэмічны музычны тэатр, вул. Мяснікова, 44, Мінск
10 і 11 студзеня 2026 – Палац культуры МАЗ, пр. Партызанскі, 117а, Мінск

"Раство Хрыстова": калядныя паказы батлейкі ў Гродне

Калядныя сюжэты з Марыяй і Іосіфам, з'яўленнем немаўляці Ісуса, пакланеннем вешчуноў і злым царом Ірадам пакажуць гледачам артысты батлейкі. Цікава, што лялечны тэатр у гісторыка-археалагічным музеі з'явіўся ў пачатку 2000-х дзякуючы намаганням і творчай фантазіі саміх супрацоўнікаў. Сёння ў рэпертуары музейнага тэатра – тры пастаноўкі: "Пажар у замку Вітаўта", "Гісторыя святога Губерта" (лічыцца заступнікам Гродна) і "Раство Хрыстова". Аўтарамі сцэнарыяў да спектакляў, рэжысёрамі-пастаноўшчыкамі і выканаўцамі з'яўляюцца музейшчыкі.

Калі: 5 снежня 2025 – 7 студзеня 2026 (кожны чацвер)
Дзе: Гродзенскі гісторыка-археалагічны музей, вул. Замкавая, 20, Гродна

Першая імерсіўная навагодняя выстава "Дом Раства" ў Мінску

"Дом Раства" – гэта інтэрактыўная прастора для дзяцей і дарослых, дзе на плошчы 2300 кв.м размясцілася шмат зон-станцый з унікальным ландшафтам. Госці наведаюць вёску Здзіўляндыю з яркімі домікамі, вулачкамі-сюрпрызамі і казачнымі жыхарамі, а затым апынуцца на таямнічым Цуда-Вакзале, адкуль адпраўляюцца паязды толькі ў Краіну Цудаў. Наведвальнікі могуць напісаць жаданне на самым вялікім пісьме Дзеду Марозу, злавіць для сябе і запусціць для іншага бумеранг падарункаў, патэлефанаваць эльфу на фабрыку Дзеда Мароза, паназіраць за каметамі ў магічны тэлескоп, атрымаць пасланне з чароўнай шафы, пагуляць у хованкі з вясёлымі эльфамі ці пакарыць "скалу".

Калі: 9 снежня 2025 – 18 студзеня 2026
Дзе: вул. Машэрава, 15/1, Мінск

Тэматычная экскурсія "Калядная казка ў Суле"

Правесці зімовыя святы весела і пазнавальна прапануе Парк сярэдневяковай гісторыі "Вялікае княства Сула", дзе разгорнецца займальная анімацыйная экскурсія з удзелам казачных персанажаў. Наведвальнікі акунуцца ў самабытныя традыцыі беларусаў і пазнаёмяцца з героямі нацыянальнага фальклору, прымуць удзел у калядаванні і варажбе на будучыню, пройдуць выпрабаванні містычных істот і сустрэнуцца са святым Мікалаем – заступнікам дзяцей, студэнтаў, падарожнікаў, маракоў, гандляроў, воінаў. Дарослыя пасля экскурсіі змогуць наведаць вінакурню і прадэгуставаць традыцыйныя беларускія напіткі, а дзяцей запрашае лялечны тэатр (батлейка).

Калі: 10 снежня 2025 – 11 студзеня 2026
Дзе: в. Сула, Стаўбцоўскі раён, Мінская вобласць

Навагодні каляндар у НММ: выставы, канцэрты, інтэрактыўныя праграмы

Напярэдадні любімых свят галоўны мастацкі музей краіны стварыў свой уласны навагодні каляндар, у якім вакальныя і інструментальныя канцэрты, выставы, музычныя і інтэрактыўныя праграмы, зборныя квесты, творчыя майстар-класы, у тым ліку ў рамках інклюзіўнага праекта. На працягу амаль месяца дзеці і дарослыя змогуць даведацца пра самабытныя традыцыі беларускага Раства (Каляд), навучацца ствараць аўтарскія ёлачныя цацкі і навагодні дэкор у вітражнай тэхніцы, асвояць аўтэнтычныя тэхнікі – выцінанку, ручное ліццё паперы, а таксама пройдуць "Каляднымі сцежкамі", даведаюцца "Якога колеру зіма", вернуць "Чараўніцтва ў музей" і зробяць "Падарожжа ў казку на хвалях гукаў".

Калі: 13 снежня 2025 – 18 студзеня 2026
Дзе: Нацыянальны мастацкі музей Беларусі, вул. Леніна, 20, Мінск

"Месца сустрэчы – Новы год!": новая праграма ў Белдзяржцырку

Напярэдадні зімовых канікулаў і самых любімых свят Белдзяржцырк прэзентуе новую праграму. Госці акунуцца ў атмасферу чарадзейства пад акорды шоу "Месца сустрэчы – Новы год!", сюжэт якога трымаецца ў сакрэце. У цыркавым шоу задзейнічаны паветраныя гімнасты, акрабаты на батуце, жанглёры, наезнікі на конях, клоўны, дрэсіраваныя поні, сабачкі. І, вядома, будзе шмат сюрпрызаў!

Калі: 13 снежня 2025 – 11 студзеня 2026
Дзе: Беларускі дзяржаўны цырк, пр. Незалежнасці, 32, Мінск

Гістарычны квест "Белы Слон" у Мірскім замку

Ужо на працягу стагоддзя Мірскі замак захоўвае гісторыю пра Белага слана, аб якой давядзецца даведацца гасцям адной з самых прыгожых выдатных мясцін Беларусі, аб'екта Сусветнай спадчыны ЮНЕСКА. Але каб паспяхова пераадолець створаныя хавальнікам замка выпрабаванні, трэба прадэманстраваць логіку, кемлівасць і веданне беларускай гісторыі. Квест разлічаны на адначасовы ўдзел ад 15 да 50 чалавек і асобных каманд з колькасцю ігракоў ад 1 да 5.

Калі: 20 снежня 2025, 24 студзеня і 14 лютага 2026
Дзе: Мірскі замак, вул. Чырвонаармейская, 2, г.п. Мір, Карэліцкі раён, Гродзенская вобласць

"Чараўніцтва Новага года": галоўная ёлка краіны ў Палацы Рэспублікі

"Чараўніцтва Новага года" стане запамінальным падарункам для ўдзельнікаў дабрачыннай акцыі "Нашы дзеці", якія прыедуць на свята ў сталіцу з усёй краіны (у мінулым годзе акцыя аб'яднала больш за мільён беларусаў і 2370 дзяцей). Дзеянне навагодняй казкі разгортваецца ў горадзе майстроў, дзе жывуць сем'і ганчароў, ткачоў, пекараў і кавалёў. Згодна з сюжэтам, галоўны герой – лянівы хлопчык Васілёк, які не хоча вучыцца і працаваць, аказваецца ў віхры чарадзейных прыгод. З дапамогай Дзеда Мароза, Снягурачкі і Матухны Зімы ён даведаецца, што сапраўднае чарадзейства нараджаецца са стараннасці, ведаў і любові да роднай зямлі. Гісторыя поўная новых песень, дынамічных танцаў і інтэрактыўных гульняў, натхнёных народнымі традыцыямі і рамёствамі, пры ўдзеле соцень артыстаў, а таксама яркіх дэкарацый і спецэфектаў.

Калі: 25 снежня 2025 – 3 студзеня 2026 (11:00, 15:00, 17:00)
Дзе: Палац Рэспублікі, Кастрычніцкая плошча, 1, Мінск

Выстава навагодніх упрыгажэнняў і атрыбутаў свята "Што расце на ёлцы"

Сталічная галерэя Міхаіла Савіцкага запрашае зрабіць займальнае падарожжа ў атмасферу Новага года мінулага стагоддзя, напоўненае настальгіяй, цёплымі ўспамінамі і чароўнасцю мінулай эпохі. У экспазіцыі прадстаўлена больш за 400 прадметаў, сярод якіх самыя раннія ўзоры ёлачных упрыгажэнняў з Германіі, а таксама ёлачныя ўпрыгажэнні і паштоўкі часоў Расійскай імперыі. З савецкай эпохі прадстаўлены "крамлёўскія" шышкі і арэхі, ватныя фігуркі, самаробныя цацкі і выразаныя з паперы лялькі, цацкі з дроту кабеля. Пачуццё настальгіі выклічуць цацкі на прышчэпках, прысвечаныя казачным, цыркавым матывам, а з палётам першага чалавека ў космас і папулярнай тэме касмічных караблёў, спадарожнікаў, ракет...

Калі: 15 снежня 2025 – 1 лютага 2026
Дзе: Мастацкая галерэя Міхаіла Савіцкага, пл. Свабоды, 15, Мінск

Прэм'ера навагодняй казкі "Дванаццаць месяцаў" у Магілёве

Галоўны драматычны тэатр Магілёўскай вобласці падрыхтаваў навагоднюю прэм'еру "Дванаццаць месяцаў" па матывах любімай многімі казкі Самуіла Маршака. Як адзначыла рэжысёр Ірына Курака, асаблівасцю спектакля стала... адсутнасць адмоўных персанажаў: "Кожны па-свойму сутыкаецца з выпрабаваннямі: Мачаха прагная, Каралева капрызная, але ніхто з іх не імкнецца прычыніць зло дзеля зла". Акрамя павучальнай казкі, гледачоў чакае навагодні паказ з Дзедам Марозам і Снягурачкай. "Яшчэ будзе герой з казкі – Заяц, які да пачатку спектакля правядзе гледачоў праз увесь чароўны лес", – заінтрыгавала рэжысёр.

Калі: 18 снежня 2025 – 10 студзеня 2026
Дзе: Магілёўскі абласны драматычны тэатр, вул. Першамайская 7, Магілёў

Выставы "Да дзяцей Новы год прыйшоў" і "Зімовае ззянне" ў Брэсце

Адразу дзвюма выставамі парадуе брастаўчан і гасцей горада абласны краязнаўчы музей. Калекцыя "Да дзяцей Новы год прыйшоў" прысвечана знаёмым з дзяцінства атрыбутам Новага года. "Зімовае ззянне" правядзе гледача праз усе адценні зімовага настрою – ад палотнаў, якія паказваюць гарадскую архітэктуру ў снежным уборы, да камерных куткоў казачнага лесу. Наведвальнікі ўбачаць падвесныя і падставачныя фігуркі Дзядоў Марозаў і Снягурачак з ваты, пап'е-машэ, паперы, тканіны, апілачнага кампазіту, дрэва і пластыку, а таксама навагоднія цацкі і аксесуары са збору віцебскага калекцыянера Наталлі Кавалёвай. У яе скарбніцы ўжо больш за 5 тысяч экзэмпляраў: антыкварныя, вінтажныя і сучасныя калядныя ёлачныя ўпрыгажэнні розных краін, савецкая сімволіка, "крамлёўскія" цацкі і цацкі-малюткі, ватныя фігуркі, казачныя серыі, цацкі часоў Вялікай Айчыннай вайны…

Калі: 19 снежня 2025 – 1 лютага 2026
Дзе: Брэсцкі абласны краязнаўчы музей, вул. К. Маркса, 60, Брэст

Навагодні мюзікл "Казка пра запаветнае жаданне" ў Гродне

"Казку пра запаветнае жаданне" на сцэне абласной філармоніі пакажуць больш за два дзясяткі спяваючых артыстаў. Згодна з сюжэтам, дзяўчынка піша пісьмо Дзеду Марозу і просіць зрабіць так, каб дарослыя ў доме ніколі не сварыліся. А далей адбываецца чарада незвычайных падзей: добрыя героі – Мінутка, Секунда, Гадзіннікавы Майстар – робяць усё, каб пасланне дайшло да адрасата да поўначы з 31 снежня на 1 студзеня. А злыя персанажы – Пацук і яго світа – усяляк гэтаму перашкаджаюць. Каб пісьмо было дастаўлена ў тэрмін, дзяўчынцы і яе сябрам дапамогуць гледачы. І гэты сюжэт, на думку рэжысёра Віктара Сакалоўскага, павінен нагадаць, як важна жыць у сяброўстве і згодзе.

Калі: 19 снежня 2025 – 5 студзеня 2026
Дзе: Гродзенская абласная філармонія, вул. Гарнавых, 17, Гродна

"Калядны кірмаш" каля Палаца спорту

"Калядны кірмаш" каля сталічнага Палаца спорту традыцыйна збірае тысячы мінчан і гасцей горада. Тут можна набыць натуральныя елкі, у тым ліку ў кадках, навагоднія цацкі і ўпрыгажэнні, святочныя сувеніры і падарункі, рамесныя вырабы. У бягучым годзе больш за 30 удзельнікаў фуд-корта будуць здзіўляць наведвальнікаў стравамі беларускай кухні і не толькі. У меню – бліны, дранікі, шашлык, агародніна грыль, ласункі, выпечка і духмяныя напіткі – гарачы шакалад, травяныя чаі, морсы. Для юных наведвальнікаў будзе дзіцячае меню, а для людзей, якія прытрымліваюцца посту, прадугледжаны посныя стравы.

Калі: 20 снежня 2025 – 11 студзеня 2026
Дзе: пляцоўка каля Палаца спорту, Мінск

Зімовая "Лепшая вуліца"

Гастрапляцоўка "Лепшая вуліца", якая палюбілася жыхарам і гасцям Мінска, у сезон свят пераўтворана ў цікавую кірмашовую лакацыю. У спісе забаў – венецыянская карусель, зімовы вулічны кінатэатр, дзе паказваюць калядныя хіты "Адзін дома", "Клаус", "Палярны экспрэс" і запіс балета "Шчаўкунок", кірмаш рамеснікаў "Луі" (25–28 снежня), а таксама "Акадэмія Аліўе" з кулінарнымі сакрэтамі ад прафесіяналаў. На пляцоўцы працуе фуд-корт, дзе можна пакаштаваць калядную качку, піцу на дровах, хот-догі, вафлі, пасту, пунш. А Навагодняя пошта запрашае адправіць віншаванне блізкім.

Калі: 20 снежня 2025 – 11 студзеня 2026
Дзе: гастрапляцоўка "Лепшая вуліца", пр. Незалежнасці, 95, Мінск

Кірмаш навагодніх забаў у Lakeside Park

Lakeside Park жылога комплексу "Паўночны Бераг" каля маляўнічага Цнянскага вадасховішча ператварыўся ў прастору зімовага чараўніцтва. Наведвальнікаў чакае Кірмаш навагодніх забаў са святочнымі таварамі і дэкорам, тэматычнымі фотазонамі, фуд-кортам з гарачымі пачастункамі і напіткамі. Кожны дзень распісаны літаральна па хвілінах і напоўнены цікавымі актыўнасцямі. У выхадныя і святочныя дні гасцей чакаюць кінапаказы ў амфітэатры, караоке і Just Dance са Снягурачкай, дыскатэкі і інтэрактывы, майстар-класы ад рамеснікаў. Можна заказаць віншаванні для блізкіх на вялікім экране. Для дзяцей працуе пошта Дзеда Мароза і запланаваны майстар-класы. Акрамя таго, на спецыяльнай трасе можна пракаціцца на міні-мабілях. Тэрыторыя ўсяго парку напоўнена атмасферай свята і стане ідэальным месцам для прагулак, сустрэч і прыгожых навагодніх кадраў.

Калі: 20 снежня 2025 – 11 студзеня 2026
Дзе: Lakeside Park, Мінск

Калядны праваслаўны фестываль "Радасць" у Мінску

Праваслаўны фестываль "Радасць" у новым сезоне прадставіць гасцям разнастайнасць сямейных і дзіцячых мерапрыемстваў: канцэрты, тэатральна-музычныя пастаноўкі і прагляды дыяфільмаў, спектаклі батлейкі і тэатра ценяў, чытанні калядных апавяданняў, творчыя майстар-класы (тактыльнае маляванне, мазаіка, выцінанка, роспіс па шкле, лепка, роспіс па дрэве, скрапбукінг, калаж). Госці навучацца ствараць навагодні дэкор для дома, напрыклад, вырабляць арыгінальную ёлку, падсвечнікі, калядныя вянкі, пано з прыродных матэрыялаў, ёлачныя ўпрыгажэнні з пражы і саломы, распісваць імбірныя пернікі і зефір, афармляць падарункі для сям'і і сяброў.

Калі: 26 снежня 2025 – 6 студзеня 2026
Дзе: духоўна-асветны цэнтр "Каўчэг" Свята-Елісавецінскага манастыра, Даўгінаўскі тракт, 164, Мінск

Навагоднія сюрпрызы-2026: святочная праграма ў Нясвіжскім замку

Зімовую праграму для знатакоў атмасферных падарожжаў па Беларусі прадставіць знакамітая архітэктурная і гістарычная выдатная мясціна Беларусі – Нясвіжскі палац, які ўваходзіць у спіс Сусветнай спадчыны ЮНЕСКА. "Навагодняя майстэрня" ў Тэатральнай зале (1, 4–7 студзеня) адкрыецца для юных творцаў, 2 студзеня адбудзецца музычны спектакль "Шчаўкунок". Суботнім вечарам 3 студзеня чароўную атмасферу для гасцей рэзідэнцыі Радзівілаў створыць "Калядны джаз", а з 4 па 6 студзеня разгорнецца "Навагодні калейдаскоп".

Калі: 1–7 студзеня 2026
Дзе: Нясвіжскі палацава-паркавы ансамбль, вул. Замкавая, 2, Нясвіж, Мінская вобласць

Дзіцячы калядны баль у Мірскім замку

Адна з самых чароўных традыцый Мірскага замка – штогадовы дзіцячы калядны баль. У раскошнай Партрэтнай зале ажывае сапраўдная казка, дзе кожнае дзіця становіцца яе галоўным героем. Юных дам і кавалераў сустрэне добры цырымоніймайстар, які лёгка і весела навучыць асновам бальнага этыкету: як запрасіць на танец і як рухацца ў рытме вальса. Разам з казачнымі персанажамі госці адправяцца ў падарожжа ў свет танцаў, гульняў і загадак па матывах казкі "Шчаўкунок". Бальныя паўзы зменяцца вясёлымі конкурсамі і гульнямі, класічнымі менуэтамі і паланэзамі, адаптаванымі для дзяцей. І, вядома, у фінале ўдзельнікаў чакаюць урачысты паланэз і памятныя падарункі.

Калі: 6 студзеня 2026, 12:00 і 15:00
Дзе: Мірскі замак, вул. Чырвонаармейская, 2, г.п. Мір, Карэліцкі раён, Гродзенская вобласць

Калядны баль-маскарад у Мірскім замку

Калядны баль для дарослых гасцей у Мірскім замку прысвечаны традыцыям венецыянскага карнавалу. Раскошная рэзідэнцыя магнатаў мінулага запрашае правесці вечар, напоўнены тайнамі, музыкай і забавамі эпохі Радзівілаў. На свяце ў Партрэтнай зале госці пад кіраўніцтвам вопытнага танцмайстра навучацца выконваць паланэз і менуэт, вальс і мазурку, а таксама прымуць удзел у салонных гульнях і забавах XVIII стагоддзя. Вечар упрыгожаць нумары шоу-балета "Феерыя", а кульмінацыяй стане начная экскурсія. Дрэс-код адпаведны: строгі касцюм для кавалераў, сукенка (пераважна ў стылі XVIII стагоддзя) і абутак без абцаса для дам, а дадаткова – элегантная маска як сімвал венецыянскага свята.

Калі: 10 студзеня 2026, 19:00
Дзе: Мірскі замак, вул. Чырвонаармейская, 2, г.п. Мір, Карэліцкі раён, Гродзенская вобласць

Фестываль-кірмаш "Берасцейскія сані"-2026

Ужо традыцыйны зімовы фестываль паўднёва-заходняга рэгіёна Беларусі – "Берасцейскія сані" – адбудзецца пяты раз. У папярэднія гады гэта прыгожае студзеньскае свята прымалі Брэст, Баранавічы, Пінск і Кобрын, а першы юбілей плануецца зноў правесці ў абласным цэнтры. Галоўнай пляцоўкай для выступленняў артыстаў і тэатралізаваных паказаў стане набярэжная Францыска Скарыны. У праграме – выставы, інтэрактыўныя пляцоўкі, спартыўныя турніры, фуд-корты, гарадок рамеснікаў, конкурсы, дзіцячыя забаўляльныя пляцоўкі, рэкламныя акцыі.

Калі: 17–18 студзеня 2026
Дзе: набярэжная Францыска Скарыны, Брэст