Падзеі, факты, анонсы

Імянная зорка Юрыя Антонава запалілася на Алеі зорак Летняга амфітэатра ў Віцебску

10 ліпеня, Віцебск /Алеся Пушнякова - БЕЛТА/. Імянную зорку Юрыя Антонава адкрылі на Алеі зорак Летняга амфітэатра, перадае карэспандэнт БЕЛТА.

Новая, 21-я зорка з адлюстраваннем сімвала фестывалю - васілька і імем уладальніка спецыяльнай узнагароды Прэзідэнта Беларусі "Праз мастацтва - да міру і ўзаемаразумення" Юрыя Антонава з'явілася на Плошчы лаўрэатаў каля Летняга амфітэатра. Ён з'яўляецца даўнім сябрам і жаданым госцем Міжнароднага фестывалю мастацтваў "Славянскі базар у Віцебску".

Артыст адзначыў, што такая ацэнка яго творчасці стала прыемным і чаканым падарункам, асабліва на зямлі, якая адкрыла яму дарогу на вялікую сцэну. "Беларусь для мяне гэта другая радзіма. Мая творчая дзейнасць пачалася ў Маладзечне, потым я паехаў у Мінск, дзе быў прыняты ў Белдзяржфілармонію ў якасці артыста. Я ўжо 61 год працую на сцэне. У многім у поспеху маёй творчай дзейнасці адыграла ролю Беларусь", - сказаў спявак, якому ў гэтым годзе споўнілася 80 гадоў.

Дарэчы, Юрый Антонаў прымаў удзел у адкрыцці першага фестывалю "Славянскі базар у Віцебску". Ён добра помніць той форум мастацтваў, куды прыязджалі кіраўнікі трох славянскіх дзяржаў, і мерапрыемства тады яму вельмі спадабалася. "Я веру, што аднойчы мы ўсе сустрэнемся за сяброўскім сталом", - выказаў ён сваё меркаванне.

Артыст расказаў, што з вялікім задавальненнем прыязджае ў Мінск, бываючы ў Беларусі. З вялікай цеплынёй ён успамінае гады, праведзеныя ў Маладзечне, сваіх сяброў і першае каханне.

Ён падзякаваў кіраўніцтву Беларусі і Віцебскай вобласці за арганізацыю фестывалю. "Мяне папрасілі спець старыя песні, якія на слыху ў людзей. Буду старацца для вас", - запэўніў Юрый Антонаў.

версія для друку

зрабіць стартавай

дабавіць у выбранае