Еўрапейскія гульні-2019 у Мінску | Belarus.by
У Беларусь без візы на 30 дзён
Афіцыйны сайт Рэспублікі Беларусь
Год малой радзімы ў Беларусі
Пра Беларусь

Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Пра Беларусь | Спорт | Еўрапейскія гульні-2019 у Мінску

Еўрапейскія гульні-2019 у Мінску


Еўрапейскія гульні праходзяць з 21 па 30 чэрвеня 2019 года ў сталіцы Беларусі – Мінску. У буйнейшым спартыўным форуме кантынента прымаюць удзел больш як 4000 спартсменаў з 50 краін, якія разыграюць 200 камплектаў узнагарод у 15 відах спорту (23 дысцыплінах), а таксама ліцэнзіі на Алімпіяду-2020 у Токіа.

На першых Еўрапейскіх гульнях-2015 у Баку зборная Беларусі паказала высокія рэзультаты, заняўшы ў агульным медальным заліку сёмае месца: нашы спартсмены заваявалі 43 узнагароды (10 залатых, 11 сярэбраных і 22 бронзавыя).

Мінск – сталіца ІІ Еўрапейскіх гульняў

Рашэнне аб перадачы Беларусі права на правядзенне другіх Еўрапейскіх гульняў было прынята 21 кастрычніка 2016 года па выніках галасавання дэлегатаў з 50 краін на 45-м пасяджэнні Генеральнай асамблеі Еўрапейскіх алімпійскіх камітэтаў (ЕАК) у Мінску.

Важкімі аргументамі на карысць беларускай сталіцы сталі развітая спартыўная інфраструктура, унушальны вопыт правядзення міжнародных спаборніцтваў высокага ўзроўню, кваліфікаваныя спецыялісты і, вядома, падтрымка кіраўніка НАК – Прэзідэнта краіны Аляксандра Лукашэнкі.

Як адзначыў прэзідэнт ЕАК Янез Качыянчыч, які адразу пасля афіцыйнага назначэння кіраўніком гэтай уплывовай спартыўнай арганізацыі наведаў Беларусь, Еўрапейскія гульні-2019 паслужаць "добрай падрыхтоўкай да летняй Алімпіяды ў Токіа і дадуць магчымасць з’яднаць дух еўрапейскіх спартсменаў”.
 
Кантракт на правядзенне II Еўрапейскіх гульняў, у якім абазначаны асноўныя прынцыпы форуму, быў падпісаны 1 верасня 2017 года прадстаўнікамі мэрыі Мінска і выканкама ЕАК. У ім зацверджана інфармацыя аб продажы білетаў, акрэдытацыі, прыёме і размяшчэнні гасцей, правядзенні цырымоній адкрыцця і закрыцця.

Даты правядзення II Еўрапейскіх гульняў у Мінску

На пасяджэнні выканкама ЕАК у сталіцы Македоніі Скоп’і 20 мая 2017 года былі зацверджаны тэрміны правядзення II Еўрапейскіх гульняў у Мінску: адкрыццё форуму адбудзецца 21 чэрвеня, а спаборніцтвы пройдуць з 21 па 30 чэрвеня 2019 года. Білеты на II Еўрапейскія гульні паступілі ў продаж 1 снежня 2018 года.

Эстафета II Еўрапейскіх гульняў "Полымя міру"

Эcтафета "Полымя міру" стартавала 3 мая ў Рыме цырымоніяй запальвання агню II Еўрапейскіх гульняў і прадоўжыцца 50 дзён. Кантынентальнае полымя пабывала ў самай высокай кропцы Еўропы – на вяршыні Манблан, а таксама ў Аўстрыі, Славеніі, Венгрыі, Славакіі, Чэхіі і Польшчы. 12 мая факел прыбыў у беларускі Брэст, каб прайсці шлях па 60 населеных пунктах краіны. Даўжыня ўсяго маршруту эстафеты складае 7700 км.

Факеланосцамі выступаюць 450 чалавек: знакамітыя спартсмены, зоркі культуры, навукі, мастацтва, журналісты, палітыкі, грамадскія дзеячы. Фінішам эстафеты "Полымя міру" стане цырымонія запальвання чашы алімпійскага агню на стадыёне "Дынама" ў час урачыстага адкрыцця II Еўрапейскіх гульняў 21 чэрвеня.

Праграма Еўрапейскіх гульняў-2019

Дырэкцыя II Еўрапейскіх гульняў атрымала ад спартыўных федэрацый рэкордную колькасць заявак на ўдзел у форуме – па 43 відах спорту. Аднак арганізатары прынялі рашэнне максімальна выкарыстоўваць ужо існуючую інфраструктуру і праводзіць спаборніцтвы па найбольш масавых і папулярных дысцыплінах.

У праграму Еўрапейскіх гульняў-2019 увайшлі 15 відаў спорту: бадмінтон, баскетбол 3х3, бокс, барацьба (грэка-рымская, вольная, жаночая), веласіпедны спорт (трэк і шасэ), гімнастыка (спартыўная, мастацкая, акрабатыка, аэробіка і скачкі на батуце), веславанне на байдарках і каноэ, дзюдо, каратэ, лёгкая атлетыка, самба, стральба з лука, стральба (кулявая і стэндавая), настольны тэніс і пляжны футбол.

Алімпійскія ліцэнзіі Токіа-2020 разыграюць у 8 відах спорту: веласіпедным спорце, веславанні на байдарках і каноэ, каратэ, лёгкай атлетыцы, стральбе з лука, кулявой і стэндавай стральбе, настольным тэнісе, баскетболе 3х3. Выключэнне склалі гімнастыка і барацьба (адбор пройдзе асобна), а таксама пакуль не уключаныя ў алімпійскую праграму самба і пляжны футбол. Спаборніцтвы па боксе і дзюдо пройдуць у рангу чэмпіянатаў Еўропы.

Адзін з самых відовішчных відаў спорту – лёгкая атлетыка упершыню будзе прадстаўлены на Еўрапейскіх гульнях у новым фармаце: у спаборніцтвах прымуць удзел 24 каманды (у складзе кожнай – больш як 20 чалавек, мужчын і жанчын), якія выступяць у 9 дысцыплінах, найбольш папулярных у гледачоў (бег, скачкі і кіданні). Спаборніцтвы будуць праходзіць па накаўт-сістэме на працягу пяці дзён.

Арэны Еўрапейскіх гульняў-2019

У студзені 2017-га ў Мінску пабывала інспекцыйная камісія на чале са спартыўным дырэктарам ЕАК Пірсам О`Калаганам, якая вывучыла гатоўнасць сталіцы Беларусі да Еўрапейскіх гульняў-2019. Пасля праверкі ўсіх арэн, наведвання атэляў і Студэнцкай вёскі спецыялісты адзначылі 100-працэнтную гатоўнасць да маючага адбыцца форуму.

Ва ўрачыстых мерапрыемствах і спаборніцтвах Еўрапейскіх гульняў-2019 будуць задзейнічаны:

  • спарткомплекс "Мінск-Арэна" (спартыўная і мастацкая гімнастыка, акрабатыка, аэробіка і скачкі на батуце; веласпорт на трэку)
  • стадыён "Дынама" (лёгкая атлетыка; цырымоніі адкрыцця і закрыцця)
     спарткомплекс "Чыжоўка-Арэна" (дзюдо, каратэ)
  • Палац спорту (самба, грэка-рымская, вольная і жаночая барацьба)
  • спартыўна-аздараўленчы комплекс "Алімпійскі" (пляжны футбол, стральба з лука)
  • спартыўна-забаўляльны комплекс Falcon Сlub (бадмінтон)
  • спартыўна-стралковы комплекс Sporting Club (стэндавая стральба)
  • спартыўна-стралковы комплекс імя маршала С.Цімашэнкі (стральба кулявая)
  • Palova Arena (спаборніцтвы па баскетболе 3х3)
  • Палац тэніса (настольны тэніс)
  • спарткомплекс "Уручча" (бокс)
  • вяслярны канал у Заслаўі (веславанне на байдарках і каноэ) 

Сімволіка і талісман Еўрапейскіх гульняў-2019

Афіцыйны дэвіз Еўрапейскіх гульняў-2019 – Bright Year, Bright You ("Яркі год, яркі ты"). Менавіта такі варыянт прадставіла беларуская дэлегацыя 21 мая 2017 года на пасяджэнні выканкама ЕАК у Скоп’і. У рускай версіі таксама выкарыстоўваецца дэвіз "Время ярких побед", а ў беларускай – "Час яскравых перамог".

Ідэяй для стварэння лагатыпа II Еўрапейскіх гульняў стаў лозунг "Ідзі за марай". У яго вобразе ўвасоблена легенда аб пошуку ў летнюю ноч на Івана Купалу папараць-кветкі, што сімвалізуе ажыццяўленне самых запаветных жаданняў. І гэта заклік удзельнікам гульняў-2019 наперакор цяжкасцям ісці за сваёй марай – да запаветнай узнагароды.

Талісманам галоўнай спартыўнай падзеі ў Беларусі ў 2019 годзе стала лісяня Лесік.

Зорныя паслы II Еўрапейскіх гульняў-2019

Місія зорных паслоў – прыцягваць увагу грамадскасці, папулярызаваць і фарміраваць станоўчы імідж маючай адбыцца мультыспартыўнай падзеі ў Беларусі і за яе межамі, папулярызаваць віды спорту, уключаныя ў праграму Еўрапейскіх гульняў-2019. Імі сталі выдатныя асобы ў галіне спорту, мастацтва і культуры.

Ганаровага тытула зорнага пасла II Еўрапейскіх гульняў-2019 удастоены:

  • чатырохразовая алімпійская чэмпіёнка – Герой Беларусі Дар'я Домрачава
  • вядомыя цыркавыя дрэсіроўшчыкі браты Аскольд і Эдгард Запашныя
  • алімпійскі чэмпіён 2008 года па веславанні на байдарках і каноэ Аляксандр Багдановіч
  • чэмпіёнка Еўропы 2018 года ў бегу на марафонскай дыстанцыі Вольга Мазуронак
  • трохразовы алімпійскі чэмпіён па вольнай барацьбе Аляксандр Мядзведзь
  • блогер і тэлевядучая Ганна Бонд
  • піяніст і дырыжор, мастацкі кіраўнік Міжнароднага фестывалю Юрыя Башмета Расціслаў Крымер
  • прадстаўнік Дзіцячага Фонду ААН (ЮНІСЕФ) у Рэспубліцы Беларусь доктар Рашэд Мустафа Сарвар
  • спявачка Ані Лорак
  • "Міс Беларусь-2018", "Міс свету Еўропа-2018" Марыя Васілевіч
  • заслужаны майстар спорту, ўладальнік 5 алімпійскіх медалёў па фехтаванні Аляксандр Раманькоў
  • беларускі эстрадны спявак і кампазітар Руслан Аляхно
  • алімпійскі чэмпіён па фігурным катанні Аляксей Ягудзін
  • пяціразовая алімпійская чэмпіёнка Нэлі Кім

Бязвізавы рэжым у час Еўрапейскіх гульняў-2019

Бязвізавы рэжым з рознымі тэрмінамі знаходжання дзейнічае для грамадзян шэрага краін, якія могуць уязджаць у Беларусь праз любыя пункты пропуску. Акрамя таго, для жыхароў дзяржаў, якія не ўваходзяць у гэты спіс, ёсць магчымасць знаходзіцца ў Беларусі без візы на працягу 30 дзён пры ўмове ўезду і далейшага выезду праз Дзяржаўную граніцу ў Нацыянальным аэрапорце Мінск.

Аднак на час Еўрапейскіх гульняў арганізатары прапануюць яшчэ больш зручныя ўмовы, падобныя да бязвізавага рэжыму ў дні мінскага чэмпіянату свету па хакеі-2014. Удзельнікі, афіцыйныя прадстаўнікі, арганізатары Гульняў і іншыя спецыялісты змогуць скарыстацца правам уезду ў Беларусь без візы пачынаючы з 20 мая 2019 года, а замежныя балельшчыкі – з 10 чэрвеня.

Па працягласці Еўрапейскія гульні ахопліваюць практычна два тыдні, і спецыяльна для ўдзельнікаў і гасцей спартыўнага форуму тэрмін бязвізавага знаходжання прадоўжыцца да 10 ліпеня 2019 года. Пры гэтым замежныя турысты змогуць не толькі падтрымаць сваіх спартсменаў, але і наведаць знакавыя выдатныя мясціны Беларусі.

Для ўсіх турыстаў, якія прыязджаюць у беларускую сталіцу, распрацавана "Карта госця Мінска", якая дае магчымасць наведваць значныя мерапрыемствы і выдатныя мясціны, карыстацца сістэмай скідак і бонусаў у сталічных музеях, гандлёвых цэнтрах, рэстаранах і кафэ. Спецыяльна да Еўрапейскіх гульняў будзе прапанаваны тэматычны варыянт карты госця з прапановамі, асабліва цікавымі спартсменам і балельшчыкам.

Таксама ў продажы ёсць тэматычныя карты-схемы, даведнікі, энцыклапедычныя выданні ў кішэнным варыянце. Беларускія тураператары распрацоўваюць новыя экскурсійныя маршруты з нацыянальным каларытам, разлічаныя на любой густ і бюджэт.

Транспартная інфраструктура Мінска да Еўрапейскіх гульняў-2019

Напярэдадні II Еўрапейскіх гульняў у Мінску абноўлены аўтобусны і тралейбусны паркі, створана цэласная сістэма выдзеленых палос для грамадскага транспарту. У 2018-2019 гг. на сталічных вуліцах з’явілася каля 80 электробусаў, якія зараджаюцца за пяць мінут і дазваляюць праехаць 13 км (пры гэтым эканомія электраэнергіі складае 14%).

Распрацаваны комплексны план транспартнага забеспячэння II Еўрапейскіх гульняў, у стварэнні якога ўлічаны вопыт сталіц папярэдніх Алімпіяд і I Еўрапейскіх гульняў – Пекіна, Лондана, Баку. Згодна з задумай, госці змогуць дабрацца да любога спартыўнага аб’екта за 30 мінут.

Як выглядае сталічны транспарт з сімволікай II Еўрапейскіх гульняў глядзіце тут!

Размяшчэнне ўдзельнікаў і гасцей ІІ Еўрапейскіх гульняў: атэлі і Вёска спартсменаў 

Толькі паводле папярэдніх ацэнак арганізатараў, на Еўрапейскія гульні ў Мінск прыедуць не менш як 30 тысяч турыстаў і каля 10 тысяч гасцей, якія будуць мець непасрэднае дачыненне да мерапрыемства: 4 тыс. спартсменаў, 2 тыс. суддзяў, 1 тыс. прадстаўнікоў прэсы, 3 тыс. – афіцыйныя асобы еўрапейскіх алімпійскіх камітэтаў, віп-персоны, абслуговы персанал.

Мемарандум аб стрымліванні цэн у атэлях у час правядзення Еўрапейскіх гульняў-2019 дасць магчымасць забяспечыць камфортныя ўмовы для гасцей. Бюджэтныя гасцініцы прадугледзелі комплексны пакет паслуг, што ўключае пражыванне, трансфер, арганізацыю харчавання, арэнду футбольных палёў, канькабежнага стадыёна, лядовага катка і веласіпеднага трэка.

У 2014-м годзе многія балельшчыкі чэмпіянату свету па хакеі размясціліся ў фан-вёсцы на праспекце Дзяржынскага. Мінскія ўлады задзейнічаюць яе і ў час Еўрапейскіх гульняў-2019. Аднак на гэты раз мінская Студэнцкая вёска будзе выкарыстоўвацца як Вёска спартсменаў. Тут размесцяцца больш за 6,5 тыс. членаў афіцыйных дэлегацый, удзельнікаў гульняў.

Спецыяльна для гасцей гульняў да снежня 2018 года ў Cтудэнцкай вёсцы з’явіўся самы вялікі – 25-павярховы – інтэрнат, у якім змогуць размясціцца 1800 чалавек (для параўнання – увесь студэнцкі комплекс разлічаны на 8740 чалавек).

Тут таксама пабудаваны спецыяльны павільён для харчавання афіцыйных удзельнікаў спаборніцтваў. Будынак плошчай 5,5 тыс.кв.м разлічаны на 2 тыс. пасадачных месцаў і падзелены на два блокі. У адным з іх размесцяцца абедзенная зала і лінія раздачы харчавання, даўжыня якой каля 60 метраў. Тут будуць прадстаўлены стравы грыль, еўрапейская кухня, піца, паста, нацыянальная беларуская кухня, канфесіянальнае харчаванне (халяльныя і кашэрныя стравы), дыетычныя і вегетарыянскія стравы. Другі блок - "станцыя 24 гадзіны": тут у кругласутачным рэжыме будзе ажыццяўляцца выдача халодных і гарачых напіткаў, закусак. Прадугледжана і меню са страў азіяцкай кухні: міса-супу, локшыны і г.д. Абедзенная зала злучана вытворчым тунэлем з кухняй, часова размешчанай у лядовым палацы (яе плошча – 4,5 тыс.кв.м).

Валанцёры на Еўрапейскіх гульнях-2019

У 2017 годзе стартаваў прыём анкет ад маладых людзей на ўключэнне ў лік валанцёраў, які прадоўжыўся да 1 красавіка 2019 года. Сярод асноўных патрабаванняў да кандыдатаў – веданне замежных моў і спецыфікі розных відаў спорту. Да ліпеня 2018-га – за год да старту Гульняў – было пададзена больш за 9 тысяч заявак, у тым ліку з Амерыкі, Аўстраліі, Мексікі, Егіпта.

Каля 8 тысяч валанцёраў будуць задзейнічаны на 11 спартыўных аб’ектах сталіцы. Графік падрыхтоўкі насычаны: моўныя і арганізацыйна-тэхнічныя праграмы, знаёмства са спецыфікай відаў спорту і нюансамі суправаджэння каманд. Арганізатары распрацавалі для валанцёраў спецыяльны план навучальных мерапрыемстваў.

Еўрапейскія гульні-2019: акрэдытацыя СМІ, інфапартнёры, тэлетрансляцыя

Арганізацыю тэлетрансляцыі мерапрыемстваў і спаборніцкай праграмы Еўрапейскіх гульняў-2019 у Мінску  забяспечыць іспанская кампанія International Sports Broadcasting SL.

За продаж білетаў адказвае кампанія Тicketpro, якая працуе ў тандэме з турыстычным аператарам Еўрапейскіх гульняў-2019РУП "Цэнтркурорт". Нацыянальным партнёрам, які забяспечвае інавацыйныя рашэнні і будаўніцтва тэхнічнай інфраструктуры маючых адбыцца спаборніцтваў, выступае СТАА "Мабільныя ТэлеСістэмы".

У якасці замежнага партнёра цырымоній адкрыцця і закрыцця Гульняў выбрана ізраільская кампанія Kesher-Faktor, якая мае даволі вялікі міжнародны вопыт арганізацыі вялікіх мерапрыемстваў.

Помнікі Вялікай Айчыннай вайны ў Беларусі
Партызанскі летапіс
Еўрапейскія гульні-2019 у Мінску