Нацыянальны мастацкі музей Беларусі | Belarus.by
У Беларусь без візы: на 5 дзён для грамадзян 80 краін
Афіцыйны сайт Рэспублікі Беларусь
Год навукі ў Беларусі
Пра Беларусь

Каляндар падзей у Беларусі
Выдатныя мясціны Беларусі
500 гадоў гісторыі беларускага кнігадрукавання
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Пра Беларусь | Культура | Нацыянальны мастацкі музей

Нацыянальны мастацкі музей Рэспублікі Беларусь

Нацыянальны мастацкі музей Беларусі
Нацыянальны мастацкі музей Беларусі

Нацыянальны мастацкі музей – культурная скарбніца Беларусі, якая валодае адным з буйнейшых збораў ва Усходняй Еўропе. Сёння гэта не толькі музей-галерэя, але і сучасны навукова-адукацыйны цэнтр, арт-пляцоўка для мастакоў.

Калекцыя Нацыянальнага мастацкага музея налічвае больш за 30 тысяч экспанатаў – шэдэўраў беларускага і замежнага мастацтва.

Гісторыя музея

Дзяржаўная карцінная галерэяУ 1939 годзе ў Мінску адкрылася Дзяржаўная карцінная галерэя. Аснову яе калекцыі склалі творы з гістарычных музеяў Мінска, Віцебска, Магілёва і Гомеля, палотны, падораныя Траццякоўскай галерэяй, Рускім музеем, Музеем выяўленчага мастацтва імя Пушкіна, Дзяржаўным Эрмітажам.

Пазней збор папоўнілі рарытэты з сядзіб і замкаў Заходняй Беларусі, у тым ліку і рэзідэнцыі князёў Радзівілаў у Нясвіжы. Сярод іх – слуцкія паясы, французскія габелены XVIII ст., партрэтны жывапіс XVI-XIХ стст.

Аднак у гады Вялікай Айчыннай вайны багатую калекцыю (больш за 2700 экспанатаў) вывезлі з краіны. Лёс многіх шэдэўраў дагэтуль невядомы.

У пасляваенны час калекцыю пачалі збіраць нанава: былі набыты палотны вядомых рускіх мастакоў Барыса Кустодзіева, Васіля Паленава, Карла Брулова, Ісаака Левітана, некаторыя экспанаты перададзены музеямі Масквы і Санкт-Пецярбурга...

У 1957 годзе Дзяржаўны мастацкі музей БССР адкрыўся ў новым велічным будынку, пабудаваным у адпаведнасці з праектам архітэктара Міхаіла Бакланава. Яго ўпрыгожылі скульптуры-алегорыі вядомых майстроў – "Жывапіс", "Скульптура" і "Слава".

Дзяржаўны мастацкі музей БССРБудынак у Мінску стаў адным з першых музейных збудаванняў у гісторыі савецкай архітэктуры. Ён быў адлюстраваны на беларускім грашовым банкноце ўзору 2000 года наміналам Br1000. І напярэдадні дэнамінацыі-2016 Нацыянальны мастацкі музей правёў акцыю "Тысяча, бывай!" – сімвалічнае расставанне з купюрай, на якой можна было ўбачыць і фасад музея, і фрагмент адной з карцін пастаяннай экспазіцыі.

На працягу дзесяцігоддзяў калекцыя музея папаўнялася новымі скарбамі з прыватных калекцый, шэдэўры беларускага жывапісу і графікі, іканапісу з поспехам выстаўляліся ў розных краінах свету.

Сам музей у 1970-1990-я гады ператварыўся ў вялікі комплекс, які аб’яднаў 5 філіялаў, у тым ліку знакамітыя замкі ў Міры і Гальшанах

Новы будынак музея

Да канца ХХ стагоддзя калекцыя музея настолькі павялічылася, што выстаўлялася толькі малая яе частка, таму ўзнікла неабходнасць у новых памяшканнях.

Новы будынак музеяМузей пашырыўся за кошт суседніх будынкаў, дзе размясціліся лекторыі, аддзелы і службы. А ў 2007 годзе пасля грандыёзнай рэканструкцыі адкрыўся новы прыбудаваны корпус.

Аб’яднаўшы гісторыю і сучасны дызайн, архітэктар Віталь Бялянкін увасобіў вобраз музея-"горада пад дахам". Яго інтэр’ер упрыгожылі класічныя калоны і аркі, дэкаратыўная ляпніна, а замест даху з’явіўся шкляны купал.

Плошча будынка – 8902 м². Акрамя экспазіцыі, тут размясціліся запаснікі для захоўвання твораў мастацтва, рэстаўрацыйныя майстэрні з сучасным абсталяваннем, дзе на спецыяльнай экскурсіі можна паназіраць за работай рэстаўратараў.

У новых залах выстаўлены шэдэўры старажытнабеларускага, заходнееўрапейскага, усходняга, рускага і сучаснага беларускага мастацтва.

Нацыянальны мастацкі музей сёння

Нацыянальны мастацкі музей сённяСёння ў НММ Беларусі захоўваецца больш за 30 тысяч экспанатаў, якія складаюць 20 калекцый і 2 зборы – нацыянальнага і сусветнага мастацтва, у тым ліку творы майстроў Заходняй Еўропы і краін Усходу XV-XX стагоддзяў.

Унікальная калекцыя беларускага мастацтва ўключае старадаўні іканапіс, скульптуру, тканіны і разьбу па дрэве, жывапіс XIX стагоддзя, творы дэкаратыўна-прыкладнога мастацтва, прадметы мастацтва XX стагоддзя.

У склад Нацыянальнага мастацкага музея ўваходзяць філіялы:

  • музей "Дом Ваньковічаў. Культура і мастацтва першай паловы ХIХ стагоддзя" ў Мінску;
  • музей беларускага народнага мастацтва ў Раўбічах (Мінскі раён);
  • музей В.К. Бялыніцкага-Бірулі ў Магілёве.

У НММ вядзецца навукова-даследчая і рэстаўрацыйная работа, папаўняюцца бібліятэчныя фонды і электронны каталог для абмену адлюстраваннямі твораў мастацтва з музеямі Беларусі і свету.
 
Дзіцячая творчая майстэрня ў музеіМузей прымае ўдзел у складанні кніг і альбомаў аб мастацтве. У 2011 годзе тут была заснавана серыя "Знакамітыя мастакі Беларусі", прысвечаная майстрам ХIХ-ХХ стст.

Акрамя выставак беларускіх і замежных мастакоў, у музеі праводзяцца лекцыі, інтэрактыўныя туры. На працягу 20 гадоў тут працуе дзіцячая творчая майстэрня.

Сучасны музей – гэта яшчэ і арт-пляцоўка, дзе праходзяць творчыя сустрэчы з мастакамі і мастацтвазнаўцамі, літаратурныя і музычныя вечары, презентацыі кніг і майстар-класы па жывапісе.

"Ноч музеяў" у Нацыянальным мастацкім музеіУ 2013 годзе ў НММ адкрылася арт-кафэ. Яго "адметнасць" – выстаўкі мастакоў, паказы фільмаў аб беларускім мастацтве, выступленні музыкантаў.

Штогод НММ удзельнічае ў міжнароднай акцыі "Ноч музеяў" і не толькі прапануе свабодны доступ да ўсіх экспазіцый, але і здзіўляе наведвальнікаў незвычайнымі праграмамі.

Калекцыя музея пастаянна папаўняецца новымі экспанатамі і дарамі мецэнатаў. Нядаўна ў ёй з’явіліся графічныя работы Марка Шагала, у планах – шэдэўры Фердынанда Рушчыца і іншых беларускіх мастакоў, слуцкі пояс.

Міжнародныя праекты

Маючы багатыя сувязі, Нацыянальны мастацкі музей арганізуе выставачныя праекты з вядучымі музеямі і галерэямі свету – у Беларусі і за мяжой. З апошніх яркіх праектаў у Мінску: 

Музейны квартал у Мінску

Ужо нескалькі гадоў прадаўжаецца работа над стварэннем першага ў Мінску музейнага квартала, цэнтрам якога з’яўляецца менавіта Нацыянальны мастацкі музей.

Макет першага ў Мінску музейнага кварталаПаводле задумы стваральнікаў, квартал аб’яднае цэлы комплекс галерэй і інфраструктуру для адпачынку.

Тут адкрыюцца новыя павільёны з творамі беларускага мастацтва, магазіны карцін і сувеніраў, дзе будуць прадавацца творы сучасных майстроў і копіі работ класікаў, мастацкія альбомы і паштоўкі…

У музейным квартале з’явяцца ўнутраны дворык пад шкляным дахам, парк скульптур, кафэ і арт-рэстаран, дзе можна будзе атрымаць асалоду ад твораў мастацтва і музыкі у жывым выкананні.

Экскурсіі і кошт білета

Білет у Нацыянальны мастацкі музейКошт уваходнага білета ў музей – ад Br2,50 да Br5 (з фота- або відэаздымкамі за дадатковую плату). Бясплатна наведаць музей можна ў апошнюю сераду кожнага месяца.

У музеі праводзяцца лекцыі, групавыя і індывідуальныя экскурсіі ў залах з пастаяннай экспазіцыяй: для групы (5-25 чалавек) – Br10 – Br20. Можна ўзяць аўдыягід на рускай, англійскай або беларускай мовах.

Для школьнікаў, студэнтаў і ўсіх аматараў мастацтва прадугледжаны інтэрактыўныя праграмы.

Уваход у музей – з 11.00 да 18.30, без выхадных дзён.

Як дабрацца?

Нацыянальны мастацкі музей знаходзіцца ў самым цэнтры Мінска, недалёка ад праспекта Незалежнасці. Адрас – вуліца Леніна, 20. Самы зручны спосаб дабрацца – скарыстацца метро (ст.м. Кастрычніцкая, ст. м. Купалаўская). Таксама можна праехаць на аўтобусах нумар 100, 111 да прыпынку "Вуліца Леніна".

Помнікі Вялікай Айчыннай вайны ў Беларусі
У Беларусь без візы: на 5 дзён для грамадзян 80 краін
Платныя дарогі ў Беларусі