На шляху да вялікага квартала: новыя карпусы адкрыліся ў Нацыянальным мастацкім музеі Беларусі
Яшчэ адзін крок зроблены на шляху да стварэння ў самым цэнтры Мінска музейнага квартала. Гэта ідэя зарадзілася ў пачатку 2000-х гадоў, але для яе ўвасаблення спатрэбілася нямала часу. Пасля маштабных будаўніча-рэстаўрацыйных работ 17 снежня 2021-га адкрыліся два новыя будынкі Нацыянальнага мастацкага музея Беларусі. Агульная экспазіцыйная плошчы галоўнай скарбніцы краіны павялічылася на амаль 1000 квадратных метраў! Куратары атрымалі магчымасць увасабляць яшчэ больш праектаў, а жыхары і госці сталіцы – шырокі выбар разнастайных выставак.
Разам з галоўным корпусам НММ будынкі па вул. Карла Маркса, 24 утвараюць утульную прастору і злучаны паміж сабой галерэямі. Гэта вельмі зручна для наведвальнікаў, якія могуць лёгка пераходзіць у выставачныя залы. Чакаецца, што ў музейным дворыку арганізуюць зоны для адпачынку і культурных мерапрыемстваў.
За кошт 14 дадатковых памяшканняў рэстаўрацыйны цэнтр павялічыў плошчу да 1398 м². Яго маштабы ўражваюць: 4 майстэрні па рэстаўрацыі алейнага жывапісу, 4 сектары старажытнабеларускага мастацтва, 4 сектары дэкаратыўна-прыкладнога мастацтва, майстэрня па рэстаўрацыі прадметаў з тканіны, металу, дрэва, фарфору і керамікі, а таксама майстэрні для пакрыцця лакам і для рэстаўрацыі вялікафарматнага жывапісу.
Тут жа размясціліся 8 новых фондасховішчаў, аснашчаных асаблівымі сістэмамі для падтрымання аптымальнага мікраклімату і захоўвання музейных прадметаў і калекцый. Чакаецца, што ў хуткім часе сюды пераедуць калекцыі беларускага, рускага і савецкага жывапісу. Таксама ў новым будынку размясцілася навуковая бібліятэка на 40 тыс. адзінак кніг і перыядычных выданняў з асобным кнігасховішчам, аснашчаным мабільнымі сістэмамі захоўвання, чытальнай залай з камп'ютарызаванымі рабочымі месцамі.
Другі – выставачны – корпус займае плошчу 846 м² і даступны шырокай публіцы. На першым паверсе размясціліся сувенірны магазін і кавярня, на другім – лекторый, дзіцячая арт-студыя і навуковыя аддзелы. Яшчэ вышэй – залы для часовых экспазіцый. Ужо сёння госці могуць азнаёміцца з выставамі "Рух зямлі" і "Выратаваныя мастацкія каштоўнасці", прысвечанымі выдатным майстрам Беларусі.
Паклапаціліся і аб тым, каб музей заставаўся безбар'ерным асяроддзем для наведвальнікаў, якія перамяшчаюцца ў крэсле-калясцы: для іх уваход у корпус абсталяваны пандусам. Унутры будынка размешчаны пад'ёмнік для інвалідаў, два ліфты з гукавым суправаджэннем.
