Транспарт Беларусі
Як перамяшчацца па Беларусі? Колькі каштуе праезд у грамадскім транспарце? Дзе забраніраваць і купіць білеты?
Беларусь – краіна з развітой транспартнай сістэмай, таму адпраўляючыся ў падарожжа без дапамогі турфірмы, вы можаце самастойна распрацаваць маршрут і выбраць найбольш зручны спосаб перамяшчэння.
Чыгуначны транспарт Беларусі
Адзін з самых кафортных і надзейных варыянтаў – паездка па чыгунцы. Маршрутная сетка ўнутры краіны ахоплівае больш як 2100 населеных пунктаў.
Беларуская чыгунка прапануе зручны фармат пасажырскіх перавозак:
-
Гарадскія лініі – у межах Мінска або абласнога цэнтра, а таксама не далей за станцыі ў гарадах-спадарожніках
-
Рэгіянальныя лініі – у межах вобласці або да бліжэйшага горада абласнога падпарадкавання ў суседнім рэгіёне
-
Міжрэгіянальныя лініі – паміж Мінскам і абласнымі цэнтрамі, паміж абласнымі цэнтрамі
-
Міжнародныя лініі – звязваюць Беларусь і іншыя краіны
У залежнасці ад скорасці руху паяздоў, часу спынення ў населеных пунктах рэгіянальныя і міжрэгіянальныя лініі падзяляюцца на бізнес-клас і эканом-клас.
Расклад руху паяздоў па Беларусі вы знойдзеце тут.
Купіць білеты на поезд можна асабіста ў касах на станцыях, а таксама заказаць па тэлефоне або анлайн – з дастаўкай (у Мінску, Гомелі, Магілёве) і без дастаўкі (аформіць у касе на працягу названага аператарам тэрміну).
На ўнутраныя і некаторыя міжнародныя лініі можна аформіць электронны білет, аплаціўшы яго праз Інтэрнэт з дапамогай банкаўскай пластыкавай карткі, сістэм электронных грошай EasyPay і WebMoney. Пры наяўнасці электроннай рэгістрацыі, пры пасадцы ў поезд, дастаткова прад'явіць пашпарт.
Кошт праезду на чыгунцы Беларусі невысокі і вар'іруецца ў залежнасці ад лініі, класу, катэгорыі вагона. Напрыклад, білет з Брэста ў Віцебск – практычна праз усю краіну – на поездзе міжрэгіянальных ліній каштуе:
-
плацкарт – каля Br18 (7-8$)
-
купэ – каля Br25 (9-10$)
У паяздах Беларускай чыгункі аказваюць платныя і бясплатныя паслугі.
Бясплатна вам:
-
даставяць і прыбяруць пасцельную бялізну, а таксама падрыхтуюць пасцель пасажырам, якія маюць патрэбу ў дапамозе (карыстанне камплектам бялізны платнае, калі кошт не ўключаны ў білет)
-
прапануюць настольныя гульні
-
акажуць першасную медыцынскую дапамогу
-
выдадуць рамяні бяспекі
-
прадаставяць даведачную інфармацыю
Курэнне ў вагонах забаронена, акрамя паяздоў міжнародных зносін, дзе для курэння ёсць спецыяльна адведзеныя месцы.
У Беларусі дзейнічае 20 буйных чыгуначных вакзалаў з развітой інфраструктурай і комплексам паслуг для пасажыраў. На станцыях у гарадах і пасёлках вам таксама прапануюць добры сэрвіс. На невялікіх станцыях працуюць білетныя касы і гандлёвыя кіёскі.
Аўтамабільны транспарт Беларусі
Падарожнічаць па Беларусі можна на аўтобусе або маршрутным таксі.
Расклад прыгарадных, міжгародніх і міжнародных рэйсаў, а таксама кошт білетаў і інфармацыю аб наяўнасці месц можна знайсці тут.
Білеты на праезд у аўтобусах міжгародніх і прыгарадных зносін можна набыць анлайн з выкарыстаннем плацежных сістэм WebPay і iPay.
Ва ўсіх гарадах Беларусі дзейнічаюць аўтавакзалы або аўтастанцыі, дзе можна купіць білеты, правесці час у чаканні рэйса, перакусіць.
У Мінску пасажыраў прымаюць аўтавакзал Цэнтральны і аўтастанцыі Паўднёва-Заходняя, Аўтазаводская.
Акрамя аўтаперавозчыкаў сістэмы Міністэрства транспарту і камунікацый, у Беларусі развітая сетка прыватных маршрутных таксі.
Паветраны транспарт Беларусі
Беларусь – адносна невялікая краіна, таму рэгулярных унутраных авіярэйсаў няма. Нацыянальны аэрапорт "Мінск" прымае міжнародныя рэйсы, якія звязваюць беларускую сталіцу з рознымі краінамі свету.
Дзеючыя аэрапорты абласных цэнтраў прымаюць чартарныя самалёты, грузавы транспарт, лайнеры, якія робяць непрадбачаную пасадку. Акрамя таго, з Гомеля, Гродна і Брэста ажыццяўляюцца рэгулярныя авіярэйсы ў расійскі Калінінград.
Водны транспарт Беларусі
У Беларусі 10 рачных партоў, водныя шляхі адкрыты на рэках Днепр, Бярэзіна, Сож, Прыпяць, Заходняя Дзвіна, Нёман, Мухавец, Днепра-Бугскім канале. Аднак пасажырскія перавозкі па вадзе мала запатрабаваны. У перыяд навігацыі некалькі разоў на тыдзень ажыццяўляюцца рэйсы з партоў Рэчыцы, Гомеля, Пінска.
Затое ў цёплы сезон вялікай папулярнасцю карыстаюцца водныя турыстычныя экскурсіі. Прагулкі на цеплаходах арганізуюцца ў:
-
Брэсце (Мухавец)
-
Віцебску (Заходняя Дзвіна)
-
Гродне (Нёман, Аўгустоўскі канал)
-
Гомелі (Сож)
-
Магілёве (Днепр)
-
Бабруйску (Бярэзіна)
-
Мазыры (Прыпяць)
-
Пінску (Прыпяць)
-
Нацыянальным парку "Нарачанскі" (возера Нарач)
-
Нацыянальным парку "Браслаўскія азёры" (возера Дрывяты)
-
на Заслаўскім вадасховішчы (Мінскае мора)
-
на возеры Выганашчанскае
Па знакамітым Аўгустоўскім канале таксама ходзіць рачны трамвай на 12 пасажыраў: ён больш мабільны, чым цеплаход, лягчэй вытрымлівае шлюзаванне, менш шумны.
Да берага Прыпяці ў Тураве прышвартавана плывучая гасцініца "Палессе". Гэты камфартабельны атэль на 8 кают ажыццяўляе рачныя круізы па 6 распрацаваных маршрутах працягласцю да трох сутак. На цеплаходзе-буксіры "Прыпяць" таксама ёсць 5 кают для адпачывальнікаў.
Гарадскі транспарт у Беларусі
У Мінску і іншых гарадах Беларусі вы можаце скарыстацца грамадскім транспартам:
-
аўтобусы (амаль ва ўсіх гарадах краіны, за выключэннем невялікіх, дзе да патрэбнага прыпынку можна пад'ехаць на міжгароднім транспарце)
-
тралейбусы (Мінск, Гомель, Магілёў, Віцебск, Гродна, Брэст, Бабруйск)
-
трамваі (Мінск, Віцебск, Мазыр, Наваполацк)
-
маршрутныя таксі (у Мінску і буйных гарадах)
-
таксі (у Мінску і буйных гарадах)
У Мінску працуе адзіны ў Беларусі метрапалітэн.
Білеты для аплаты праезду ў грамадскім гарадскім транспарце можна набыць у кіёску на прыпынку, у кандуктара або ў вадзіцеля.
Сёння ў Мінску праезд у наземным грамадскім транспарце – аўтобусе, тралейбусе, трамваі – каштуе Br0,95 за адну паездку (пры куплі ў вадзіцеля Br1), у метрапалітэне – Br1. У іншых гарадах краіны, як правіла, кошт праезду меншы.
Для шматразовых паездак па Мінску можна набыць праязны білет на адзін або ўсе віды транспарту тэрмінам на 1 і 3 (турыстычныя), 10, 15, 30 сутак (з даты продажу) або 1 месяц (каляндарны). Таксама вы можаце выбраць праязны на вызначаную колькасць паездак – 3, 7, 10, 25, 30, 40, 60.
Маршруты і расклад руху гарадскога транспарту ў Мінску можна знайсці тут.
Штраф за безбілетны праезд
За безбілетны праезд у грамадскім транспарце ў Беларусі прадугледжаны штрафы:
-
усе віды гарадскога транспарту – ад Br21 да Br42
-
паязды рэгіянальных ліній, прыгарадныя аўтобусы – Br29,4
-
паязды міжрэгіянальных і міжнародных ліній, аўтобусы і маршрутныя таксі міжгародніх зносін – Br42
версія для друку
зрабіць стартавай
дабавіць у выбранае
