Дзелавы турызм у Беларусі

Беларусь – краіна з багатай гісторыяй і культурай, унікальнай прыроднай спадчынай – цікавая не толькі для падарожжаў, звязаных з адпачынкам, аздараўленнем і лячэннем. Сёння гэта і прывабны напрамак дзелавога турызму. У Беларусь прыязджаюць для рэалізацыі канкрэтных праектаў супрацоўніцтва, сустрэч бізнес-колаў і прафесійнай камунікацыі, удзелу ў карпаратыўных мерапрыемствах.

Асноўны паток дзелавога турызму традыцыйна адбываецца ўнутры краіны, аднак з кожным годам беларускі рынак бізнес-падарожжаў, арыентаваны на замежных гасцей, расце.

Устанаўленне кантактаў і наладжванне бізнес-працэсаў з беларускімі партнёрамі, актыўныя рабочыя паездкі для рэалізацыі сумесных праектаў, якія патрабуюць больш цеснага ўзаемадзеяння паміж кампаніямі, абмен прафесійным вопытам, удзел у буйных дзелавых мерапрыемствах міжнароднага фармату, карпаратыўныя туры для супрацоўнікаў – усе магчымасці даступны ў Беларусі.

У ліку пераваг Беларусі для дзелавога турызму:

• геаграфічна і стратэгічна зручнае размяшчэнне ў цэнтры Еўропы;
• прывабны бізнес-клімат і шырокая сістэма прэферэнцыйных рэжымаў для партнёраў;
• вялікая колькасць уласна беларускіх кампаній і брэндаў, якія ўваходзяць у топ лідараў еўрапейскага і сусветнага ўзроўняў;
• высокі прафесійна-кадравы патэнцыял краіны;
• сучасная інфраструктура (шырокі выбар канферэнц-залаў, выставачных цэнтраў і атэляў, аснашчаных усім неабходным для правядзення мерапрыемстваў рознага ўзроўню);
• канкурэнтаздольныя цэны на пражыванне, харчаванне і арганізацыю мерапрыемстваў (што дазваляе кампаніям аптымізаваць расходы);
• камфортныя бязвізавыя рэжымы для грамадзян дзясяткаў дзяржаў.

Цэнтрамі актыўнага дзелавога жыцця і найбольш маштабнымі платформамі бізнес-камунікацыі ў Беларусі сёння з'яўляюцца:

• Індустрыяльны парк "Вялікі камень" – буйнейшы праект кітайска-беларускага супрацоўніцтва, адкрыты для рэзідэнтаў з усяго свету, сучасны экагорад з акцэнтам на высокатэхналагічныя і канкурэнтаздольныя інавацыйныя вытворчасці з высокім экспартным патэнцыялам;
• Парк высокіх тэхналогій – адзін з буйнейшых кластараў ІТ і высокіх тэхналогій у Цэнтральнай і Усходняй Еўропе;
• свабодныя эканамічныя зоны (СЭЗ) і іншыя тэрыторыі з устаноўленымі прэферэнцыйнымі рэжымамі, якія прапануюць найбольш выгадныя ўмовы вядзення бізнесу.

Кропкамі ўваходу ў Беларусь для патэнцыяльных інвестараў, прадстаўнікоў бізнесу, зацікаўленых у партнёрстве, служаць:

• Нацыянальнае агенцтва інвестыцый і прыватызацыі;
• адміністрацыі свабодных эканамічных зон і індустрыяльнага парка "Вялікі камень";
• Беларуская гандлёва-прамысловая палата;
• Нацыянальны цэнтр маркетынгу і кан'юнктуры цэн;
• Беларуская ўніверсальная таварная біржа;
• цэнтры стандартызацыі і сертыфікацыі;
• суб'екты інавацыйнай інфраструктуры (навукова-тэхналагічныя паркі, цэнтры трансферу тэхналогій, венчурныя арганізацыі), а таксама суб'екты падтрымкі малога і сярэдняга прадпрымальніцтва;
• рэгіянальныя агенцтвы развіцця інвестыцый, страхавыя, юрыдычныя і кансалтынгавыя кампаніі, уключаючы міжнародныя.

Сёння ў Мінску будуецца Міжнародны фінансавы цэнтр, які павінен стаць асаблівай эканамічнай зонай для бізнесу ў Беларусі, на прасторы СНД і Еўропы, буйным кластарам прыцягнення капіталу з усяго свету. Кампанія-забудоўшчык плануе завяршыць работы ў 2027 годзе. Згодна з праектам, асноўная вежа Міжнароднага фінансавага цэнтра будзе адным з самых высокіх небаскробаў Мінска – каля 180 метраў і 42 узроўні. На верхнім паверсе размесціцца аглядная пляцоўка. Будучы МФЦ у Мінску пазіцыянуецца як комплекс самых сучасных будынкаў фармату бізнес-апартаментаў, і, зразумела, у перспектыве стане адной з буйных лакацый дзелавога турызму.

Першынство па вышыні будынкаў у сталіцы і ў цэлым у Беларусі зойме небаскроб шматфункцыянальнага комплексу "Газпрам цэнтр" (189 м), які таксама павінен быць завершаны ў 2027 годзе. Згодна з задумай, комплекс будзе не толькі штаб-кватэрай кампаній Групы "Газпрам" у Беларусі, але таксама і цэнтрам дзелавой актыўнасці, камфортным месцам для вядзення бізнесу. Ён аб'яднае адміністрацыйна-офісныя будынкі, гасцінічны комплекс з кангрэс-цэнтрам, спартыўны цэнтр, дзіцячы вучэбна-развіваючы цэнтр, медыцынскі цэнтр, гандлёвую вуліцу, амфітэатр, зону адпачынку, паркінгі.

Сфера дзелавога турызму і MICE-індустрыя (Meetings, Incentives, Conferences, Exhibitions/Event) у Беларусі, як і ва ўсім свеце, значна пацярпелі ў час пандэміі 2020 года з-за масавай адмены мерапрыемстваў, пераходу вялікага аб'ёму камунікацый у анлайн. Але сёння бізнес-паездкі і асабістыя кантакты ўсё больш запатрабаваны, хоць трэнд на анлайн-мерапрыемствы менавіта ў дзелавой камунікацыі захаваецца.

Напрыклад, з ажыўленнем рынку ў пасляпандэмійныя гады Мінск стаў адным з папулярных напрамкаў для выязных карпаратыўных мерапрыемстваў сярод расійскіх кампаній. У Беларусі арганізуюцца сустрэчы розных фарматаў: цімбілдынгі, карпаратывы, стратэгічныя сесіі і інш.

У 2022 годзе Нацыянальнае агенцтва па турызме Беларусі распрацавала каталог па MICE-турызме, у якім змешчаны поўны пералік аб'ектаў гасцінічнай і іншай інфраструктуры, прызначанай для дзелавых гасцей. Каталог пастаянна абнаўляецца, і кліенты, зацікаўленыя ў выбары пляцоўкі для правядзення мерапрыемства, могуць выбраць падыходзячую лакацыю.

Акрамя таго, цяпер у Беларусі вядзецца работа па стварэнні нацыянальнага кангрэс-бюро – адзінага цэнтра для замежных арганізатараў, якія зацікаўлены ў правядзенні мерапрыемстваў дзелавога фармату ў Беларусі. Плануецца, што тут можна будзе атрымаць поўны пакет паслуг ад выбару пляцоўкі, тэндараў кампаній, вырашэння комплексу пытанняў па сустрэчы, размяшчэнні, трансферах, кейтэрынгу, экскурсіях і да т.п., да пошуку спікераў па тэмах, якія цікавяць, і запрашэння гасцей.

У насычаным рабочым графіку дзелавым гасцям Беларусі варта знайсці час для больш блізкага знаёмства з краінай – атрымаць асалоду ад багатай культуры і маляўнічай прыроды, наведаць выдатныя мясціны, у тым ліку жамчужыны са Спіса Сусветнай спадчыны ЮНЕСКА. Турыстычныя інфармацыйныя цэнтры і спецыялізаваныя кампаніі прапануюць шырокі спектр паслуг па арганізацыі мерапрыемстваў, уключаючы браніраванне атэляў, трансфер, забавы. Дзелавую праграму можа дапоўніць вялікі пералік магчымасцей: экскурсіі, анімацыйныя праграмы, актыўны адпачынак, гастратуры і да т.п.

Дзелавыя мерапрыемствы ў Беларусі

У Беларусі вельмі насычанае дзелавое жыццё. У краіне праходзіць вялікая колькасць мерапрыемстваў рознага ўзроўню і маштабу: канферэнцыі, кангрэсы, бізнес-форумы, выстаўкі, сустрэчы бізнес-колаў у рамках дзяржаўных, афіцыйных і рабочых візітаў... У апошнія гады падобная актыўнасць звязана ў тым ліку і з неабходнасцю пераадольваць санкцыйныя бар'еры, устанаўліваць новыя партнёрскія сувязі і выбудоўваць лагістычныя ланцужкі.

Штогадовы каляндар міжнародных выставак і буйных дзелавых мерапрыемстваў па розных тэмах, напрамках і галінах эканомікі налічвае дзясяткі мерапрыемстваў у сталіцы і рэгіёнах.

У ліку асноўных і самых буйных выставак Беларусі:

• Мінская міжнародная кніжная выстаўка-кірмаш
• Міжнародная спецыялізаваная выстаўка-кірмаш індустрыі прыгажосці і здароўя "ІНТЭРСТЫЛЬ"
• Міжнародная спецыялізаваная выстаўка "Машынабудаванне"
• Міжнародная спецыялізаваная выстаўка "Металаапрацоўка"
• Міжнародная выстаўка-кірмаш турысцкіх паслуг "Адпачынак"
• Міжнародны медыцынскі форум "Ахова здароўя Беларусі" і Міжнародная спецыялізаваная выстаўка "Ахова здароўя" (BELARUSMEDICA)
• БЕЛАРУСКІ АГРАПРАМЫСЛОВЫ ТЫДЗЕНЬ: Міжнародная спецыялізаваная выстаўка "БЕЛАГРА", Міжнародныя спецыялізаваныя выстаўкі "БЕЛФЕРМА. БЕЛПРАДУКТ. БІЯГАЗ.", Міжнародная спецыялізаваная выстаўка "ПРАДМАШ.ХОЛАД.УПАК.", Міжнародная спецыялізаваная выстаўка "ХАРЧОВАЯ ІНДУСТРЫЯ"
• Міжнародная спецыялізаваная выстаўка лясной і дрэваапрацоўчай прамысловасці "Лесдрэўтэх"
• Міжнародная архітэктурна-будаўнічая выстаўка BUDEXPO
• Міжнародная спецыялізаваная выстаўка тэхналогій і інавацый у прамысловасці "ТэхІнаПрам"
• Міжнародная спецыялізаваная выстаўка хімічнай і нафтагазавай прамысловасці і навукі "Хімія. Нафта і газ"
• Міжнародная выстаўка па аптовым продажы тавараў лёгкай прамысловасці BTI (BelTexIndustry)
• БЕЛАРУСКІ ЭНЕРГЕТЫЧНЫ І ЭКАЛАГІЧНЫ ФОРУМ: Міжнародная спецыялізаваная выстаўка "Энергетыка. Экалогія. Энергазберажэнне. Электра" (ENERGYEXPO), спецыялізаваныя раздзелы "Тэхналогіі для нафтахімічнай галіны" (OIL&GAS TECHNOLOGIES), "АТАМЭКСПА – БЕЛАРУСЬ", "Водныя і паветраныя тэхналогіі", "ЭКСПАСВЯТЛО ЭКСПАГОРАД", Спецыялізаваная выстаўка "Інавацыйныя прамысловыя тэхналогіі" (GREEN INDUSTRY), Салон электрычнага транспарту E-TRANS
• Міжнародная спецыялізаваная выстаўка "Дрэваапрацоўка"
• Міжнародная спецыялізаваная аптовая выстаўка-кірмаш PRODEXPO

Вядомасць далёка за межамі Беларусі заваяваў праводзімы ў Мінску Міжнародны ІКТ форум "ТІБО" – унікальная пляцоўка для абмену перадавым міжнародным вопытам, генерацыі інавацыйных ведаў і абмеркавання механізмаў укаранення найноўшых тэхналагічных трэндаў у розныя сектары эканомікі, сацыяльную сферу і сістэму дзяржаўнага кіравання. Штогод мерапрыемства збірае тысячы ўдзельнікаў з Беларусі і замежжа. У яго праграме – выстаўка, якая прадстаўляе інавацыйныя распрацоўкі ў сферы інфармацыйных тэхналогій, а таксама магчымасці іх эфектыўнага прымянення ў розных сферах дзейнасці, шэраг дзелавых мерапрыемстваў, конкурс "Інтэрнэт-прэмія "ТІБО".

Сёння буйнейшай пляцоўкай Беларусі для правядзення маштабных выставак, кангрэсна-дзелавых мерапрыемстваў, форумаў, канферэнцый, з'ездаў з'яўляецца Мінскі міжнародны выставачны цэнтр, які адкрыўся ў канцы 2024 года.

Гэты сучасны комплекс не мае аналагаў у краіне па магчымасцях трансфармацыі, інавацыйнасці, гібкасці і мабільнасці. Мінскі міжнародны выставачны цэнтр займае тэрыторыю 22 га, агульная плошча будынка – 37 тыс. кв.м. Унутры знаходзяцца дзве вялікія залы плошчай 6 тыс. кв.м і 8,6 тыс. кв.м і вышынёй столі 14 м, што дазваляе праводзіць як невялікія прэзентацыі, так і маштабныя мерапрыемствы. Акрамя шматфункцыянальных памяшканняў прадугледжаны кангрэс-хол, канферэнц-залы, абсталяваныя па сучасных стандартах выставачных комплексаў, вялікі рэстаран, VIP-зона для прыёму гасцей высокага рангу.

Мінскі міжнародны выставачны цэнтр здольны прыняць да 15 тысяч чалавек у дзень. Комплекс размешчаны ў сучасным жылым мікрараёне сталіцы "Паўночны бераг" побач з Мінскай кальцавой аўтадарогай і гарманічна ўпісваецца ў гарадскую інфраструктуру. Паводле задумы архітэктараў, зроблена адсылка да аднаго з самых пазнаваемых сімвалаў краіны – бусла, у аснове канцэпцыі – вобраз крылаў птушкі ў палёце. Фасад упрыгожаны нацыянальным арнаментам.

Першым праектам на пляцоўцы новага цэнтра ў канцы снежня 2024 года стала выстаўка дасягненняў суверэннай Беларусі "Мая Беларусь". За месяц работы яе наведалі больш за 400 тыс. чалавек. Вясной 2025 года наведвальнікаў чакае маштабны выставачны праект, прысвечаны 80-годдзю Перамогі.

Візы і бязвізавыя рэжымы для дзелавых паездак у Беларусь

Грамадзяне дзясяткаў дзяржаў свету могуць скарыстацца перавагамі ўстаноўленых у Беларусі бязвізавых рэжымаў, даступных у тым ліку і для дзелавога турызму, калі гэта ўзгадняецца з тэрмінамі знаходжання і іншымі ўмовамі.

У іншых выпадках неабходна атрымаць візу ў Беларусь, выбраўшы найбольш падыходзячы тып з улікам частаты візітаў.

Зручным інструментам для арганізацыі паездак у Беларусь з'яўляецца электронная віза. Такая опцыя даступна ўладальнікам звычайных пашпартоў 67 дзяржаў, у тым ліку ЗША, Канады, дзяржаў ЕС, Аўстраліі, Новай Зеландыі, Японіі, Вялікабрытаніі і іншых краін.

Без віз у Беларусь (да 180 дзён) могуць уязджаць інвестары і іншыя асобы па спісах, складзеных адміністрацыяй індустрыяльнага парка "Вялікі камень". Акрамя таго, дэкрэтам №8 "Аб развіцці лічбавай эканомікі" ўстаноўлены бязвізавы парадак уезду для замежных грамадзян, якія наймаюцца на работу рэзідэнтамі Парка высокіх тэхналогій, а таксама для заснавальнікаў рэзідэнтаў ПВТ.

версія для друку

зрабіць стартавай

дабавіць у выбранае