Свята Купалле "Александрыя збірае сяброў"
У Беларусь без візы на 30 дзён
Афіцыйны сайт Рэспублікі Беларусь
Выбары Прэзідэнта Рэспублікі Беларусь 9 жніўня 2020 года
Турызм

Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Турызм | Этнатурызм | Свята Купалле "Александрыя збірае сяброў"

Свята Купалле "Александрыя збірае сяброў"


Ахутанае міфамі і легендамі, старажытнае свята Купалле беларусы любяць і беражліва захоўваюць ужо многія стагоддзі. Кожны год у канцы чэрвеня і пачатку ліпеня па ўсёй краіне яго адзначаюць прыгожымі гуляннямі – плятуць купальскія вянкі і загадваюць жаданні, запальваюць вогнішчы, спяваюць песні і шукаюць таямнічую папараць-кветку…

А самай вялікай святочнай пляцоўкай, дзе Купалле праходзіць з міжнародным размахам, у сучаснай Беларусі стаў аграгарадок Александрыя. У Шклоўскі раён Магілёўскай вобласці з’язджаюцца тысячы гасцей, каб у адну з самых кароткіх летніх начэй убачыць самае яркае дзейства на маляўнічым беразе "ракі дружбы" – Дняпра.

Александрыя "збірае сяброў" не толькі з усёй Беларусі, але і краін-суседак – Расіі і Украіны. Тры ўсходнеславянскія народы разам святкуюць Купалле вось ужо амаль 10 гадоў: першы маштабны фестываль адбыўся ў 2010 годзе, а ў 2011-м на ім пабывалі ўдзельнікі са Смаленскай і Кіеўскай абласцей. Традыцыя замацавалася, і з кожным годам да гаспадароў-беларусаў, расіян і ўкраінцаў далучаецца ўсё больш сяброў і з іншых краін.

Месца правядзення таксама знакавае. Са старажытных часоў рака Днепр аб’ядноўвала тры ўсходнеславянскія народы, была артэрыяй знакамітага шляху "з варагаў у грэкі", які звязваў лёсы людзей, гарады і дзяржавы.

Сёння мост, побач з якім праходзіць фестываль, злучае два раёны і дзве вобласці Беларусі – Шклоўскі на Магілёўшчыне і Аршанскі на Віцебшчыне. Ён звязвае гарадскі пасёлак Копысь і Александрыю – малую радзіму Прэзідэнта краіны. Аляксандр Лукашэнка падтрымаў ідэю правядзення свята братэрскіх народаў, якіх аб’ядноўваюць агульныя традыцыі, гістарычныя і культурныя падзеі.

Купалле ў Александрыі стала сапраўдным культурным брэндам Беларусі. І калі першае свята на Магілёўшчыне сабрала 3 тысячы чалавек, то ў 2018 годзе на фестывалі пабывала больш за 110 тысяч гасцей, у тым ліку з Літвы, Латвіі, Эстоніі, Польшчы і Германіі.

Расце і тэрыторыя свята, а разам з ёю – калейдаскоп купальскіх падзей. Гэта і народныя забавы – карагоды, скачкі праз вогнішча, пляценне вянкоў, пошук папараць-кветкi, і "горад майстроў", і маштабныя выстаўкі-кірмашы, атракцыёны, майстар-класы, конкурсы.

Кульмінацыяй свята нязменна становіцца гала-канцэрт. На сцэне ў Александрыі пабывалі такія замежныя і беларускія зоркі, як Аляксандр Буйноў, Ніна Шарубіна, Вера Брэжнева, Таісія Павалій, Ціна Караль, Ігар Карнялюк, Алёна Ланская, Аляксандр Саладуха, Сяргей Трафімаў, Іскуі Абалян, Іна Афанасьева і многія іншыя.

Гісторыя фестывалю

Сваю гісторыю Купалле ў Александрыі як маштабны фэст пачынае з 2010 года. Свята наведаў кіраўнік дзяржавы Аляксандр Лукашэнка і, пасля знаёмства з фестывальнымі падворкамі, адзначыў, што прыемна ўражаны ўвагай да свята – на мерапрыемства з’ехаліся госці з навакольных вёсак, а таксама з Оршы, Шклова, Магілёва і Мінска.

Аднаму з паўнапраўных "герояў" Купалля ў Александрыі – Дняпру, было прысвечана свята 2011 года. На гала-канцэрце ўпершыню выступілі замежныя артысты: у "Купаллі над Дняпром" прымалі ўдзел госці з Расіі і Украіны.

На свяце-2012 экспазіцыя "Горада майстроў" разгарнулася на беразе Дняпра ў выглядзе знакамітага купальскага сімвала – сонца, прамянямі якога сталі вуліцы рамеснікаў з трох краін. Таксама ўпершыню была праведзена шырокая дзелавая праграма – пасяджэнне Асацыяцыі гандлёва-прамысловых палат краін Прыдняпроўя, сустрэчы бізнес-колаў Беларусі, Расійскай Федэрацыі і Украіны, работа выставачнага павільёна.

У 2013 годзе на Купалле ў Александрыі былі прэзентаваны новыя праекты, прайшлі фестывалі лёну, квасу, піва, майстар-класы ўдзельнікаў міжнароднага пленэру па кераміцы "Арт-жыжаль", выстаўка "Археалагічныя знаходкі Верхняга Падняпроўя"…

Першы юбілей свята – у 2014 годзе – аб’яднаў тры маштабныя кірмашы: Ніжагародскі (Расія), Сарачынскі (Украіна) і Александрыйскі (Беларусь). Асноўнае дзейства разгарнулася на тэатралізаванай пляцоўцы "Гасцёўня бульбаша" ў стылізаванай беларускай хаце, дзе гасцей здзіўлялі незвычайнымі забавамі і частавалі дзясяткамі нацыянальных страў з бульбы.

У 2015 годзе на фестывальнай сцэне ўпершыню прадставілі мюзікл Максіма Сокала "Папараць-кветка". Пасля яркага дэбюту пастаноўка адправілася пакараць гарады Беларусі. Праводзіць тэатралізаваныя паказы стала яшчэ адной добрай традыцыяй Купалля ў Александрыі.

У купальскі "Горад дружбы" ў 2016 годзе на Мінскую, Маскоўскую і Кіеўскую "вуліцы" прыбылі госці з краін-суседак, каб прадставіць сваю культуру, пачаставаць стравамі нацыянальнай кухні, стварыць каларытную атмасферу вясёлага славянскага кірмашу. Акрамя таго, упершыню была арганізавана экскурсія па галоўных лакацыях Купалля. А пасля "Александрыйскай вандроўкi" госці з задавальненнем назіралі, як здзяйсняецца "Купальская казка".

У 2017 годзе свята ў Александрыі ўжо ў статусе міжнароднага фестывалю прадставіла гледачам эстрадна-цыркавую пастаноўку "Купальскі сон" з удзелам калектываў з Расіі, Украіны, Літвы, Латвіі, Эстоніі і Польшчы.

Кульмінацыяй свята ў 2018 годзе стаў мюзікл "Малая радзіма", другая ж частка фестывалю была прысвечана Дням культуры Украіны ў Беларусі. Гасцей забаўлялі на Сарачынскім кірмашы, частавалі баршчом і галушкамі, паказвалі коннае тэатралізаванае шоу "Кіеўская Русь".

Купальскі фестываль "Александрыя збірае сяброў "-2019

Галоўнай тэмай юбілейнага свята Купалле ў Александрыі стала трохгоддзе малой радзімы. На працягу двух дзён – 6 і 7 ліпеня – на беразе Дняпра праходзілі народныя гулянні. Удзельнікі з 7 краін – Беларусі, Расіі, Украіны, Эстоніі, Літвы, Латвіі і Польшчы – выступалі на сцэне і паказвалі майстэрства на выстаўцы-кірмашы.

Для гасцей свята былі абсталяваны забаўляльныя пляцоўкі: "Творчасць маладых" з музычна-гульнявой праграмай "Казка пра чароўную кветку", канцэртамі маладзёжных калектываў і квестамі; зона цыркавых выступленняў; варкаўт-лакацыя; атракцыёны для самых юных наведвальнікаў Купалля.
 
У насычанай праграме фестывалю было і "Свята квасу" з прэзентацыяй брэндавага напітку свята, прыгатаванага па ўнікальным рэцэпце, "Кніжны кірмаш" і "Друкарскі двор", канцэрты і дыскатэкі.
 
Кульмінацыяй Купалля ў Александрыі-2019 стаў гала-канцэрт "Зроблена ў Беларусі", у якім прынялі ўдзел зоркі беларускай і замежнай эстрады – Юлія Быкава, Ціна Караль, Аляксандр Саладуха, Алёна Ланская, Леў Лешчанка, Анатоль Ярмоленка…

Па традыцыі на Купалле ў свае родныя мясціны прыехаў і Прэзідэнт Беларусі. "Мы тут з чыстым сэрцам прапануем кожнаму госцю свае самыя каштоўныя скарбы – культурныя, духоўныя, рамесныя і кулінарныя. І дапаўняем іх знакамітай беларускай гасціннасцю, якой нідзе ў свеце не знойдзеш. Я гэта кажу не таму, што я тут і гэта мая малая радзіма. Я наведаў усе куткі свету за гэтыя гады, і няма такога гасціннага народа, як беларусы. Гэта наш брэнд, наша  адметнасць, – сказаў Аляксандр Лукашэнка. – Упэўнены: нашы сустрэчы павінны прадаўжацца!"

"Александрыя збірае сяброў"-2020: упершыню пад патранатам ЮНЕСКА

Штогадовае свята "Купалле" ("Александрыя збірае сяброў") на беразе Дняпра ў аграгарадку Александрыя Шклоўскага раёна адбудзецца 11-12 ліпеня. У гэтым годзе ён упершыню пройдзе пад патранатам ЮНЕСКА.

За 10 гадоў фестываль у Александрыі стаў брэндам краіны. Ён прыцягвае шматлікіх гасцей не толькі з Беларусі, але і з Расіі, Украіны, Польшчы, Літвы, Латвіі, Эстоніі і іншых краін свету. У мінулым годзе свята наведалі больш за 65 тысяч чалавек.

Сёлета на свяце ў Александрыі ўсе раёны Беларусі і горад Мінск прадставяць свае экспазіцыйна-тэматычныя падворкі, дзе госці змогуць атрымаць задавальненне ад брэндавых фестываляў, творчых конкурсаў і пленэраў, іншых мерапрыемстваў, якія адлюстроўваюць унікальны вобраз кожнай вобласці ў краіне.

У першы дзень фестывалю будзе працаваць экскурсійны маршрут па тэматычных пляцоўках. Госці змогуць наведаць выстаўку прадукцыі Мінскага трактарнага завода, выстаўку-продаж хлебабулачных вырабаў і свята квасу, маладзёжную экспазіцыю "Калідор эпох", "Александрыйскі кірмаш" з купальскімі падворкамі. Прыедуць у Александрыю і фіналісты рэспубліканскага сямейнага сельскагаспадарчага конкурсу "Уладар сяла".

У час "Свята кнігі" можна будзе азнаёміцца з нацыянальнай літаратурнай спадчынай. Будзе прэзентавана праграма, прысвечаная Дню беларускага пісьменства, які ў гэтым годзе пройдзе ў Бялынічах 6 верасня.

Разгорнецца на пляцоўцы фестывалю цырк-шапіто. Недалёка ад шатра гасцям прапануюць паглядзець разнастайныя шоу і эстрадна-цыркавыя паказы.

Прадэманструе сваё майстэрства вакальны ансамбль "Весялуха" Магілёўскай абласной філармоніі. Адбудзецца паказ новых ільняных калекцый адзення  беларускіх вытворцаў. Маленькія госці "Купалля" змогуць наведаць дзіцячую дыскатэку, дзе выступяць творчыя калектывы, удзельнікі тэлешоу "Голас. Дзеці" з Магілёўскай вобласці, клоўны і аніматары.

Урачыстая цырымонія адкрыцця рэспубліканскага свята пройдзе ў 17.00. Следам за ёй – эстрадна-забаўляльная праграма з удзелам артыстаў Магілёўскай абласной філармоніі. Увечары ўзнагародзяць пераможцаў і ўдзельнікаў праекта "Уладар сяла". Выступіць з канцэртам заслужаны калектыў Беларусі – аркестр народных інструментаў імя Л.Л.Іванова з удзелам беларускай групы The Feedback. Адначасова пройдуць дэманстрацыйныя палёты самалётаў і парашутыстаў Магілёўскага аэраклуба ДТСААФ імя А.М.Кулагіна.

Гала-канцэрт "Мая Александрыя" пачнецца на галоўнай пляцоўцы ў 21.30. Пасля яго завяршэння гасцей чакае маляўнічы феерверк. Прадоўжацца гулянні маладзёжнай дыскатэкай з удзелам Івана Вабішчэвіча, артыстаў Магілёўскай абласной філармоніі і вядучых дыджэяў краіны.

У другі дзень фестывалю пройдзе ўрачыстая цырымонія ўзнагароджвання перадавікоў аграпрамысловага комплексу Магілёўшчыны ў суправаджэнні аркестра народных інструментаў імя Л.Л.Іванова, выступіць ансамбль "Песняры". У гэты ж час пачнецца свята цырка. Запланаваны канцэрт заслужанага калектыву Беларусі ансамбля песні і танца "Медуніца".

Помнікі Вялікай Айчыннай вайны ў Беларусі
Партызанскі летапіс