Выбары дэпутатаў Палаты прадстаўнікоў Нацыянальнага сходу Рэспублікі Беларусь

Сесія Палаты прадстаўнікоў Нацыянальнага сходу Рэспублікі Беларусь, 2010

Палата прадстаўнікоў у складзе 110 дэпутатаў выбіраецца на чатыры гады.

Выбары дэпутатаў Палаты прадстаўнікоў праводзяцца па аднамандатных выбарчых акругах. Кандыдат у дэпутаты можа балаціравацца толькі па адной выбарчай акрузе.

Тэрміны правядзення выбараў у Палату прадстаўнікоў Нацыянальнага сходу Рэспублікі Беларусь

Выбары новага складу Палаты прадстаўнікоў назначаюцца не пазней як за чатыры месяцы і праводзяцца не пазней як за 30 дзён да заканчэння паўнамоцтваў дэпутатаў дзеючага складу.

Патрабаванні да кандыдатаў у дэпутаты Палаты прадстаўнікоў Нацыянальнага сходу Рэспублікі Беларусь

Дэпутатам Палаты прадстаўнікоў можа быць грамадзянін Рэспублікі Беларусь, які дасягнуў 21 года, пастаянна пражывае ў Рэспубліцы Беларусь, не мае судзімасці.

Вылучэнне кандыдатаў у дэпутаты Палаты прадстаўнікоў Нацыянальнага сходу Рэспублікі Беларусь

Кандыдаты ў дэпутаты вылучаюцца палітычнымі партыямі (зарэгістраванымі Міністэрствам юстыцыі Рэспублікі Беларусь не пазней як за шэсць месяцаў да назначэння выбараў), а таксама грамадзянамі (на сходах па месцы работы або шляхам збору подпісаў).

Вылучэнне кандыдатаў у дэпутаты пачынаецца за 70 дзён і заканчваецца за 40 дзён да выбараў.

Вылучэнне кандыдатаў у дэпутаты Палаты прадстаўнікоў ад палітычных партый ажыццяўляецца іх вышэйшымі органамі.

Вылучэнне кандыдатаў у дэпутаты Палаты прадстаўнікоў можа адбывацца на сходах выбаршчыкаў па месцы работы, пры ўмове, што там працуе не менш як 300 чалавек і ў сходзе ўдзельнічае не менш як палова працуючых.

Вылучэнне кандыдата ў дэпутаты Палаты прадстаўнікоў шляхам збору подпісаў выбаршчыкаў ажыццяўляецца ініцыятыўнай групай кандыдата ў колькасці не менш як 10 чалавек. Неабходна сабраць не менш як 1000 подпісаў у падтрымку кандыдата ад выбаршчыкаў, якія пражываюць на тэрыторыі выбарчай акругі.

Рэгістрацыя кандыдатаў у дэпутаты Палаты прадстаўнікоў Нацыянальнага сходу Рэспублікі Беларусь

Рашэнне аб рэгістрацыі кандыдата ў дэпутаты Палаты прадстаўнікоў прымае акруговая выбарчая камісія па выніках праверкі дакладнасці інфармацыі, што змяшчаецца ў дакументах аб вылучэнні.

Падвядзенне вынікаў выбараў дэпутата Палаты прадстаўнікоў Нацыянальнага сходу Рэспублікі Беларусь

Выбраным у першым туры выбараў па выбарчай акрузе лічыцца кандыдат у дэпутаты Палаты прадстаўнікоў, які атрымаў больш за палову галасоў выбаршчыкаў, якія прынялі ўдзел у галасаванні, калі выбары былі прызнаны адбыўшыміся.

Выбары прызнаюцца адбыўшыміся, калі ў галасаванні прыняла ўдзел больш як палова выбаршчыкаў акругі, уключаных у спісы грамадзян, якія маюць права ўдзельнічаць у выбарах.

Калі ні адзін з кандыдатаў у дэпутаты Палаты прадстаўнікоў не набраў неабходнай колькасці галасоў, то не пазней як у двухтыднёвы тэрмін па рашэнню акруговай выбарчай камісіі праводзіцца ў выбарчай акрузе другі тур галасавання па двух кандыдатах у дэпутаты, якія атрымалі найбольшую колькасць галасоў выбаршчыкаў.

Выбары ў другім туры прызнаюцца адбыўшыміся, калі ў галасаванні прыняла ўдзел больш як 25 працэнтаў выбаршчыкаў, унесеных у спісы грамадзян, якія маюць права ўдзельнічаць у выбарах. Выбраным лічыцца кандыдат у дэпутаты, які атрымаў большую колькасць галасоў выбаршчыкаў, якія прынялі ўдзел у галасаванні.

адправіць

версія для друку

зрабіць стартавай

дабавіць у выбранае