Каляндар падзей у Беларусі
Афіцыйны сайт Рэспублікі Беларусь
Пра Беларусь

Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Пра Беларусь | Каляндар падзей у Беларусі

Каляндар падзей у Беларусі

Палац Пуслоўскіх у Косаве
Палац Пуслоўскіх у Косаве

ЧЭРВЕНЬ 2024

Выстава "На вагу золата" ў Мастацкай галерэі Міхаіла Савіцкага

Прасачыць гісторыю суверэннай Беларусі праз памятныя манеты запрашае выстава "На вагу золата", дзе прадстаўлены каштоўныя ўзоры, якія выпускаліся з 1996 года ў золаце, серабры і медна-нікелевым сплаве. У экспазіцыі сабраны памятныя манеты Нацыянальнага банка краіны па чатырох асноўных напрамках: гісторыя і культура Беларусі, спорт, ахова навакольнага асяроддзя і Беларусь у сусветнай супольнасці. Тут можна ўбачыць разнастайнасць форм (круглыя, прамавугольныя і авальныя манеты), тэматыкі, тэхналогій выканання, сярод якіх – галаграфія, аксідаванне, устаўкі з каштоўных і некаштоўных камянёў, каляровы лічбавы друк. Таксама прадстаўлены традыцыйныя інструменты для стварэння манет.

Калі: 17 красавіка – 7 ліпеня
Дзе: Мастацкая галерэя Міхаіла Савіцкага, пл. Свабоды, 15, Мінск

Рэспубліканская кінаакцыя, прысвечаная 80-годдзю вызвалення Беларусі

У гонар 80-годдзя вызвалення Беларусі ад нямецка-фашысцкіх захопнікаў ва ўсіх кінатэатрах краіны пакажуць лепшыя беларускія і савецкія фільмы аб Вялікай Айчыннай вайне розных гадоў. У афішу памятнай акцыі ўвайшло не толькі ігравое беларускае кіно, але і 16 дакументальных фільмаў, лепшыя савецкія кінастужкі, праваўладальнікамі якіх з'яўляюцца "Масфільм" і іншыя кінастудыі. Чакаецца, што ў час патрыятычнай акцыі для гледачоў адбудзецца больш за 2,8 тысячы кінасеансаў як у кінатэатрах, так і іншых установах культуры.

Калі: з 24 лютага па верасень 2024 года
Дзе: кінатэатры сталіцы, абласных і раённых цэнтраў Беларусі

Новая праграма "Цыркалета" ў Белдзяржцырку

У сезон самых бесклапотных канікулаў і водпускаў Белдзяржцырк запрашае гледачоў атрымаць асалоду ад новай праграмы пад назвай "Цыркалета". Асаблівай увагі заслугоўвае знакаміты атракцыён "Тыгры-шоу" пад кіраўніцтвам прадстаўнікоў вядомай цыркавой дынастыі дрэсіроўшчыкаў – заслужаных артыстаў Расіі Карыны і Артура Багдасаравых. У гэтым шоу на манеж выходзяць усурыйскія і бенгальскія тыгры. Таксама госці ўбачаць нумар акрабатаў на двайным трампліне, шоу папугаяў, дрэсіраваных катоў і сабачак, наезнікаў на конях, паветраных гімнастаў, жанглёраў, клоўнаў і многае іншае!

Калі: 25 мая – 4 жніўня
Дзе: Беларускі дзяржаўны цырк, пр. Незалежнасці, 32, Мінск

ХХІІ Міжнародны фестываль дзіцячай творчасці "Залатая пчолка"

Міжнародны фестываль дзіцячай творчасці "Залатая пчолка" ў Клімавічах збярэ сотні талентаў з розных рэгіёнаў Беларусі, а таксама краін блізкага і далёкага замежжа. У рамках форуму, які па традыцыі адбудзецца ў Міжнародны дзень абароны дзяцей, юныя таленты будуць змагацца за ўзнагароды ў вакальных намінацыях, харэаграфіі, выяўленчым і дэкаратыўна-прыкладным мастацтве. Свята ахопіць увесь горад: госці стануць удзельнікамі міні-паказаў, зазірнуць на каларытныя падворкі, асвояць традыцыйныя рамёствы беларусаў і пакаштуюць стравы нацыянальнай кухні.

Калі: 30 мая – 2 чэрвеня
Дзе: г. Клімавічы, Магілёўская вобласць

Міжнароднае свята традыцыйнай культуры "Браслаўскія зарніцы"

Адзін з самых каларытных летніх фестываляў краю азёр – Браслаўшчыны – запрашае акунуцца ў атмасферу традыцыйнай культуры Беларусі. Адкрыюць праграму гарадскі фестываль "Ставім лету лайк" і свята дзіцячай творчасці "На крылах таленту". Прадоўжаць першы дзень конкурс харавых калектываў "Браслаўская харавая асамблея", урачыстае шэсце ўдзельнікаў і гасцей і святочны канцэрт-прывітанне "Мы шчыра вітаем сяброў!", творчая імправізацыя "Фестывальная", свята сярэдневяковай культуры "Меч Брачыслава". У другі дзень гасцей чакаюць фотавыстава "Браслаўскія зоры", творчы форум #МЫРАЗАМ з удзелам замежных калектываў, конкурс народнага танца "Паазерскія тапаткі", фолк-свята "Спявай з "Вярбой"…

Калі: 31 мая – 2 чэрвеня
Дзе: Браслаў, Віцебская вобласць

Фестываль "Балетнае лета" ў Вялікім тэатры Беларусі

"Балетнае лета"-2024 у Вялікім тэатры Беларусі запомніцца выступленнямі запрошаных калектываў з Санкт-Пецярбурга і не толькі. У першы дзень гледачы ўбачаць знакамітыя балеты Барыса Эйфмана "Мусагет" і "Мой Іерусалім" у выкананні выхаванцаў акадэміі танца праслаўленага харэографа. Тэатр балета імя Леаніда Якабсона 4 чэрвеня прадставіць прэм'еру "598 тактаў" Вячаслава Самадурава, аднаактовую харэаграфічную кампазіцыю "Гарэзныя прыпеўкі" і цыкл мініяцюр Леаніда Якабсона "Радэн", а 5 чэрвеня – мініяцюры з цыкла "Класіцызм – рамантызм", аднаактовыя балеты "Вясельны картэж" на музыку Д.Шастаковіча і "Бліскучы дывертысмент" на музыку М.Глінкі.

6 чэрвеня – пастаноўка Ігара Колба "Ілюзіі кахання"
7 чэрвеня
– балет "Лебядзінае возера"
8 чэрвеня
– балет "Баядэрка"
9 чэрвеня
гала-канцэрт зорак балета

Калі: 2–9 чэрвеня
Дзе: Вялікі тэатр Беларусі, пл. Парыжскай Камуны, 1, Мінск

Спартыўна-культурны фестываль "Вытокі" ў Пружанах

Ужо 20-ы раз з моманту заснавання ў 2021 годзе адбудзецца спартыўна-культурны фестываль "Вытокі". І ўпершыню ён пройдзе толькі ў адным горадзе – у Пружанах: так, паводле слоў арганізатараў, у гасцей будзе больш часу для знаёмства з гістарычнай і культурнай спадчынай горада з 590-гадовай гісторыяй, народнымі промысламі, роднымі брэндамі і вядомымі людзьмі гэтага цікавага кутка Беларусі. Стартуе свята з рэспубліканскай турыстычнай акцыі "Вандруй! Адчуй! Натхняйся!". Таксама ў рамках свята адбудуцца прэзентацыя маршруту "Жамчужына Пружанскага краю", выстаўка-прэзентацыя НАН Беларусі, інтэрактыўная тэатральная пастаноўка "Выдно пана по чоботах", інтэлектуальны турнір "Вытокі квіз", алімпійскі квест, фестываль "Бітва кавераў", вячэрні гала-канцэрт з удзелам зорак беларускай эстрады.

Калі: 6–8 чэрвеня
Дзе: Пружаны, Брэсцкая вобласць
Даведацца падрабязней

XIV Рэспубліканскі фестываль нацыянальных культур у Гродне

Фестываль нацыянальных культур, які раней пачаўся ў рэгіёнах, збярэ тысячы гасцей на яркім фінальным свяце ў Гродне. У бягучым годзе яго мерапрыемствы разгорнуцца не толькі ў гістарычным цэнтры каралеўскага горада, але і на Аўгустоўскім канале. Галоўная тэма – сям'я і яе каштоўнасці, у шырокім разуменні – сям'я народаў (а гэта 35 дыяспар!), якія дружна і мірна жывуць у Беларусі. Чакаецца, што на Алеі дружбы ў Каложскім парку дрэвы высадзяць прадстаўнікі Аргенціны, Манголіі, Камеруна, Егіпта, а таксама экзатычныя саджанцы дабавяць нігерыйцы і пакістанцы. Традыцыйна фестываль адкрые маляўнічае шэсце ўдзельнікаў у нацыянальных касцюмах, якія з музыкай і танцамі пройдуць да Савецкай плошчы. Таксама разгорнуцца нацыянальныя падворкі (19), дзе будуць здзіўляць аўтэнтычнымі забавамі і, вядома, смачнымі традыцыйнымі стравамі.

Калі: 7–9 чэрвеня
Дзе: Гродна (пл. Савецкая і пл. Леніна), Аўгустоўскі канал
Даведацца падрабязней

Фестываль акадэмічнай арганнай і камернай музыкі ARS MAGNA ORGANI 2024

Фестываль ARS MAGNA ORGANI 2024 "Вялікае мастацтва аргана" ў новым сезоне аб'яднае 56 бясплатных канцэртаў. Для гэтага будуць задзейнічаны чатыры гістарычныя арганы – у Пінску, Мядзведзічах, Ружанах і Навагрудку, а таксама адзін электраарган – у Іванаве. Найбольш маштабная праграма – у Пінску, дзе адбудуцца 23 сольныя арганныя канцэрты і 6 канцэртаў камерных аркестраў і ансамбляў. Музыка прагучыць у кафедральным касцёле Ушэсця Найсвяцейшай Дзевы Марыі на другім па гістарычнай значнасці аргане ў Беларусі. Высокае выканальніцкае майстэрства прадэманструюць 27 канцэртуючых арганістаў з Беларусі, Расіі, Аўстрыі і Венгрыі, 3 камерныя калектывы, а таксама ўдзельнікі запланаваных у рамках фестывалю майстар-класаў.

Калі: 8 чэрвеня – 13 кастрычніка
Дзе: Пінск, Мядзведзічы, Ружаны, Іванава, Навагрудак

XXXIV Міжнародны фестываль народнай музыкі "Звіняць цымбалы і гармонік"

Фестываль народнай музыкі, які праводзіцца ў Паставах з 1989 года, аб'яднае прадстаўнікоў з краін – удзельніц СНД, у тым ліку горада-пабраціма – расійскага Пушкіна, а таксама латвійскага Даўгаўпілса. Гасцей чакаюць свята традыцыйнай творчасці "Скарбонка народных талентаў", міжнародны пленэр "Жывапісная Пастаўшчына", выступленні замежных творчых калектываў на канцэртных пляцоўках раёна "Пастаўшчыне з любоўю ад сяброў", выстава "Калыска талентаў і родны край цымбалаў", музычна-тэатралізаваны паказ "Пастаўскі баль", канцэрты беларускай і класічнай музыкі, тэатралізаванае шэсце ўдзельнікаў і гасцей фестывалю, а таксама Горад майстроў і выстаўка-продаж вырабаў з удзелам народных майстроў Віцебскай вобласці.

Калі: 7–9 чэрвеня
Дзе: Паставы, аграгарадкі Дунілавічы, Навасёлкі, Віцебская вобласць

Свята "Адэльскі фэст" у Гродзенскім раёне

Свята, прысвечанае памяці святога Антонія Падуанскага – абаронцы Адэльска – заўсёды праводзіцца 13 чэрвеня. Пачынаецца яно апоўдні са Святой літургіі ў касцёле Ушэсця Найсвяцейшай Дзевы Марыі. Далей свята збярэ жыхароў і гасцей аграгарадка на пляцоўцы каля цэнтра культуры, дзе выступяць калектывы аматарскай творчасці раёна, запрошаныя артысты. Усе жадаючыя змогуць прагуляцца па музеі пад адкрытым небам, пабываць на выставе аднаго дня "Адэльскія двары", развучыць традыцыйныя танцы, прыняць удзел у майстар-класах па вырабе беларускай лялькі, выцінанцы і пляценні паясоў. Таксама будзе адкрыта кулінарная пляцоўка з дэгустацыяй страў нацыянальнай кухні.

Калі: 13 чэрвеня
Дзе: аг. Адэльск, Гродзенскі раён, Гродзенская вобласць

XXIII Нацыянальны фестываль беларускай песні і паэзіі "Маладзечна"

Мерапрыемствы самабытнага фестывалю, прысвечанага нацыянальным каштоўнасцям, беларускай музыцы, паэзіі і мове, разгорнуцца ў Маладзечне яшчэ да пачатку афіцыйнай праграмы. Чакаецца, што з 11 чэрвеня ў горадзе адбудзецца больш за 60 падзей, якія прадэманструюць музычную і літаратурную спадчыну Беларусі, а таксама дасягненні ў прафесійным мастацтве і аматарскай творчасці. Штодзень на Цэнтральнай плошчы, у Цэнтральнай раённай бібліятэцы імя М.Багдановіча і Палацы культуры будуць гучаць канцэртныя праграмы творчых калектываў Мінскай вобласці, праходзіць спектаклі, прэзентацыі кніг, пленэры і майстар-класы. Галоўныя падзеі – гала-канцэрты адкрыцця і закрыцця на сцэне Летняга амфітэатра і Нацыянальны конкурс маладых выканаўцаў беларускай эстраднай песні, які пройдзе ў Палацы культуры.

Калі: 14–15 чэрвеня
Дзе: Маладзечна, Мінская вобласць

XIV фестываль "Вечары оперы і балета ў замку Радзівілаў"

Штогадовы фестываль опернага і балетнага мастацтва "Вечары Вялікага тэатра ў замку Радзівілаў" – адна з самых яркіх падзей тэатральнага сезона краіны. Старадаўняя рэзідэнцыя са Спіса Сусветнай спадчыны ЮНЕСКА стала для галоўнага тэатра Беларусі любімай пляцоўкай фармату open air і не толькі. Артысты балета, оперы, хору, аркестра выязджаюць з родных тэатральных сцен, каб падарыць жыхарам і гасцям горада Нясвіжа радасць сустрэчы з шэдэўрамі сусветнай опернай і балетнай класікі.

Праграма фестывалю "Вечары оперы і балета ў замку Радзівілаў"-2024:

14 чэрвеня, 16.00 – канцэрт "Тэнары. Tribute", тэатральная зала
14 чэрвеня, 20.30 – балет "Жызэль", цэнтральны двор
15 чэрвеня, 12.00 – канцэрт "Час бэзу", тэатральная зала
15 чэрвеня, 14.00 – канцэрт "Музыка рэнесансу і барока", касцёл Божага Цела
15 чэрвеня, 16.00 – канцэрт "Джакама Пучыні. Сапраўдны геній оперы", тэатральная зала
15 чэрвеня, 19.30 – опера "Іаланта", цэнтральны двор
16 чэрвеня, 12.00 – канцэрт "Ад класікі да джаза", тэатральная зала
16 чэрвеня, 14.00 – канцэрт "Як многа дзяўчат добрых...", тэатральная зала
16 чэрвеня, 16.00 – канцэрт "Новае дыханне", тэатральная зала
16 чэрвеня, 19.30 – гала-канцэрт зорак Вялікага тэатра Беларусі, цэнтральны двор

Калі: 14–16 чэрвеня
Дзе: Нясвіжскі замак, касцёл Божага Цела, Нясвіж, Мінская вобласць

XVII Міжнародны фестываль народнай творчасці "Вянок дружбы"

Фестываль аўтэнтычнай творчасці і фальклору Беларускага Прыдняпроўя накіраваны на развіццё і ўмацаванне міжнародных культурных сувязей, папулярызацыю народнай творчасці і традыцый. Ён праходзіць пад дэвізам "Фестываль дружбы – за мір і згоду без меж". У праграме-2024 – канцэртныя і конкурсныя выступленні творчых калектываў і індывідуальных выканаўцаў, парад удзельнікаў фестывалю, тэатралізаваныя паказы і масавыя гулянні, музычныя праекты, выставы, кірмашы майстроў народных мастацтваў, майстар-класы, творчыя лабараторыі вядучых спецыялістаў сферы мастацтваў Беларусі і замежжа, навукова-практычная канферэнцыя па развіцці народнай творчасці і многае іншае.

Калі: 27–30 чэрвеня
Дзе: Бабруйск, Магілёўская вобласць

Ваенна-гістарычная рэканструкцыя "Бабруйскі кацёл"-2024

Дата свята горада Бабруйска, якому ў бягучым годзе спаўняецца 637 гадоў, устаноўлена ў гонар знакавай падзеі гісторыі ХХ стагоддзя – 29 чэрвеня 1944 года горад быў вызвалены ад нямецка-фашысцкіх захопнікаў войскамі Першага Беларускага фронту. І менавіта Бабруйская наступальная аперацыя стала першым этапам адной з буйнейшых стратэгічных наступальных аперацый савецкіх войскаў у гады Вялікай Айчыннай вайны – "Баграціён", якая праводзілася з 23 чэрвеня па 29 жніўня 1944 года з мэтай разгрому нямецка-фашысцкай групы армій "Цэнтр" і вызвалення Беларусі.  У так званым "Бабруйскім катле" Чырвоная Армія блакіравала некалькі дывізій вермахта агульнай колькасцю больш за 25 тысяч чалавек, што адкрыла дарогу на Мінск... У гонар 80-годдзя вызвалення Беларусі адбудзецца IV ваенна-патрыятычны злёт "Бабруйскі кацёл". Яго ўдзельнікі – ваенна-патрыятычныя клубы – размесцяцца каля вёскі Шчаткава Бабруйскага раёна. Галоўнай падзеяй стане ваенна-гістарычная рэканструкцыя, на якую збяруцца звыш 500 прадстаўнікоў з Беларусі, Расіі, Балгарыі, Латвіі, Эстоніі, Ізраіля.

Калі: 28–30 чэрвеня
Дзе: в. Шчаткава, Бабруйскі раён, Магілёўская вобласць

Помнікі Вялікай Айчыннай вайны ў Беларусі