Падзеі, факты, анонсы

Каляндар падзей у Беларусі: ЛIПЕНЬ 2022

"Магія графікі": казачная выстава мастака Валерыя Славука ў Мінску

Мастак-ілюстратар і графік Валерый Славук вядомы як майстар кніжнага афармлення, а адна з галоўных тэм у творчасці – беларуская і славянская міфалогія. Многім палюбіліся яго ілюстрацыі да народных казак "Удовін сын", "Піліпка-сынок", "Алёнка", а таксама да папулярных твораў сусветнай і беларускай класікі – "Айвенга" В.Скота, "Чорны млын" Ю.Брэзана, "Шляхціц Завальня" Я.Баршчэўскага, "Вясна ўвосень" У.Караткевіча. Выстава, прысвечаная 75-годдзю мастака, прызначана паказаць "Магію графікі" ва ўсёй разнастайнасці традыцыйных вобразаў сусветнай і беларускай міфалогіі, сярод якіх харызматычныя каты, насякомыя, магі, дамавікі, волаты, русалкі, вадзяныя…

Калі: 19 красавіка – 1 ліпеня
Дзе: Нацыянальная бібліятэка Беларусі, пр. Незалежнасці, 116, Мінск

Праграма "Водпуск Без Шкарпэтак?!" у Белдзяржцырку

Напярэдадні летняга сезона і самых доўгіх дзіцячых канікулаў артысты Белдзяржцырка запрашаюць гледачоў атрымаць асалоду ад новай праграмы "Водпуск Без Шкарпэтак?!" Адметнасць шоу – яркае клоўнскае трыа "Без шкарпэтак" – уладальнікі мноства ўзнагарод прэстыжных цыркавых фестываляў у Венгрыі, Францыі, Расіі, Ізраілі, Іспаніі, а таксама знакамітага форуму ў Монтэ-Карла. Акрамя іскрамётнага гумару ад прадстаўнікоў камічнага жанру, гледачы ўбачаць арыгінальныя цыркавыя нумары паветраных гімнастаў, канатаходцаў, наезнікаў на конях, сабачак на скейтбордах, незвычайную гульню ў більярд, вышэйшую школу верхавой язды і нават бокс з кенгуру ад дрэсіроўшчыка Антона Светлакова.

Калі: 14 мая – 7 жніўня
Дзе: Беларускі дзяржаўны цырк, пр. Незалежнасці, 32, Мінск

Музычна-турыстычны сезон у Верхнім горадзе

Новы турыстычны сезон, прысвечаны 955-годдзю Мінска і Году гістарычнай памяці, стартаваў у сталічным Верхнім горадзе 21 мая. Кожную суботу да верасня ён будзе радаваць гасцей яркімі падзеямі. У праграме-2022 – вечары джаза, праект "Класіка ля Ратушы", канцэрт акадэмічнага ансамбля "Харошкі". Акрамя таго, у гэтым сезоне ля атэля "Манастырскі" адкрыецца тэатральны дворык, дзе будуць выступаць студэнцкія і прафесійныя калектывы. Госці і жыхары сталіцы таксама змогуць наведаць кінапаказы пад адкрытым небам і ўбачыць папулярныя карціны кінастудыі "Беларусьфільм". А яшчэ сталічныя бібліятэкі арганізуюць творчую пешаходку, дзе можна азнаёміцца з навінкамі літаратуры і сустрэцца з пісьменнікамі.

Калі: 21 мая – 17 верасня
Дзе: плошча Свабоды, Верхні горад, Мінск

Магілёў святкуе 755-годдзе

Старажытны горад на Дняпры вядомы ўжо больш за сем з палавінай стагоддзяў. А свой дзень нараджэння ён адзначае ў знакавую дату, звязаную з гераічнымі падзеямі ХХ стагоддзя: 28 чэрвеня 1944 года Магілёў быў вызвалены ад нямецка-фашысцкіх захопнікаў. У гонар юбілейнага свята чарада ўрачыстасцей ахапіла практычна тыдзень. Стартавалі мерапрыемствы 28 чэрвеня на плошчы Славы каля Вечнага агню, дзе ўшанавалі памяць загінулых у гады Вялікай Айчыннай вайны. На плошчы каля гарадской ратушы адкрылася выстава праекта "Лёсы, складзеныя ў трохкутнік", створанага вядучым інфармагенцтвам краіны БЕЛТА і Музеем гісторыі Вялікай Айчыннай вайны. У гэты ж дзень у Магілёў прыбыў "Поезд Перамогі", які падарожнічае па гарадах Беларусі і Расіі.

Самыя маштабныя мерапрыемствы да юбілею Магілёва запланаваны на 1 і 2 ліпеня. Пятнічным вечарам на стадыёне "Спартак" адбудзецца ўрачыстая цырымонія ўручэння штогадовай спецыяльнай прэміі Магілёва "Дасягненне" і вялікі канцэрт з удзелам зорак беларускай эстрады. У суботу 2 ліпеня святочная праграма прапануе шмат цікавых падзей. Сярод іх – шэсце-парад па цэнтральнай вуліцы, выступленне духавых аркестраў, спартыўнае мерапрыемства "Самы моцны магіляўчанін", маладзёжныя забаўляльныя праграмы, "Горад майстроў", тэатралізаваная экскурсія "Ажыўшая гісторыя" па пешаходнай вуліцы, выкананне "Оды гораду" і, вядома, феерверк.

3 ліпеня Магілёў, як і ўсе гарады краіны, будзе адзначаць Дзень Незалежнасці. Пачнуцца ўрачыстасці мітынгам-рэквіемам каля мемарыяльнага комплексу "Буйніцкае поле", а далей святочныя праграмы пройдуць на плошчы Адзінства, вул. Ленінскай, у скверы 40-годдзя Перамогі. У парку Падніколле адбудзецца гарадскі сямейны фестываль. На асноўнай пляцоўцы – плошчы Славы – пройдзе вялікі святочны канцэрт, у час якога жыхары і госці Магілёва змогуць далучыцца да рэспубліканскай акцыі "Спяём гімн разам".

Калі: 28 чэрвеня – 2 ліпеня
Дзе: Магілёў

3 ліпеня – Дзень Незалежнасці Рэспублікі Беларусь (Дзень Рэспублікі)

Галоўнае нацыянальнае свята Беларусь адзначае 3 ліпеня – у гістарычны дзень вызвалення сталіцы ад нямецка-фашысцкіх захопнікаў у 1944-м. Ужо многія дзесяцігоддзі краіна помніць і шануе подзвіг пакаленняў, якія перажылі вайну і заваявалі Перамогу. У Год гістарычнай памяці гэтыя падзеі набываюць асаблівы сэнс і, безумоўна, стануць лейтматывам многіх мерапрыемстваў, прысвечаных Дню Незалежнасці... У гэты святочны дзень па ўсёй краіне пройдуць канцэрты, народныя гулянні, сямейныя фестывалі, выставы пад адкрытым небам... Увечары каля стэлы "Мінск – горад-герой" пачнецца вялікі святочны канцэрт, пасля якога адбудзецца традыцыйная акцыя "Спяём гімн разам". У 23:00 неба над Мінскім і гарадамі ўсіх абласцей краіны адначасова расквеціць святочны феерверк.

Традыцыйны фестываль "Баграціён", прысвечаны Дню Незалежнасці, пройдзе 2 і 3 ліпеня ў гісторыка-культурным комплексе "Лінія Сталіна". Маштабныя ваенна-гістарычныя рэканструкцыі перанясуць гасцей у мінулае, а менавіта ў 28 чэрвеня 1944 года, калі на тэрыторыі нашай краіны праходзіла буйнамаштабная наступальная аперацыя "Баграціён". Дзякуючы ёй была вызвалена БССР і амаль поўнасцю разгромлена германская група армій "Цэнтр". Таксама наведвальнікаў комплексу чакае забаўляльная праграма з мноствам актыўнасцей для дзяцей і дарослых – гістарычная віктарына, стральба з пнеўматыкі, зборка-разборка зброі, кіданне гранаты, унікальны інтэрактыўны стралковы трэнажор пісталета ПМ.

На мемарыяльным комплексе "Курган Славы" 3 ліпеня разгорнецца выстава ўзораў сучаснай зброі і тэхнікі. Наведвальнікам будуць паказаны беспілотныя лятальныя апараты "Кондар", "Бекард-1", "Бекард-2", ВР-2 "Маскіт", універсальная баявая платформа для транспарціроўкі модуляў рознага функцыянальнага прызначэння, баявы модуль АДУНОК-БМ30 на БТР VOLAT V-2. Таксама ўдзельнікі свята змогуць убачыць баявую машыну 9А33-2Б ЗРК "Аса" на колавым шасі МАЗ-6317 і радыёэлектронную стрэльбу для барацьбы з мультыкоптарамі "Граза-Р2".

Калі: 3 ліпеня
Дзе: гарады краіны, музеі, турыстычныя комплексы

Будзе маштабна: сталі вядомы мерапрыемствы святочнай праграмы да Дня Незалежнасці

Гарадскі пікнік Vulitsa Ezha 2022 у Мінску

Сёмы сезон Vulitsa Ezha адзначыць адразу трыма фестывалямі. У маляўнічым месцы на тэрыторыі сталічнага Батанічнага саду госці змогуць прадэгуставаць спецыяльнае меню фуд-корта, зазірнуць у кактэйльныя бары з чылаўт-зонай, наведаць Local Food Market са свежай фермерскай прадукцыяй, навучыцца гатаваць новыя стравы ў шэфаў, набыць унікальныя рэчы на дызайнерскім маркеце. Акрамя таго, гасцям прапануюць атрымаць асалоду ад цікавых фільмаў у кінатэатры пад адкрытым небам, DJ-сэтамі і канцэртамі жывой музыкі. Будуць арганізаваны забавы ў зонах актывацый і яркія лакацыі для інста-фотасесій.

Калі: 18–19 чэрвеня, 23–24 ліпеня, 3–4 верасня
Дзе: Цэнтральны батанічны сад НАН Беларусі, вул. Сурганава, 2В, Мінск

Будслаўскі фэст-2022

Будслаўскі фэст, унесены ЮНЕСКА ў Рэпрэзентатыўны спіс нематэрыяльнай культурнай спадчыны чалавецтва, па традыцыі адбудзецца ў пачатку ліпеня. Гэту падзею не адмянялі нават пасля майскай трагедыі 2021 года, калі касцёл Ушэсця Найсвяцейшай Дзевы Марыі сур'ёзна пацярпеў пры пажары. Як і заўсёды, вернікі змогуць пакланіцца славутай каталіцкай святыні Беларусі. Урачыстасці ў Нацыянальным санктуарыі Маці Божай Будслаўскай пройдуць пад дэвізам "Каралева Свету, маліся за нас". Запланаваны святая Імша для паломнікаў і начная працэсія са свечкамі і копіяй абраза ў пятніцу, Імша апоўначы і галоўная Імша ў суботу.

Калі: 1-2 ліпеня
Дзе: аграгарадок Будслаў, Мядзельскі раён, Мінская вобласць

Купалле ў Беларусі: гулянні ў самую таямнічую ноч лета

Любімае народнае свята, гісторыя якога ідзе ўглыб стагоддзяў, і сёння шырока адзначаюць па ўсёй Беларусі. З-за разыходжанняў у календары ёсць дзве асноўныя даты, але самая маштабная ноч праходзіць з 6 на 7 ліпеня. Зрэшты, у турыстычных лакацыях купальскія святы праводзяць і ў канцы чэрвеня, і ў пачатку ліпеня. Гэты год не будзе выключэннем!

Яркае дзейства чакае гасцей парка-музея інтэрактыўнай гісторыі "Вялікае княства Сула". Святы "Купалле ў Суле" будуць праходзіць 25 і 26 чэрвеня, 2, 3, 9 і 10 ліпеня. Ачышчэнне агнём і вадой, гульні і танцы, выпрабаванні на сілу і спрытнасць, купальскія карагоды, сустрэчы з персанажамі беларускай міфалогіі, варажба з нагаворным зеллем і абярэгамі – чаго толькі тут не прапануюць кожнаму, хто прайшоў праз "Купальскі партал". Жадаючыя стануць удзельнікамі майстар-класаў па старадаўніх танцах, традыцыйных рамёствах і, вядома, пляценні купальскіх вянкоў, якія можна пусціць па рацэ Сула. У фінале свята ўсіх чакаюць святочнае вогнішча і скачкі цераз агонь.

У нацыянальным парку "Белавежская пушча" на тэрыторыі археалагічнага музея пад адкрытым небам 6 ліпеня пройдзе "Вечар на Івана Купалу". Пляценне купальскіх вянкоў і пусканне іх у ваду, вялікае вогнішча, народныя песні і карагоды, вясёлыя гульні і конкурсы, гісторыі пра гаючыя травы і кветкі, якія набываюць чарадзейную сілу і, вядома, пошукі папараць-кветкі – усё будзе як у былыя часы!

Калі: канец чэрвеня – пачатак ліпеня
Дзе: святы пройдуць у этнаграфічных музеях і турыстычных комплексах, гарадах і вёсках краіны

Рэспубліканскае свята "Купалле" ("Александрыя збірае сяброў")

Самае маштабнае Рэспубліканскае свята "Купалле" праходзіць на беразе Дняпра ў аграгарадку Александрыя. Кожны год яно становіцца адной з самых цікавых падзей лета і збірае тысячы гасцей. У 2022-м, які аб'яўлены ў краіне Годам гістарычнай памяці, мерапрыемствы Купалля ў Александрыі будуць прысвечаны багатай гісторыі краіны, яе станаўленню і развіццю, беларусам, якія сваёй працай робяць родныя мясціны яшчэ прыгажэйшымі. Гасцей чакаюць насычаныя выхадныя! Свята пачнецца з адкрыццём тэматычных пляцовак 9 ліпеня (субота) у 11.00 і завершыцца начной дыскатэкай 10 ліпеня (нядзеля) у 3.00. Па традыцыі галоўнымі падзеямі стануць цырымонія адкрыцця, канцэрты артыстаў эстрады, ушаноўванне лепшых работнікаў сельскай гаспадаркі, фінал рэспубліканскага праекта "Уладар сяла". Кульмінацыя суботняга вечара – музычная камедыя з элементамі шоу і тэатралізаванага паказу, якая пройдзе на галоўнай сцэнічнай пляцоўцы. Арганізатары падрыхтавалі інтрыгуючы гала-канцэрт з удзелам як знакамітых выканаўцаў, так і "артыстаў з народа". Сярод запрошаных зорак – Алена Ваенга, імя яшчэ аднаго артыста трымаецца ў сакрэце. На кірмашовых вуліцах Купалля ў Александрыі разгорнуцца гандлёвыя рады, гульнявыя атракцыёны, цырк-шапіто, выстаўкі-продажы, рэгіянальныя міні-павільёны, прысвечаныя народным промыслам і рамёствам.

Калі: 10-11 ліпеня
Дзе: аграгарадок Александрыя, Шклоўскі раён, Магілёўская вобласць
Даведацца больш

Фестываль "Вытокі. Крок да Алімпу" ў Беларусі

Культурна-спартыўны фестываль "Вытокі. Крок да Алімпу", які заявіў пра сябе ў 2021-м, набірае абароты. У другім сезоне ён зноў ахапіў шэсць гарадоў краіны – на гэты раз у спісе Рэчыца, Столін, Навагрудак, Горкі, Полацк і Капыль. Канцэпцыя фестывалю заключаецца ў тым, каб кожны – і дзіця, і дарослы – мог знайсці сабе забаву даспадобы. Дзясяткі спартыўных лакацый, захапляючыя экскурсіі, канцэрты маладых вакалістаў і папулярных артыстаў, выстаўкі-продажы "Беларускія брэнды", паказы дызайнераў, фуд-корты са стравамі нацыянальнай кухні – праграма надзвычай насычаная. Акрамя таго, у Год гістарычнай памяці кожны горад імкнецца цікава расказаць пра сябе, таму гасцям прапаноўваюць экскурсіі па знакавых славутых мясцінах, тэатралізаваныя пастаноўкі, гістарычныя квесты. Галоўны арганізатар праекта "Вытокі. Крок да Алімпу" – Нацыянальны алімпійскі камітэт Беларусі – запрашае актыўна ўдзельнічаць ва ўсіх спартыўных спаборніцтвах свята. Дарэчы, у кожным горадзе-ўдзельніку робяць акцэнт на тыя віды спорту, якія паспяхова развіваюцца ў канкрэтным рэгіёне.

Калі, дзе:
22–23 ліпеня, Горкі, Магілёўская вобласць
12–13 жніўня, Полацк, Віцебская вобласць
26–27 жніўня, Капыль, Мінская вобласць

ХХХI Міжнародны фестываль "Славянскі базар у Віцебску"

Самы яркі і маштабны фестываль не толькі Беларусі, але і ўсёй Усходняй Еўропы зноў збярэ гасцей у Віцебску. У 2021-м "Славянскі базар" адзначыў 30-годдзе, і ў гэтым ліпені ён зноў гатовы здзіўляць. На форуме мастацтваў чакаецца каля пяці тысяч акрэдытаваных гасцей і ўдзельнікаў. Як заўсёды, фестывальныя дні будуць надзвычай насычанымі. Самыя папулярныя праекты – канцэрты ў Летнім амфітэатры, зорныя сольнікі, вечар джаза, тэатральная, лялечная і філарманічная праграмы, оперны форум у дні Саюзнай дзяржавы, мноства выстаў, Горад майстроў… Для моладзі запланаваны дзясяткі open air мерапрыемстваў – цікавыя праекты і перформансы ахопяць у гэтым годзе больш гарадскіх лакацый. Адбудзецца і любімы ўсімі фэст "На сямі вятрах", у час якога можна будзе зрабіць прыгожыя фота і выканаць #одножеланиенадвоих. У фестывальныя дні адкрыецца міжнародная тэатральная лабараторыя, якая аб'яднае студэнтаў творчых спецыяльнасцей з Беларусі і Расіі. Пад кіраўніцтвам педагогаў Расійскага інстытута тэатральнага мастацтва (ДІТМ) яны падрыхтуюць эцюды па матывах п'есы "Тры сястры" А. П. Чэхава і прадставяць іх гледачу 18 ліпеня. Гасцей і ўдзельнікаў "Славянскага базару" таксама чакаюць каля паўтара дзясятка каляфестывальных мерапрыемстваў і, вядома, незабыўная атмасфера Віцебска, які гэтымі днямі практычна не спіць.

Калі: 13–18 ліпеня
Дзе: Летні амфітэатр, канцэртная зала "Віцебск", вуліцы і плошчы Віцебска

Вішнёвы фестываль-2022 у Глыбокім

"Вішнёвая сталіца" Беларусі – горад Глыбокае – зноў запрашае гасцей на свой самабытны і смачны фестываль. Сёлета ён пройдзе ўжо 10-ы раз, таму і назвай-сімвалам выбраны хэштэг #Вишня10. Адкрые свята прэстыж-сустрэча ў рэзідэнцыі Вішнёвай каралевы, на дзіцячай пляцоўцы адбудзецца адкрыты конкурс паветраных змеяў "Вішнёвы палёт", цэнтр традыцыйнай культуры і народнай творчасці запросіць на вернісаж кітайскага мастака Пань Уліцзі. Асноўнай лакацыяй стане цэнтральная плошча горада. Тут пройдуць этна-вечарына "У вішнёвым садзе", майстар-класы з рамеснікамі, квест "PRO-вішню", цырымонія ўрачыстага адкрыцця "#Вішня10". Другі фестывальны дзень абяцае быць не менш насычаным. У раскладзе – карнавальнае шэсце "У гасцях у Вішні", святочная праграма "Вішнёвая сталіца сустракае гасцей!", выстава-прэзентацыя падворкаў, конкурс-дэгустацыя "Варым разам вішнёвае варэнне", урачыстая рэгістрацыя шлюбу "Вішнёвае вяселле", конкурс гарманістаў, баяністаў і акардэаністаў "Вішнёвыя найгрышы", гала-канцэрт "Вішнёвая квецень сяброўства" аўкцыён "Вішнёвы пірог"… Арганізатары абяцаюць: будзе цікава і вельмі смачна!

Калі: 22-23 ліпеня
Дзе: г. Глыбокае, Віцебская вобласць

VIVA BRASLAV 2022

Браслаўшчына – папулярны напрамак адпачынку для беларусаў і замежных гасцей. Па-першае, сюды прыцягваюць дзіўнай прыгажосці ледніковыя азёры, якія паэтычна называюць "блакітнымі каралямі" краіны. Па-другое, гэты курортны край славіцца вясёлымі летнімі фестывалямі. Адзін з іх – Viva Braslav, традыцыйна збірае звыш 20 тысяч чалавек! У гэтым годзе меламанаў чакаюць пляцоўка на 230 000 м², зручны кемпінг, багаты выбар фуд-кортаў і зон забаў. І вядома, гарачыя навінкі ад папулярных выканаўцаў. У лайн-ап – Swanky Tunes і Rompasso, GAYAZOV$ BROTHER$, Mari Ferrari, Мары Краймбрэры, Jony, Shapov, Dabro. І спіс артыстаў яшчэ папаўняецца. Таксама 30 ліпеня адбудзецца фінал конкурсу прыгажосці Miss Viva Braslav 2022, у час якога традыцыйна выберуць "Музу гэтага лета".

Калі: 29-30 ліпеня
Дзе: гарадскі пляж "Дрывяты", Браслаў, Віцебская вобласць