Стварэнне прадпрыемства ў Беларусі

Заяўны парадак рэгістрацыі юрыдычных асоб дзейнічае ў Рэспубліцы Беларусь

Аб стварэнні кампаніі ў Беларусі, відах кампаній і часе, неабходным для адкрыцця бізнесу

Якія віды кампаній можна стварыць у Беларусі?

Беларускі ўрад падтрымлівае замежныя кампаніі, якія жадаюць весці бізнес у Беларусі.

Калі вы жадаеце працаваць у Беларусі ў якасці замежнай або міжнароднай кампаніі, вам неабходна стварыць:

або прадстаўніцтва
або юрыдычную асобу

Традыцыйна прадстаўніцтвы ў Беларусі захоўваюць статус замежнай кампаніі, аднак іх дзейнасць у краіне абкладаецца падаткамі.

Аднак калі вы нацэлены на даўгачасную камерцыйную дзейнасць у Беларусі, пажадана стварэнне юрыдычнай асобы.

У Беларусі заканадаўствам прадугледжаны розныя арганізацыйна-прававыя формы камерцыйных структур. Большасць юрыдычных асоб выбіраюць наступныя віды як найбольш зручныя для вядзення бізнесу:

акцыянерныя таварыствы
таварыствы з абмежаванай адказнасцю
унітарныя прадпрыемствы

Акцыянерныя таварыствы ў Беларусі

Акцыянерныя таварыствы – гэта камерцыйныя арганізацыі, чый капітал падзелены на пэўную колькасць акцый. Яны падзяляюцца на дзве катэгорыі:

адкрытыя акцыянерныя таварыствы (ААТ). Гэтым кампаніям дазваляецца выпускаць неабмежаваную колькасць акцый. Гэта адзіны тып кампаній, якімі можна свабодна гандляваць.
закрытыя акцыянерныя таварыствы (ЗАТ). Самы распаўсюджаны тып акцыянерных таварыстваў у Беларусі. Трымальнікамі акцый з'яўляюцца заснавальнікі або пэўныя групы. Абнародаванне рахункаў неабавязковае.

Таварыствы з абмежаванай адказнасцю

Таварыства з абмежаванай адказнасцю (ТАА) – самы гібкі тып структуры кампаніі.

Паколькі такія кампаніі не маюць акцый, яны не падпадаюць пад беларускае заканадаўства ў галіне абароту каштоўных папер.

Унітарныя прадпрыемствы (УП)

Замежныя кампаніі, якія працуюць на беларускім рынку, аддаюць перавагу стварэнню унітарных прадпрыемстваў. Згодна са структурай кампаніі заснавальнік захоўвае за сабой права ўласнасці на яе актывы.

Як адкрыць прадстаўніцтва ў Беларусі

Працэс стварэння прадстаўніцтва просты – неабходна прадставіць у Міністэрства замежных спраў Беларусі пакет дакументаў:

заяву на адкрыццё прадстаўніцтва;
копію дакумента аб рэгістрацыі кампаніі-заснавальніка ў краіне паходжання;
палажэнне аб прадстаўніцтве;
даверанасць на кіраўніка прадстаўніцтва;
даверанасць на асобу, упаўнаважаную весці справы па адкрыцці прадстаўніцтва;
дакумент-пацвярджэнне выплаты дзяржпошліны.

Дакументы, складзеныя на замежнай мове, павінны мець засведчаны натарыяльна пераклад на беларускую ці рускую мову або быць легалізаваны (завераны апастылем).

Прадстаўніцтвы абавязаны:

зарэгістравацца ў падатковых органах
весці бухгалтэрыю
плаціць падаткі

Як стварыць юрыдычную асобу ў Беларусі

Заяўны парадак рэгістрацыі юрыдычных асоб дзейнічае ў Беларусі з 1 лютага 2009 года. Працэс уключае:

дзяржаўную рэгістрацыю (пры рэгістрацыі аўтаматычна ажыццяўляецца пастаноўка на ўлік у падатковых органах, структурах дзяржаўнай статыстыкі, Фондзе сацыяльнай абароны насельніцтва);
выраб пячаткі кампаніі.

Камерцыйныя арганізацыі могуць самастойна вызначаць памер статутнага фонду, які аб'яўляецца ў беларускіх рублях (ён павінен быць сфарміраваны на працягу 12 месяцаў з даты дзяржаўнай рэгістрацыі).

Мінімальны статутны фонд замацаваны толькі для акцыянерных таварыстваў. Ён устанаўліваецца ў беларускіх рублях зыходзячы з памеру базавай велічыні (на дзень прадстаўлення дакументаў у рэгіструючы орган):

для ЗАТ – 100 базавых велічынь;
для ААТ – 400 базавых велічынь.

Колькі доўжыцца працэс стварэння кампаніі ў Беларусі?

У кожным выпадку магчымы нюансы, але ў сярэднім тэрміны наступныя.

Пры адкрыцці прадстаўніцтва працэс разгляду дакументаў займае каля 10 дзён.

Пры стварэнні юрыдычнай асобы:

у дзень падачы дакументаў – на статуце (устаноўчым дагаворы) кампаніі ставіцца штамп, які сведчыць аб правядзенні дзяржаўнай рэгістрацыі;
не пазней за рабочы дзень, што ідзе за днём падачы дакументаў – выдаецца пасведчанне аб дзяржаўнай рэгістрацыі;
на працягу пяці рабочых дзён – выдаецца дакумент, які пацвярджае пастаноўку на ўлік (аўтаматычна) у падатковых органах, органах дзяржаўнай статыстыкі, органах Фонду сацыяльнай абароны насельніцтва Міністэрства працы і сацыяльнай абароны, рэгістрацыю ў Беларускім рэспубліканскім унітарным страхавым прадпрыемстве "Белдзяржстрах".

Працэс займае больш часу ў акцыянерных таварыстваў, якія павінны зарэгістраваць свой выпуск акцый у Дзяржаўным рэестры каштоўных папер.

Помніце, што збор неабходных дакументаў таксама займае час. Варта ўлічыць і час, неабходны для засведчання афіцыйных дакументаў натарыусам.

версія для друку