Бізнес-навіны

У Мінсельгасхарчы расказалі аб напрамках супрацоўніцтва з Сібірскай федэральнай акругай Расіі

Фота з архiва

29 красавіка, Мінск /Кар. БЕЛТА/. Якія асноўныя напрамкі супрацоўніцтва развівае Беларусь з рэгіёнамі Сібірскай федэральнай акругі Расіі, расказала карэспандэнту БЕЛТА начальнік галоўнага ўпраўлення знешнеэканамічнай дзейнасці Міністэрства сельскай гаспадаркі і харчавання Ксенія Мялешка.

"Нягледзячы на значную аддаленасць ад Цэнтральнай федэральнай акругі, мы працуем з Новасібірскім і Іркуцкім рэгіёнамі. Мы зацікаўлены развіваць пастаўкі ў Сібірскую федэральную акругу Расіі", - падкрэсліла Ксенія Мялешка.

Паводле яе слоў, у 2022 годзе назіраўся ўстойлівы рост тавараабароту з Новасібірскам адносна 2021 года. "У гэтым годзе пастаўкі беларускіх прадуктаў харчавання ў Новасібірскую вобласць выраслі. У структуры экспарту малочная група займае больш за палавіну. Таксама ў ходзе візіту (урадавай дэлегацыі на чале з прэм'ер-міністрам Беларусі Раманам Галоўчанкам. - Заўвага БЕЛТА) прайшоў кірмаш-продаж беларускіх тавараў, у якім нашы прадпрыемствы мяса-малочнай прамысловасці прэзентавалі сваю прадукцыю", - паведаміла начальнік галоўнага ўпраўлення знешнеэканамічнай дзейнасці Мінсельгасхарча.

Прапрацоўваецца пытанне пастаўкі жывёлагадоўчага абсталявання вытворчасці "Гомельагракамплект". "Да візіту ўрадавай дэлегацыі адбылася відэаканферэнцыя па ўдакладненні некаторых пытанняў супрацоўніцтва. Для больш дэталёвай прапрацоўкі гэтага пытання, зацікаўленыя ў рабоце з "Гомельагракамплектам" новасібірскія кампаніі пацвердзілі ўжо свой удзел у выстаўцы "Белагра". Там яны плануюць больш падрабязна азнаёміцца з прадукцыяй беларускага вытворца", - растлумачыла Ксенія Мялешка.

З Новасібірскам у Беларусі добра развіваецца і навуковае супрацоўніцтва ў галіне раслінаводства. Ёсць пагадненне паміж НПЦ НАН Беларусі па земляробстве і Сібірскім навукова-даследчым інстытутам раслінаводства і селекцыі. Праводзіцца абмен узорамі сельскагаспадарчых культур для разгляду пытанняў іх выкарыстання ў селекцыйным працэсе.

Узаемны тавараабарот  Беларусі з Іркуцкім рэгіёнам таксама расце. "Цяпер мы працуем над павелічэннем экспартных паставак і пашырэннем аб'ёмаў адгрузкі ў Іркуцк. Што датычыцца перспектыўных напрамкаў, то размова ідзе аб адгрузцы беларускімі вытворцамі ветэрынарных прэпаратаў на гэты рынак. У ходзе візіту заключана адпаведнае пагадненне. Акрамя прадуктаў харчавання ў Іркуцк таксама пастаўляюцца запасныя часткі і абсталяванне для патрэб малочнатаварных ферм беларускай вытворчасці", - рэзюмавала Ксенія Мялешка.

Як паведамлялася, урадавая дэлегацыя на чале з прэм'ер-міністрам Беларусі Раманам Галоўчанкам з 26 па 28 красавіка наведала з рабочым візітам тры расійскія рэгіёны - Новасібірскі, Іркуцкі і Свярдлоўскі. Паводле слоў прэм'ер-міністра, Беларусь эфектыўна ўзаемадзейнічае з Расійскай Федэрацыяй як на федэральным, так і на рэгіянальным узроўні.

версія для друку

зрабіць стартавай

дабавіць у выбранае