Бізнес-навіны

Тамбоўскія збожжатрэйдары зацікаўлены ў рэалізацыі пшаніцы праз БУТБ

Фота з архiва

1 жніўня, Мінск /Кар. БЕЛТА/. Тамбоўскія збожжатрэйдары зацікаўлены ў рэалізацыі пшаніцы праз Беларускую ўніверсальную таварную біржу, паведамілі БЕЛТА ў прэс-службе БУТБ.

У ходзе візіту дэлегацыі Беларускай універсальнай таварнай біржы ў Тамбоўскую вобласць РФ праведзены перагаворы з буйнымі экспарцёрамі збожжавых культур, гатовых пастаўляць гэту прадукцыю на рынак Беларусі праз біржавую пляцоўку. У выніку адзін са збожжатрэйдараў падаў ужо дакументы на акрэдытацыю і ў бліжэйшы час размесціць першыя заяўкі на продаж. Кампанія плануе рэалізоўваць на біржавых таргах харчовую пшаніцу 3-га і 4-га класаў, якая шырока прымяняецца ў беларускай харчовай прамысловасці.

"Тамбоўская вобласць рэгулярна ўваходзіць у тройку вядучых вытворцаў збожжавых у Цэнтральнай федэральнай акрузе, а пшаніца з'яўляецца адной з ключавых экспартных таварных пазіцый рэгіёна. Таму прыцягненне на біржавую платформу тамбоўскіх збожжавытворцаў і збожжатрэйдараў не толькі забяспечыць беларускія сельгаспрадпрыемствы запатрабаванай сыравінай, але і ў цэлым пасадзейнічае развіццю біржавога гандлю паміж Беларуссю і Тамбоўскай вобласцю. Цяпер на біржы акрэдытаваны 11 суб'ектаў гаспадарання з гэтага рэгіёна. Пераважна гэта кампаніі аграпрамысловага комплексу і машынабудаўнічай галіны", - расказалі ў прэс-службе БУТБ.

Мяркуецца, што далейшая работа БУТБ па ўключэнні ў біржавы гандаль вытворцаў і пастаўшчыкоў з Тамбоўскай вобласці будзе праводзіцца сумесна з рэгіянальным Цэнтрам падтрымкі экспарту (ЦПЭ). Гэта арганізацыя прадастаўляе кансультацыйную і фінансавую дапамогу суб'ектам гаспадарання Тамбоўскай вобласці, якія вядуць знешнегандлёвую дзейнасць. У 2023 годзе падтрымкай ЦПЭ скарысталіся звыш 250 тамбоўскіх кампаній і індывідуальных прадпрымальнікаў. Ва ўзаемадзеянні з БУТБ асноўныя намаганні будуць сканцэнтраваны на прадстаўніках малога бізнесу і мікрапрадпрыемствах, для якіх біржа паслужыць дадатковым інструментам экспартных продажаў.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

За студзень-ліпень 2023 года на БУТБ рэалізавана 157,6 тыс. т збожжа, што на 51 працэнт больш, чым за аналагічны перыяд 2022 года. Звыш 26 працэнтаў ад гэтага аб'ёму, або 41,8 тыс. т, забяспечылі расійскія ўдзельнікі таргоў. Пры гэтым у параўнанні з мінулым годам імпарт расійскага збожжа праз біржавую платформу вырас у 2,8 раза.

версія для друку

зрабіць стартавай

дабавіць у выбранае