Бізнес-навіны

Што дае Беларусі ўвод у эксплуатацыю атамнай станцыі? Мінэнерга пра перавагі БелАЭС

Фота з архiва

8 верасня, Мінск /Кар. БЕЛТА/. Намеснік міністра энергетыкі Міхаіл Міхадзюк расказаў, што дае Беларусі ўвод у эксплуатацыю атамнай станцыі. На гэта пытанне ён адказаў у час грамадскіх слуханняў перад выдачай ліцэнзіі на эксплуатацыю другога энергаблока Беларускай АЭС, перадае карэспандэнт БЕЛТА.

"Увод БелАЭС дасць магчымасць павысіць узровень энергетычнай бяспекі за кошт дыверсіфікацыі паліўна-энергетычных рэсурсаў і зніжэння долі прыроднага газу ў паліўна-энергетычным балансе. Спажыванне прыроднага газу зменшыцца на 4,5-5 млрд куб.м у год, валютныя затраты на энергарэсурсы зменшацца на $550 млн штогод. Таксама ўвод БелАЭС дасць магчымасць скараціць выкіды парніковых газаў у атмасферу больш як на 7 млн т у год, што асабліва важна ва ўмовах змянення клімату", - сказаў Міхаіл Міхадзюк.

Ён адзначыў, што перавагі выкарыстання мірнага атама ўжо адчувальныя і даюць эфект. "З моманту ўключэння першага энергаблока БелАЭС у энергасістэму (3 лістапада 2020 года) ім ужо выпрацавана больш за 17,6 млрд кВт.гадз электраэнергіі. Другі энергаблок, які мы ўпершыню ўключылі ў сістэму 13 мая ў рамках пусканаладачных работ, на сёння выпрацаваў 1,1 млрд кВт.гадз. У цэлым БелАЭС ужо выпрацавала амаль 19 млрд кВт.гадз, што дало магчымасць краіне замясціць каля 5 млрд куб.м імпартуемага прыроднага газу", - адзначыў намеснік міністра.

Акрамя таго, запуск БелАЭС дасць магчымасць вывесці з эксплуатацыі шэраг устарэлых і ўжо эканамічна не эфектыўных энергаблокаў на электрастанцыях Беларусі і значна павысіць экспартны патэнцыял беларускай энергасістэмы. "Мы сёння поўнасцю адмовіліся ад імпарту электраэнергіі. У бягучых знешніх умовах экспарту няма, але гэта часова", - падкрэсліў Міхаіл Міхадзюк.

Яшчэ адзін немалаважны эфект - развіццё рэгіёнаў. Акрамя таго, дзякуючы БелАЭС для нацыянальнай эканомікі створаны новыя магчымасці па развіцці электратранспарту. Сёння ў краіне больш за 700 электразаправачных станцый, колькасць электрамабіляў расце. Акрамя таго, развіццё атамнай энергетыкі адыгрывае ролю для стварэння больш камфортных умоў пражывання насельніцтва - пераводу на электраэнергію для патрэб ацяплення і гарачага водазабеспячэння. Ёсць планы па будаўніцтве новага электрыфікаванага жылля і электрыфікацыі існуючага жылога фонду.

Таксама важны напрамак - прыцягненне ў краіну новых перадавых тэхналогій і стварэнне новых электраёмістых вытворчасцей, перавод тэхналогій з прыроднага газу на электраэнергію, стварэнне інавацыйных напрамкаў у навуцы, адукацыі. Усяму гэтаму будзе садзейнічаць Беларуская АЭС.

версія для друку

зрабіць стартавай

дабавіць у выбранае