Бізнес-навіны

Пархомчык: тавараабарот Беларусі і Зімбабвэ з 2018 года вырас у восем разоў, важна захаваць дынаміку

Фота з архiва

5 верасня, Мінск /Кар. БЕЛТА/. Тавараабарот Беларусі і Зімбабвэ з 2018 года вырас у восем разоў, важна захаваць дынаміку. Аб гэтым заявіў намеснік прэм'ер-міністра Беларусі Пётр Пархомчык у час інаўгурацыі прэзідэнта Зімбабвэ Эмерсана Мнангагвы, паведамілі карэспандэнту БЕЛТА ў прэс-службе ўрада.

У ходзе сустрэчы Пётр Пархомчык перадаў віншаванні ад Прэзідэнта Беларусі, усяго беларускага народа і сябе асабіста з перавыбраннем Эмерсана Мнангагвы на пасаду кіраўніка Зімбабвэ.

На сустрэчы віцэ-прэм'ер адзначыў, што Беларусь з задавальненнем назірае за тым, як Зімбабвэ актыўна развіваецца ў сацыяльна-эканамічным плане. "Ваш урад правільна расстаўляе прыярытэты і ўдзяляе вялікую ўвагу комплекснаму развіццю ўсіх галін, уключаючы сельскую гаспадарку, энергетыку, прамысловасць і інфраструктуру", - адзначыў ён.

Пётр Пархомчык выказаў упэўненасць, што вывераныя кіраўніцтвам краіны стратэгічныя рашэнні, сістэмны падыход у рэалізацыі намечаных планаў, працавітасць і адзінства грамадзян забяспечаць працвітанне Зімбабвэ.

"З моманту пачатку вашага прэзідэнцтва супрацоўніцтва паміж нашымі краінамі значна актывізавалася, перайшоўшы, на маю думку, на якасна новы ўзровень. Немалая заслуга ў гэтым - ваш асабісты ўдзел у развіцці партнёрскіх адносін паміж Беларуссю і Зімбабвэ і пацвярджэнне на самым высокім узроўні імкнення да прадаўжэння ўмацавання і паглыблення двухбаковага ўзаемадзеяння", - звярнуўся беларускі віцэ-прэм'ер да прэзідэнта афрыканскай краіны.

Ён дадаў, што за апошнія гады краіны значна пашырылі гандлёва-эканамічнае ўзаемадзеянне, умацавалі палітычныя сувязі, наладзілі гуманітарнае супрацоўніцтва, пашырылі дагаворна-прававую базу адносін.

Намеснік кіраўніка беларускага ўрада з задавальненнем канстатаваў актыўны рост тавараабароту паміж краінамі: "З 2018 года ён вырас у восем разоў. Пры гэтым мы не абмяжоўваемся чыстым гандлем, а сумесна працуем над імплементацыяй доўгатэрміновых інвестыцыйных праектаў у сферах сельскай гаспадаркі, лёгкай прамысловасці, здабычы карысных выкапняў, ахове здароўя, прамысловай кааперацыі. Безумоўна, гэта стала магчымым дзякуючы кантактам на самым высокім узроўні. Нагадаем, што ў студзені гэтага года адбыўся дзяржаўны візіт Прэзідэнта Беларусі Аляксандра Лукашэнкі ў Зімбабвэ. Нам важна не страціць высокую дынаміку адносін і ўжо сёння думаць пра будучыя сумесныя праекты".

На заканчэнне сустрэчы Пётр Пархомчык адзначыў, што беларускі бок адкрыты для дыялогу па ўсіх пытаннях, якія цікавяць зімбабвійскі бок, і гатовы да прадметнага абмеркавання ўсіх напрамкаў узаемадзеяння.

версія для друку

зрабіць стартавай

дабавіць у выбранае