Бізнес-навіны

Новасібірская вобласць плануе падвоіць пастаўкі беларускіх камбайнаў з 2024 года

11 кастрычніка, Мінск /Кар. БЕЛТА/. Новасібірская вобласць зацікаўлена падвоіць пастаўкі беларускіх камбайнаў з 2024 года. Аб гэтым на шостым пасяджэнні Савета дзелавога супрацоўніцтва Беларусі і Новасібірскай вобласці РФ заявіў губернатар Новасібірскай вобласці Андрэй Траўнікаў, перадае карэспандэнт БЕЛТА.

"За апошнія два гады ўзаемадзеянне з Беларуссю па многіх пытаннях выйшла на новы ўзровень. Урад Новасібірскай вобласці ўсяляк падтрымлівае стварэнне цэнтра мультыбрэндавай беларускай тэхнікі на базе "МТЗ-Сібір". Акрамя таго, развіваецца супрацоўніцтва па мадэрнізацыі камбайнаў. У гэтым годзе плануем выйсці на праграму па іх стварэнні, абмеркаваць камерцыйныя і тэхнічныя дэталі, а таксама ўмовы выхаду на падваенне аб'ёму паставак з 2024 года", - сказаў губернатар.

Паводле слоў Андрэя Траўнікава, беларуская кампанія "Магілёўліфтмаш" паставіла ў мінулым годзе ў Новасібірскую вобласць 37 ліфтаў, а за I паўгоддзе 2023 года - ужо 30. "Плануецца, што да канца года мы закупім яшчэ мінімум 22 ліфты. Акрамя таго, Міністэрства ЖКГ і энергетыкі Новасібірскай вобласці дамовілася з беларускай фірмай "Палімерканструкцыя" аб удзеле ў рэалізацыі праекта па будаўніцтве і рэканструкцыі ачышчальных збудаванняў на тэрыторыі нашага рэгіёна. Сёння прапрацоўваюцца ўжо два такія праекты", - дадаў губернатар.

Ён таксама расказаў аб развіцці супрацоўніцтва з нашай краінай у галіне біятэхналогій. Акрамя таго, плануюцца сумесныя праекты па падтрымцы таленавітых дзяцей, ваенна-патрыятычным выхаванні. За апошнія два гады пашырана і дэталізавана супрацоўніцтва ў навуковай сферы. "Пул з больш як 40 праектаў дапоўнены праектамі ў IT-сферы і ў галіне медыцынскіх тэхналогій. У сферы адукацыі прадоўжылі ўмацаванне ўзаемадзеяння ўніверсітэтаў-партнёраў. Цяпер дзейнічае некалькі дзясяткаў пагадненняў паміж ВНУ. Студэнты, аспіранты і выкладчыкі не толькі актыўна ўдзельнічаюць у сумесных навуковых і адукацыйных мерапрыемствах, але і рэалізуюць сумесныя праекты. Думаю, ёсць яшчэ пункты росту, дзе наша ўзаемадзеянне можа быць больш прадметным і плённым", - рэзюмаваў Андрэй Траўнікаў.

версія для друку

зрабіць стартавай

дабавіць у выбранае