Бізнес-навіны

Імпартазамяшчэнне, транспарт і АПК: губернатар Уладзімірскай вобласці пра цікавасць да галін Беларусі

16 мая, Мінск /Кар. БЕЛТА/. Губернатар Уладзімірскай вобласці Расіі Аляксандр Аўдзееў на сустрэчы з прэм'ер-міністрам Беларусі Раманам Галоўчанкам расказаў пра інтарэсы расійскага рэгіёна ў Беларусі, паведамляе карэспандэнт БЕЛТА.

Беларусь з'яўляецца надзейным і традыцыйным партнёрам Уладзімірскай вобласці і займае другое месца сярод краін СНД па ўзроўні тавараабароту, сказаў Аляксандр Аўдзееў. "Структуры эканомікі Беларусі і Уладзімірскай вобласці падобныя. Аснова - прамысловасць і сельская гаспадарка. Гэта якраз тое, на што трэба зрабіць упор пры выбудоўванні кааперацыйных сувязей, - адзначыў ён. - Традыцыйна заслужаным попытам ва Уладзімірскай вобласці карыстаецца беларуская сельгастэхніка, і ў бліжэйшы год мы плануем закупіць вялікую колькасць такой тэхнікі".

Дэлегацыя расійскага рэгіёна ўжо наведала прамысловыя прадпрыемствы Беларусі і азнаёмілася з лінейкай выпускаемай прадукцыі. "У сярэднетэрміновай перспектыве мы намецілі абнаўленне парку грамадскага транспарту. Многія расійскія рэгіёны ўжо супрацоўнічаюць з беларускімі вытворцамі. Ва Уладзіміры таксама ў хуткім часе будуць заменены каля ста аўтобусаў. Мы разглядаем прадукцыю мінскіх вытворцаў", - сказаў кіраўнік расійскага рэгіёна. 

У рамках візіту дэлегацыі прайшло пасяджэнне рабочай групы па супрацоўніцтве Беларусі і Уладзімірскай вобласці, на якім падпісана больш за 10 пагадненняў і абазначаны планы па развіцці супрацоўніцтва на бліжэйшыя гады, нагадаў губернатар. "Мы прадаўжаем работу па сельскагаспадарчым напрамку. Гэта пастаўка насення, саджанцаў. У нас у вобласці знаходзяцца буйнейшыя прадпрыемствы па перапрацоўцы мяса, каўбасных вырабаў і паўфабрыкатаў, аднак аб'ёмы вытворчасці мяса ў нас нізкія. Таму мы бачым вялікую перспектыву ў супрацоўніцтве з беларускімі аграрнымі прадпрыемствамі", - растлумачыў ён.

Аляксандр Аўдзееў таксама адзначыў, што ў Беларусі і Уладзімірскай вобласці ёсць добры патэнцыял у будаўніцтве жылля і сацыяльных аб'ектаў. "У нас вялікая праграма індустрыяльнага развіцця, з'яўляецца шмат рабочых месцаў і для іх неабходна будаваць жыллё", - сказаў губернатар.

Акрамя таго, Беларусь і Уладзімірская вобласць працуюць у галіне імпартазамяшчэння. "Мы актыўна замяшчаем абсталяванне, матэрыялы, тэхніку, кампаненты і розныя гатовыя вырабы, якія сталі недаступны ў сувязі з санкцыямі. Прадпрыемствы Уладзімірскай вобласці гатовы супрацоўнічаць з прадпрыемствамі Беларусі па розных напрамках. І мы якраз стыкуем патрэбнасці прадпрыемстваў, каб знайсці выгадныя кааперацыйныя сувязі", - сказаў на заканчэнне ён.

версія для друку

зрабіць стартавай

дабавіць у выбранае