Бізнес-навіны

Куба з дапамогай Беларусі мае намер узмацніць свой аграпрамысловы комплекс

10 лістапада, Мінск /Кар. БЕЛТА/. Куба з дапамогай Беларусі мае намер узмацніць свой аграпрамысловы комплекс. Аб гэтым сказаў журналістам прэм'ер-міністр Кубы Мануэль Марэра Крус па выніках сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

Кіраўнік кубінскага ўрада падрабязна расказаў аб выніках перагавораў з Прэзідэнтам. У першую чаргу прэм'ер-міністр перадаў прывітанне беларускаму народу ад кубінскага. "Я прывёз таксама вельмі цёплае прывітанне Прэзідэнту Беларусі ад генерала арміі Рауля Кастра Руса і Прэзідэнта Кубы Мігеля Марыа Дыяс-Канеля Бермудэса, - сказаў ён. - Мы поўнасцю супалі ў думцы, што мы не проста дружалюбныя краіны, а братэрскія краіны. І таксама мы поўнасцю супалі ў думках з Аляксандрам Лукашэнкам, што мы не задаволены ўзроўнем гандлёва-эканамічнага супрацоўніцтва, які ёсць цяпер, у параўнанні з цудоўным узроўнем палітычнага ўзаемадзеяння, якое ёсць паміж нашымі краінамі".

Прэм'ер-міністр адзначыў, што Беларусь і Куба з'яўляюцца добрымі саюзнікамі на міжнародных пляцоўках. "Асноўная мэта - давесці ўзровень гандлёва-эканамічнага ўзаемадзеяння да таго ўзроўню, які існуе ў сферы палітычнага супрацоўніцтва", - падкрэсліў кубінскі госць.

"Мы правялі вялікую работу, вылучылі прыярытэтныя напрамкі ўзаемадзеяння, застаецца канкрэтызаваць двухбаковыя праекты, - дадаў Мануэль Марэра Крус, каменціруючы перагаворы з Аляксандрам Лукашэнкам. - У першую чаргу размова ідзе аб умацаванні харчовай сельскагаспадарчай сферы на Кубе і павелічэнні вытворчасці прадуктаў харчавання. Мы ведаем, што ў вашай краіне ў неабходнай колькасці вырабляюцца прадукты харчавання і нават ёсць іх лішкі, - сказаў Мануэль Марэра Крус. - Цяпер мы вядзём размову аб стварэнні сумеснай вытворчасці. З беларускага боку гэта мяса-малочная кампанія, з кубінскага - прадпрыемства, якое мае адпаведную вытворчую інфраструктуру. Асноўная мэта - прыцягваць беларускую сыравіну і на плошчах СП выпускаць шырокую гаму малочнай прадукцыі для Кубы з магчымасцю яе экспарту ў Карыбскі рэгіён і ўсю Лацінскую Амерыку. Абмяркоўваецца таксама магчымасць перапрацоўкі мяса".

Паводле яго слоў, іншая прыярытэтная тэма - гэта прамысловасць. "Зроблены неабходныя крокі па арганізацыі зборкі беларускіх трактароў, грузавых аўтамабіляў і аўтобусаў", - заўважыў прэм'ер-міністр.

Яшчэ адзін важны напрамак - сфера біятэхналогій і медыкаментаў. "У рамках візіту будуць падпісаны тры кантракты, якія дадуць магчымасць зарэгістраваць і рэалізоўваць фармацэўтычную кубінскую прадукцыю ў Беларусі і беларускую фармпрадукцыю на Кубе", - дадаў Мануэль Марэра Крус. Ён таксама расказаў аб узаемадзеянні ў сферы навукі і паміж банкамі дзвюх краін.

Аляксандр Лукашэнка ў час перагавораў падкрэсліў: "Нам трэба правесці рэвізію нашых адносін і вычленіць тыя напрамкі, па якіх мы будзем супрацоўнічаць".

Мануэль Марэра Крус прыбыў з афіцыйным візітам у Беларусь 9 лістапада. У яго таксама запланаваны перагаворы з прэм'ер-міністрам Раманам Галоўчанкам, кіраўнікамі абедзвюх палат беларускага парламента і членамі рабочай групы Нацыянальнага сходу па супрацоўніцтве з парламентам Кубы. Мануэль Марэра Крус азнаёміцца з прамысловым патэнцыялам Беларусі і яе магчымасцямі ў перапрацоўцы мясной і малочнай сыравіны.

Цяпер абедзве краіны сканцэнтраваны на тым, каб нарасціць узаемны тавараабарот. У ліпені Кубу з афіцыйным візітам наведала беларуская дэлегацыя на чале з міністрам замежных спраў Сяргеем Алейнікам. Тады бакі абмеркавалі ўвесь спектр беларуска-кубінскіх адносін і спосабы іх актывізацыі, у тым ліку праз механізм двухбаковай камісіі па гандлёва-эканамічным супрацоўніцтве. Традыцыйна асаблівая ўвага была ўдзелена пастаўкам беларускай тэхнікі і запасных частак, запатрабаваных прадуктаў харчавання і іншай беларускай прадукцыі.

версія для друку

зрабіць стартавай

дабавіць у выбранае