Бізнес-навіны

Кітайская кампанія дапаможа прыцягнуць пастаўшчыкоў і заказчыкаў на пляцоўку імпартазамяшчэння БУТБ

Фота з архiва

19 ліпеня, Мінск /Кар. БЕЛТА/. Кітайская кампанія дапаможа прыцягнуць пастаўшчыкоў і заказчыкаў на пляцоўку імпартазамяшчэння Беларускай універсальнай таварнай біржы, паведаміў карэспандэнту БЕЛТА прэс-сакратар БУТБ Раман Яніў.

Кітайская кампанія China Merchants CHN-BLR Commerce and Logistics Company (CMCB), якая ўваходзіць у склад карпарацыі China Merchants Group, будзе аказваць садзейнічанне ў прыцягненні пастаўшчыкоў і заказчыкаў з Кітая на электронную пляцоўку імпартазамяшчэння таварнай біржы. Бакі дамовіліся аб гэтым па выніках візіту прадстаўнікоў CMCB у цэнтральны офіс БУТБ.

З мэтай аптымізацыі затрат на лагістыку CMCB сумесна з БУТБ прапрацуюць альтэрнатыўныя маршруты дастаўкі ў Кітай набытых на біржы беларускіх тавараў з прымяненнем розных відаў транспарту. Гэта работа будзе праводзіцца ў рамках падпісанага ў красавіку бягучага года мемарандума аб супрацоўніцтве паміж БУТБ і CMCB, які прадугледжвае ўзаемадзеянне бакоў у галіне транспартнай і гандлёвай лагістыкі.

На думку прадстаўнікоў CMCB, паступовая адмена абмежаванняў, уведзеных у Кітаі ў сувязі з пандэміяй COVID-19, будзе садзейнічаць актывізацыі дзелавых кантактаў паміж беларускімі і кітайскімі кампаніямі, у тым ліку ў сферы гандлю імпартазамяшчальнымі таварамі. Аб перспектыўнасці такога напрамку сведчаць і вынікі аналізу заявак на куплю, размешчаных на пляцоўцы імпартазамяшчэння БУТБ. "Пры афармленні заяўкі многія беларускія прадпрыемствы пазначаюць Кітай у графе "краіна-вытворца". Гэта асабліва характэрна для такіх катэгорый тавараў, як электраабсталяванне, сродкі сувязі, а таксама кампаненты і матэрыялы для прамысловасці. Пакуль на біржавой гандлёвай платформе працуюць толькі некалькі пастаўшчыкоў імпартазамяшчальнай прадукцыі з КНР, аднак у бліжэйшы час іх колькасць можа павялічыцца. У першую чаргу за кошт кітайскіх кампаній, якія ўжо акрэдытаваны на БУТБ, але ўдзельнічаюць у таргах па іншых таварных секцыях", - расказалі ў прэс-службе біржы.

Што датычыцца пытанняў лагістыкі, то, нягледзячы на пэўныя складанасці, звязаныя з недаступнасцю традыцыйных транспартных калідораў, дастаўка тавараў з Беларусі ў Кітай і назад ажыццяўляецца ў штатным рэжыме. Зразумела, падаўжэнне лагістычнага пляча адмоўна паўплывала на кошт і тэрміны перавозкі, але, паводле слоў прадстаўнікоў CMCB, большасць удзельнікаў рынку ўжо адаптаваліся да новых умоў і сур'ёзных праблем не бачаць.

версія для друку

зрабіць стартавай

дабавіць у выбранае