Бізнес-навіны

Каранкевіч: Беларусь прыхільная да сусветных трэндаў нізкавугляроднай эканомікі

Фота Мінэнерга

11 кастрычніка, Масква /Эдуард Півавар - БЕЛТА/. Беларусь прыхільная да сусветных трэндаў нізкавугляроднай эканомікі. Аб гэтым заявіў міністр энэргетыкі Беларусі Віктар Каранкевіч, выступаючы 11 кастрычніка ў Маскве на міжнародным форуме "Расійскі энергетычны тыдзень", паведамляе карэспандэнт БЕЛТА.

"Беларусь прытрымліваецца агульнасусветных трэндаў па пераходзе да зялёнай эканомікі і нізкавугляроднага развіцця, - сказаў Віктар Каранкевіч. - Гэта замацавана ў важнейшых праграмных дакументах, у тым ліку канцэпцыяй энергетычнай бяспекі, нацыянальнай стратэгіяй устойлівага развіцця краіны на перыяд да 2035 года".

Ён адзначыў, што для энергетычнага комплексу краіны прыярытэтна задача па задавальненні патрэбнасцей рэальнага сектара эканомікі і насельніцтва ў энергарэсурсах на аснове іх максімальна эфектыўнага выкарыстання пры зніжэнні нагрузкі на навакольнае асяроддзе. У галіне шырока рэалізуюцца комплексныя меры па энергазберажэнні і павышэнні энергаэфектыўнасці, зніжэнні залежнасці ад вуглевадароднай сыравіны, максімальным уключэнні ў паліўна-энергетычны баланс мясцовых відаў паліва.

"Асаблівая ўвага ўдзяляецца ўкараненню нізкавугляродных тэхналогій, мадэрнізацыі электрасеткавай інфраструктуры, аўтаматызацыі і лічбавізацыі вытворчых працэсаў. Па гэтых напрамках мы ўзаемадзейнічаем з партнёрамі па Саюзнай дзяржаве, Еўразійскім эканамічным саюзе. Зацікаўлены не толькі ў абмене вопытам, але і ў рэалізацыі ўзаемавыгадных сумесных праектаў", - падкрэсліў міністр.

БелАЭС адкрыла новыя магчымасці для развіцця зялёных сектараў эканомікі: атамная станцыя, пабудаваная дзяржкарпарацыяй "Расатам" у адпаведнасці з самымі сучаснымі і высокімі патрабаваннямі бяспекі, займае важнае месца ў зялёным парадку дня Беларусі, адзначыў Віктар Каранкевіч. "Станцыя забяспечвае не толькі ўмацаванне энергетычнай самастойнасці краіны (з уводам другога энергаблока АЭС штогод будзе генерыраваць каля 18,5 млрд кВт.гадз, што дазволіць задаволіць больш за 40 працэнтаў унутраных патрэбнасцей у электраэнергіі), але і ўносіць важкі ўклад у агульную справу па змякчэнні наступстваў змянення клімату за кошт скарачэння выкідаў парніковых газаў", - дадаў міністр. З моманту ўключэння першага энергаблока БелАЭС у аб'яднаную энергасістэму станцыя выпрацавала больш за 20 млрд кВт.гадз электраэнергіі, што дазволіла замясціць 5,3 млрд куб. м прыроднага газу, скараціць выкіды парніковых газаў на 9 млн т.

"БелАЭС дала магутны імпульс для развіцця перспектыўных зялёных напрамкаў і сектараў эканомікі, - звярнуў увагу Віктар Каранкевіч. - Гэта энергаёмістыя вытворчасці, будаўніцтва шматкватэрнага і індывідуальнага электрыфікаванага жылля, выкарыстанне электраэнергіі для мэт ацяплення і гарачага водазабеспячэння".

Ён дадаў, што многае робіцца для развіцця электратранспарту. За кошт прынятых на ўзроўні кіраўніка дзяржавы і ўрада стымулюючых мер, пашырэння зараднай інфраструктуры колькасць электрамабіляў у Беларусі расце з году ў год. Пашыраецца колькасць сучасных электробусаў у гарадскіх аўтапарках. У некалькіх гарадах краіны - Шклове і Жодзіне - рэалізуюцца ўнікальныя праекты па поўным пераводзе ўсяго грамадскага транспарту на электрычны.

Форум праходзіць у Маскве з 11 па 13 кастрычніка. Ён сабраў больш за 4 тыс. удзельнікаў больш як з 60 краін і тэрыторый. Дзелавой праграмай форуму прадугледжана каля 30 мерапрыемстваў. Яго асноўная тэма - "Новая рэальнасць сусветнай энергетыкі: ствараючы будучыню".

версія для друку

зрабіць стартавай

дабавіць у выбранае