Бізнес-навіны

Якія новыя ўмовы і льготы гатова прапанаваць Беларусь інвестарам? Растлумачыў прэм'ер-міністр

22 чэрвеня, Мінск /Кар. БЕЛТА/. Прэм'ер-міністр Раман Галоўчанка па выніках нарады Прэзідэнта Беларусі Аляксандра Лукашэнкі з кіраўніцтвам Савета Міністраў у пашыраным складзе расказаў аб навацыях для інвестараў, якія плануецца замацаваць у новым тэматычным законапраекце, перадае карэспандэнт БЕЛТА.

На разгляд кіраўніку дзяржавы быў унесены законапраект аб садзейнічанні і стымуляванні рэалізацыі інвестыцыйных праектаў. Дакумент павінен прыйсці на змену Дэкрэту нумар 10, які ў свой час быў прарыўным і амаль 15 гадоў служыў прававой асновай гэтай сферы. "Дэкрэт па інвестыцыях быў адным з самых перадавых і прагрэсіўных калі не ў свеце, то ў нашым рэгіёне дакладна. І гэта дало свой адчувальны эфект з пункту гледжання прыцягнення сюды інвестараў, стварэння новых вытворчасцей. Але, на жаль, дэкрэт жа не запатэнтуеш. Таму многія нашы суседзі сталі карыстацца беларускімі ноу-хау, якія змяшчаліся ў дэкрэце. Вядома, праз пэўны час узнікла неабходнасць паглядзець, якімі яшчэ інструментамі мы можам скарыстацца, каб захаваць інвестыцыйную актыўнасць", - растлумачыў прэм'ер-міністр.

Пры падрыхтоўцы законапраекта ўлічвалася і міжнародная практыка, і вопыт суседніх краін. "Мне здаецца, урад знайшоў тыя якары, якія дадуць магчымасць прыцягнуць у Беларусь новых інвестараў", - сказаў Раман Галоўчанка.

Пры гэтым размова не ідзе аб прыцягненні любых інвестараў, краіна не адчувае інвестыцыйнага голаду, падкрэсліў прэм'ер-міністр. На гэта звяртаў увагу і кіраўнік дзяржавы на нарадзе. "Толькі прыехаць сюды, як раней гаварылі, і высмактаць усе сокі з народа, выціснуць усё, што можна, заплаціўшы нейкую капейку (падаткі пры гэтым не плаціць, а рабочым, скажам, $500), а асноўны прыбытак вывесці ў выглядзе дывідэндаў у недружалюбныя краіны. Я не думаю, што такія праекты нам патрэбны, - падкрэсліў Аляксандр Лукашэнка. - Сюды трэба прыходзіць не як у бананавую рэспубліку, а як у нармальную высокатэхналагічную, высокаразвітую, і працаваць трэба перш за ўсё са сваімі інвестарамі".

"Сітуацыя з прамымі замежнымі інвестыцыямі ў Беларусі нядрэнная, - растлумачыў Раман Галоўчанка. - Але нам патрэбны інвестары менавіта ў тыя сферы, якія запатрабаваны цяпер эканомікай". Напрыклад, нашай краіне, вядома, патрэбны інвестары ў сферу гандлю і вытворчасці прадуктаў харчавання, але для іх няма неабходнасці дадаткова ствараць нейкія асаблівыя ўмовы. Хапае і таго, што ўжо ёсць.

Але калі гаварыць аб фармацэўтычнай галіне, то тут ёсць зацікаўленасць у прыцягненні новых статусных інвестараў. Справа ў тым, што ў Беларусі больш як 50 працэнтаў медыцынскіх прэпаратаў - айчыннай вытворчасці, але стаіць амбіцыйная задача нарасціць гэту долю да 70 працэнтаў. Дапамагчы ў гэтым павінны новыя інвестпраекты.

Паводле слоў прэм'ер-міністра, па існуючай міжнароднай практыцы інвестары, прыходзячы ў фармацэўтычную галіну, павінны атрымаць гарантаваны аб'ём выкупу сваёй прадукцыі (афсетныя кантракты). "Так склалася, што гэты сектар бізнесу працуе так. У нас такой нормы ў заканадаўстве цяпер не існуе, - адзначыў Раман Галоўчанка. - Прапанавана прымяніць гэта права для шэрага інвестыцыйных дагавораў. Вядома, калі гэта выгадна для дзяржавы. Гэта будзе гарантаваць інвестару, што ён будзе мець гарантаваны попыт на сваю прадукцыю".

Яшчэ адна навацыя, закладзеная ў праект закона, - будаўніцтва за кошт дзяржавы магістральных сетак для рэалізуемага інвестпраекта. Асабліва актуальна гэта для аддаленых ад буйных гарадоў рэгіёнаў краіны, дзе не хапае камунікацый пад магутную вытворчасць. "Мы лічым, што гэта таксама дасць моцны штуршок для рэалізацыі такіх праектаў, асабліва ў рэгіёнах Беларусі", - сказаў прэм'ер-міністр.

Яшчэ адна ініцыятыва ўрада - бюджэтны трансферт на кампенсацыю часткі інвестыцыйных затрат. "Гэта практыка таксама выкарыстоўваецца. У нас яна рэалізуецца ў рамках дзяржаўнай праграмы аграрнага бізнесу, калі будуецца прадпрыемства сельскагаспадарчае або перапрацоўчай прамысловасці і частка затрат кампенсуецца інвестару з бюджэту пасля завяршэння будаўніцтва, і яшчэ частка - пасля выхаду на праектную магутнасць. Гэта альтэрнатыва льготнаму крэдытаванню. І яна цікавая для інвестара, таму што ён адразу атрымлівае так званы кэшбэк ад дзяржавы за тое, што хутка і эфектыўна рэалізаваў праект", - растлумачыў кіраўнік урада.

У ліку новаўвядзенняў таксама надзяленне раённых выканаўчых камітэтаў правам самім заключаць інвестыцыйныя дагаворы, што павінна садзейнічаць рэалізацыі даручэння Прэзідэнта "адзін раён - адзін інвестпраект".

"У цэлым праект закона знайшоў падтрымку ў кіраўніка дзяржавы. Былі дадзены пэўныя даручэнні па дашліфоўцы норм і ўнясенні ва ўстаноўленым парадку ў парламент", - рэзюмаваў Раман Галоўчанка.

версія для друку

зрабіць стартавай

дабавіць у выбранае