Бізнес-навіны
Гандаль, турызм, узаемадзеянне СМІ. Пярцоў правёў перагаворы з кіраўніком Кабардзіна-Балкарыі
9 снежня, Масква /Эдуард Півавар - БЕЛТА/. Міністр інфармацыі Беларусі Уладзімір Пярцоў правёў перагаворы з кіраўніком Кабардзіна-Балкарыі Казбекам Кокавым. Сустрэча прайшла 9 снежня на ВДНГ у Маскве на пляцоўцы міжнароднай выстаўкі-форуму "Расія", перадае карэспандэнт БЕЛТА.
Уладзімір Пярцоў з'яўляецца кіраўніком беларускай часткі рабочай групы па супрацоўніцтве Беларусі з Кабардзіна-Балкарскай Рэспублікай Расійскай Федэрацыі. "Сёння мы папярэдне падвялі вынікі 2023 года, - сказаў ён журналістам. - У нас дынамічна пайшоў тавараабарот у тых групах, якія яшчэ ў 2021 годзе мы нават яшчэ не абмяркоўвалі, гэта значыць, мы запаўняем тыя таварныя нішы, з якіх выйшлі вытворцы з недружалюбных краін. У Кабардзіна-Балкарыі нашы тавары - і бытавая хімія, і лёгкая прамысловасць, і прадукты харчавання - ідуць на ўра, таму што яны высакаякасныя і прыходзяць з роднай для кабардзіна-балкарцаў Беларусі".
Паводле слоў міністра, усе таварныя групы, якія вырабляюцца прадпрыемствамі Беларусі, актыўна закупляюцца гэтай паўночнакаўказскай рэспублікай. "Больш за 100 адзінак сельгастэхнікі толькі за 2023 год прадалі Кабардзіна-Балкарыі, а гэта аграрны рэгіён. Яны паспяхова замяшчаюць амерыканскія і еўрапейскія аналагі, сельгаспрадпрыемствы і фермеры закупляюць па лізінгавых праграмах", - адзначыў ён.
"У нас па многіх напрамках апошнім часам актывізаваліся кантакты, асабліва гандлёва-эканамічныя, - канстатаваў Уладзімір Пярцоў. - Істотна актывізаваўся тавараабарот, хоць ёсць некаторыя разыходжанні ў статыстыцы: па расійскім мытным уліку - гэта плюс больш як 60 працэнтаў па выніках года. Наша беларуская статыстыка паказвае крыху больш сціплы вынік, але гэта звязана з тым, што ўлік тавараабароту ідзе праз тыя рэгіёны, дзе зарэгістраваны гандлёвыя дамы і праз якія пастаўляецца машынабудаўнічая і сельгастэхніка, а таксама іншыя тавары".
Паміж бакамі ідзе напаўненне і гуманітарнага супрацоўніцтва. "У нас ёсць культурныя абмены, але пакуль яшчэ дастаткова слаба ідзе ўзаемадзеянне паміж сродкамі масавай інфармацыі. Я думаю, што гэта стане прадметам перагавораў у пачатку 2024 года ў ходзе візіту дэлегацыі Кабардзіна-Балкарыі ў Беларусь на чале з кіраўніком рэспублікі Казбекам Кокавым", - паведаміў Уладзімір Пярцоў.
Асобна ён спыніўся на сферы турызму. "Нам таксама неабходна развіваць узаемны турыстычны прадукт. У гэтым годзе Кабардзіна-Балкарыю ўжо наведала больш за 1 млн турыстаў. Я не магу сказаць, колькі з іх грамадзян Беларусі, але гэта сапраўды вельмі прыгожы рэгіён з вельмі чыстым паветрам, цудоўнымі прадуктамі, прыгожымі пейзажамі і з самай высокай гарой Еўропы - Эльбрусам. Думаю, што ва ўмовах візавых абмежаванняў і нашым турыстам было б карысна наведаць Кабардзіна-Балкарыю, і кабардзінцам было б цікава наведаць Беларусь. Цяпер такія кантакты наладжваюцца, думаю, у наступным годзе гэты напрамак будзе актывізаваны", - рэзюмаваў міністр.
Уладзімір Пярцоў таксама прыняў удзел у цырымоніі адкрыцця Дня Кабардзіна-Балкарыі на выстаўцы-форуме "Расія" і разам з кіраўніком рэспублікі агледзеў стэнд з дасягненнямі гэтага паўночнакаўказскага рэгіёна.
версія для друку
зрабіць стартавай
дабавіць у выбранае