Бізнес-навіны

ЕАБР расказаў аб перспектывах Еўразійскага транспартнага каркаса для Беларусі

Фота з архiва

14 снежня, Алматы /Кар. БЕЛТА/. Намеснік старшыні праўлення, галоўны эканаміст ЕАБР Яўген Вінакураў на падагульняючай прэс-канферэнцыі Еўразійскага банка развіцця расказаў аб перавагах і перспектывах развіцця Еўразійскага транспартнага каркаса, а таксама аб інтарэсах Беларусі ў гэтым кантэксце, перадае карэспандэнт БЕЛТА.

"Еўразійскі транспартны каркас - комплексная з'ява і, уласна, сутнасць яго ў комплексным падыходзе. Аб'ектамі фінансавання могуць быць дарогі, аэрапорты, сухія парты, марскія тэрміналы - усё, што забяспечвае эфектыўную лагістыку. Сутнасць ідэі Еўразійскага транспартнага каркаса ідэалагічная, філасофская і заключаецца ў тым, што гістарычна на нашай еўразійскай прасторы развіваліся транспартныя калідоры Захад - Усход, заўсёды з часоў Шаўковага шляху ўся лагістыка была сарыентавана па гэтай лініі (Еўропа - Расія - Цэнтральная Азія - Кітай). Цяпер мы падышлі да таго, што вось Захад - Усход трэба дапаўняць воссю Поўнач - Поўдзень. Гэта калідоры праз Каспійскае мора, на захад ад Каспійскага мора, на ўсход ад яго, розныя лініі, якія ідуць плюс-мінус па восі Поўнач - Поўдзень праз Цэнтральную Азію. Паводле нашых разлікаў, спалучэнне восей Захад - Усход і Поўнач - Поўдзень дае да 40 працэнтаў дадатковага эканамічнага эфекту за кошт сінергіі. Ідзе больш грузаў, яны ідуць больш эфектыўна і атрымліваюцца новыя маршруты (настолькі, што нават з'яўляюцца новыя магчымасці для вытворчасці, адкрываюцца новыя нішы для вытворчасцей за кошт новай лагістыкі)", - расказаў Яўген Вінакураў.

Эксперт дадаў: "Такая блакітная мара, дапусцім, па лініі Поўнач - Поўдзень, каб грузы з Еўразіі ішлі да Індыі за 15-17 сутак (цяпер яны ідуць 35-40 сутак) - гэта зусім новы свет. Сутнасць ідэі Еўразійскага транспартнага каркаса, каб да ліній Захад - Усход дабавіць лініі Поўнач - Поўдзень і забяспечыць спалучэнне паміж імі".

"Беларусь, Расія, Казахстан - вельмі вялікі і ключавы выгадаатрымальнік ад Еўразійскага транспартнага каркаса. Цэнтральная Азія - гэта рэгіён, у якім пяць краін не маюць выхаду да Сусветнага акіяна, і цяпер ствараюцца перадумовы, каб з Цэнтральнай Азіі зрабіць транспартнае скрыжаванне, чаго ніколі не было, менавіта праз спалучэнне Захаду - Усходу і Поўначы - Поўдня, - адзначыў галоўны эканаміст ЕАБР. - Па МТК Поўнач - Поўдзень нашы разлікі паказваюць патэнцыял росту з 5 млн т да 25 млн т грузаў, уключаючы кантэйнерызаваныя і некантэйнерызаваныя. Вельмі важны складнік гэтых 25 млн т - аграхарчовая лагістыка: збожжа і кантэйнерызаваныя харчовыя грузы".

Адказваючы на пытанне аб пагадненні аб свабодным гандлі, галоўны эканаміст ЕАБР падкрэсліў, што "ўсе разлікі па гандлі еўразійскай "пяцёркі" з краінамі Паўднёвай і Усходняй Азіі паказваюць, што мы з імі недагандлёўваем, не выкарыстоўваецца ўвесь патэнцыял гандлю з Паўднёвай і Усходняй Азіяй". "Тут мы вяртаемся да транспартнага каркаса, гэтыя калідоры па восі Поўнач - Поўдзень (розныя, не толькі па Каспіі) прызначаны знізіць затраты на лагістыку і павялічыць хуткасць лагістыкі, каб мы маглі дагандлёўваць да свайго патэнцыялу. А пагадненне аб свабодным гандлі дае для гэтага рэгуляторыку", - рэзюмаваў Яўген Вінакураў.

версія для друку

зрабіць стартавай

дабавіць у выбранае