Бізнес-навіны

Дзяржстандарт назваў лепшыя тавары Беларусі 2023 года

Фота з архiва

12 студзеня, Мінск /Кар. БЕЛТА/. Лаўрэатамі конкурсу "Лепшыя тавары Рэспублікі Беларусь" 2023 года прызнаны 293 тавары, выпускаемыя 161 арганізацыяй краіны. Аб гэтым БЕЛТА паведамілі ў прэс-службе Дзяржстандарту.

Так, у намінацыі "Харчовыя тавары" ў ліку лаўрэатаў 174 тавары 72 арганізацый.

У намінацыі "Прамысловыя тавары для насельніцтва і вырабы народных промыслаў" вызначаны 35 тавараў-лаўрэатаў 29 арганізацый, а ў намінацыі "Прадукцыя вытворча-тэхнічнага прызначэння" - 80 тавараў-лаўрэатаў, выпускаемых 62 арганізацыямі.

У намінацыі "Паслугі насельніцтву" звання лаўрэата конкурсу ўдастоены паслугі 4 арганізацый.

Статус "Навінка года", заснаваны для стымулявання выпуску новых відаў прадукцыі, паляпшэння яе характарыстык і ўласцівасцей, прымянення сучасных тэхналогій і матэрыялаў, прысуджаны 54 таварам рознага прызначэння.

Спецыяльнай узнагароды "Лепшы ў галіне" ўдастоены 11 арганізацый рэспублікі, якія набралі найбольшую колькасць балаў у асобным галіновым напрамку.

Спецыяльнай узнагароды "Стабільная якасць" удастоены 18 арганізацый, тавары якіх пацвердзілі званне лаўрэата конкурсу пяць і больш разоў запар. Самі арганізацыі пацвярджалі належную якасць тавараў на працягу года, які папярэднічае году правядзення конкурсу, маюць не менш за тры сертыфікаваныя сістэмы кіравання (менеджменту), а таксама дыпломы лаўрэатаў іншых конкурсаў у галіне якасці за апошнія пяць гадоў.

Упершыню ў конкурсе ў 2023 годзе прысуджана спецыяльная ўзнагарода "За поспехі ў імпартазамяшчэнні". Прэтэндаваць на яе атрыманне маглі тавары-лаўрэаты, якія ўключаны ў праграмы імпартазамяшчэння і (або) пералікі прадукцыі, якая належыць да імпартазамяшчальнай, што пацвярджаецца дакументальна, пры наяўнасці не менш як пяці водзываў спажыўцоў. Гэта ўзнагарода прысуджана 37 таварам 30 арганізацый.

Пры падвядзенні канчатковых вынікаў конкурсу рэспубліканская конкурсная камісія ўлічвала водзывы спажыўцоў, што паступілі ў адносінах да арганізацый і якасці іх прадукцыі і паслуг, якія паспяхова прайшлі першы (абласны) этап конкурсу і сталі фіналістамі.

Усяго за час правядзення апытання было атрымана 35 244 галасы спажыўцоў (29 213 - "падабаецца" і 6031 - "не падабаецца"). Пры гэтым кожны спажывец змог прыняць удзел у галасаванні толькі адзін раз.

Па выніках спажывецкага галасавання ў 2023 годзе прысуджана спецыяльная ўзнагарода "Выбар спажыўцоў".

Арганізацыям, тавары якіх удастоены звання лаўрэата, будуць уручаны дыпломы і прадастаўлена права размяшчэння лагатыпа конкурсу. Яго можна наносіць на маркіроўку, выкарыстоўваць у дакументацыі да тавару і ў рэкламных мэтах на працягу двух гадоў з моманту прысуджэння звання лаўрэата конкурсу.

У прэс-службе нагадалі, што ў 2023 годзе быў праведзены рэбрэндынг знака конкурсу "Лепшыя тавары Рэспублікі Беларусь". Цяпер ён уяўляе сабой размешчаны ў прамавугольніку са скругленымі вугламі сілуэт бусла - сімвала Беларусі, што падкрэслівае нацыянальны складнік конкурсу. Выява бусла ў палёце сведчыць аб тым, што ў якасці нельга спыняцца на дасягнутым. Знак конкурсу прадугледжвае два варыянты нанясення і чатыры колеравыя варыянты выканання на выбар арганізацыі тавару-лаўрэата: залаты, чорна-белы, сіні і градыентны.

Звесткі аб таварах-лаўрэатах і іх вытворцах будуць размешчаны на сайце Дзяржстандарту ў раздзеле "Якасць і дзелавая дасканаласць", партале "Якасць.бел" і ў штогадовым ілюстраваным каталогу "Лепшыя тавары Рэспублікі Беларусь", які рассылаецца ў прадстаўніцтвы нашай краіны за мяжой.

Лагатып конкурсу "Лепшыя тавары Рэспублікі Беларусь" - знак якасных тавараў айчыннай вытворчасці, які служыць арыенцірам для спажыўцоў пры выбары прадукцыі.

версія для друку

зрабіць стартавай

дабавіць у выбранае