Бізнес-навіны

БУТБ плануе павялічыць суму біржавых здзелак з Ленінградскай вобласцю

Фота з архiва

3 кастрычніка, Мінск /Кар. БЕЛТА/. Беларуская ўніверсальная таварная біржа да канца бягучага года разлічвае дасягнуць яшчэ больш высокіх паказчыкаў гандлёвага супрацоніцтва з Ленінградскай вобласцю РФ. Аб гэтым расказаў намеснік начальніка ўпраўлення знешнеэканамічнай дзейнасці БУТБ Герман Пузырны ў час семінара для дзелавых колаў Ленінградскай вобласці, арганізаванага Гандлёвым прадстаўніцтвам Расіі ў Беларусі, паведамілі БЕЛТА ў прэс-службе біржы.

Ключавымі кропкамі росту могуць стаць вырабы з чорных металаў, ферасплавы, палімеры, будматэрыялы і мяса-малочная прадукцыя. Паводле слоў прадстаўніка БУТБ, названыя тавары ўжо займаюць значную долю ў суме здзелак удзельнікаў таргоў з Санкт-Пецярбурга і Ленінградскай вобласці. Згодна са статыстыкай за студзень-верасень 2023 года, на металапрадукцыю прыпала 48 працэнтаў усіх біржавых кантрактаў, а на тавары для будаўніцтва і прадукцыю АПК - 10 працэнтаў і 8 працэнтаў адпаведна.

"Ленінградская вобласць традыцыйна ўваходзіць у першую пяцёрку рэгіёнаў Расіі па суме біржавых здзелак, дэманструючы стабільна дадатную дынаміку аб'ёмаў тавараабароту. Напрыклад, па выніках 9 месяцаў гэтага года тэмп росту склаў 213 працэнтаў. Перасягнуць мінулагоднія паказчыкі ўдалося за кошт уключэння ва ўзаемны гандаль новых таварных пазіцый і актыўнай работы з малым і сярэднім бізнесам", - заявіў Герман Пузырны.

На думку намесніка начальніка ЗЭД БУТБ, цеснае ўзаемадзеянне з суб'ектамі малога і сярэдняга прадпрымальніцтва павінна надаць дадатковы імпульс біржавому гандлю імпартазамяшчальнай прадукцыяй і пасадзейнічаць прыходу на беларускую пляцоўку вытворцаў і спажыўцоў з паўночнай сталіцы Расіі.

"Размова ідзе не толькі пра здзелкі паміж беларускімі і расійскімі прадпрыемствамі, але і пра міжрэгіянальны гандаль, калі абодва контрагенты з'яўляюцца рэзідэнтамі РФ. У прыватнасці, у бягучым годзе ленінградскія кампаніі выкарыстоўвалі транзітныя магчымасці нашай электроннай платформы для закупкі і рэалізацыі электраабсталявання, баваўнянай тканіны, паперы, бетаніту і мармуру. Агульная сума такіх транзакцый склала амаль $8 млн", - паведаміў прадстаўнік БУТБ.

версія для друку

зрабіць стартавай

дабавіць у выбранае