Бізнес-навіны

БУТБ мае намер развіваць гандаль прадукцыяй АПК з Башкортастанам

Фота з архiва

9 лютага, Мінск /Кар. БЕЛТА/. У мэтах далейшага павелічэння аб’ёмаў біржавога гандлю з Башкортастанам Беларуская універсальная таварная біржа мае намер актывізаваць работу з прадпрыемствамі аграпрамысловага комплексу рэспублікі. Аб гэтым паведамілі БЕЛТА ў прэс-службе БУТБ.

Плануецца развіваць як экспартны, так і імпартны напрамкі. У прыватнасці, беларускія ўдзельнікі біржавых таргоў гатовы пастаўляць у Башкортастан малакапрадукты, мясныя вырабы і кармавыя дабаўкі, а ў рамках імпартных здзелак закупляць збожжавыя і зернебабовыя культуры, алейнае семя сланечніка і харчовую сыравіну.

Па выніках перагавораў у фармаце В2В, праведзеных дэлегацыяй БУТБ, зацікаўленасць у рэалізацыі сваёй прадукцыі праз біржу выказалі шэраг пастаўшчыкоў збожжа і насення, а таксама вытворцы кармоў для буйной рагатай жывёлы. Акрамя таго, аб гатоўнасці акрэдытавацца на БУТБ заявілі прадпрыемствы, якія займаюцца выпускам тавараў народнага спажывання. Ім будзе аказана садзейнічанне па размяшчэнні заявак на біржавой пляцоўцы прамысловых і спажывецкіх тавараў.

"За мінулы год сума біржавых здзелак кампаній з Башкортастана вырасла на 9 працэнтаў. Аснову тавараабароту з гэтым рэгіёнам Расіі склалі піламатэрыялы і мясныя субпрадукты беларускай вытворчасці. У цэлым па Прыволжскай федэральнай акрузе назіраецца высокая дадатная дынаміка. Па выніках 2023 года ўзаемны тавараабарот павялічыўся ў 1,7 раза. У Беларусь пераважна пастаўляецца чорны і каляровы металапракат, а таксама запчасткі і камплектуючыя для прамысловага абсталявання, у той час як беларускія прадпрыемствы экспартуюць пілапрадукцыю, будматэрыялы, скуру "вет-блю" і вырабы з мяса", - расказалі ў прэс-службе БУТБ.-0-

версія для друку

зрабіць стартавай

дабавіць у выбранае