Бізнес-навіны
Будаўніцтва, прамкааперацыя і АПК. Галоўчанка аб прыярытэтах супрацоўніцтва з Калужскай вобласцю
4 красавіка, Мінск /Кар. БЕЛТА/. Прэм'ер-міністр Беларусі Раман Галоўчанка абазначыў прыярытэты супрацоўніцтва ў час сустрэчы з губернатарам Калужскай вобласці Расіі Уладзіславам Шапшой, перадае карэспандэнт БЕЛТА.
"Такія сустрэчы даюць магчымасць не толькі абмеркаваць, як рэалізуюцца раней дасягнутыя дамоўленасці, але і вызначыць новыя пункты апоры для выбудоўвання адносін на бліжэйшую перспектыву. Гэта асабліва важна для нас у бягучых умовах, калі мы сумесна з РФ процістаім эканамічнай агрэсіі, якую зведваюць нашы краіны. І процістаім паспяхова. Вядома, адным з галоўных інструментаў процідзеяння гэтаму націску з'яўляецца супрацоўніцтва і выбудоўванне ўстойлівых сувязей. Мы паспяхова пераарыентуем экспарт з недружалюбных краін на рынкі адзін аднаго, выбудоўваем новыя транспартна-лагістычныя маршруты, вырашаем пытанні імпартазамяшчэння і тым самым напаўняем рэальным сэнсам саюзную інтэграцыю", - сказаў Раман Галоўчанка.
Ён адзначыў, што тавараабарот паміж Беларуссю і Калужскай вобласцю - больш як $600 млн. Прэзідэнт Беларусі паставіў задачу павялічыць гэты паказчык да $1 млрд. "Гэта цалкам рэальная задача. У нас стабільныя доўгатэрміновыя адносіны. Ёсць патэнцыял для росту", - падкрэсліў прэм'ер-міністр.
Кіраўнік беларускага ўрада абазначыў прыярытэтныя напрамкі развіцця супрацоўніцтва. "Безумоўна, будаўнічая сфера была і застаецца лакаматывам нашых адносін. Нашы будаўнікі рэалізуюць у Калужскай вобласці шырокі спектр праектаў. Мы ўдзячны вам за давер і падтрымку. Мы праінфармаваны аб вашых планах па рэалізацыі шэрага новых праектаў - і інфраструктурных, і жылой забудовы, гатовы прымаць у іх актыўны ўдзел", - звярнуў увагу ён.
Яшчэ адна важная сфера - прамысловасць і развіццё вытворчай кааперацыі. "Беларускія аўтамабілебудаўнікі, вытворцы камунальнай, пасажырскай тэхнікі гатовы актыўна ўдзельнічаць у рэалізацыі праграм абнаўлення транспартнага парку, якія рэалізуюцца ў Калужскай вобласці. Ёсць і добрыя прыклады кааперацыйнага супрацоўніцтва, калі калужскія прадпрыемствы набываюць базавыя шасі таго ж МАЗа і ўстанаўліваюць на іх свае надбудовы, якія вырабляюцца ў вас. Яшчэ адзін прыклад - выкарыстанне ў самазвале БЕЛАЗ газатурбіннага рухавіка, які зроблены калужскім прадпрыемствам. Імпартазамяшчэнне адпавядае інтарэсам абодвух бакоў", - акцэнтаваў увагу Раман Галоўчанка. Паводле яго слоў, актуальна і супрацоўніцтва ў станкабудаванні.
"У аграпрамысловай сферы мы праблем не бачым, тэмпы добрыя ў нас. Вырас і беларускі экспарт у Калужскую вобласць, і вашы пастаўкі ў Беларусь. База добрая, лічым, што трэба пераходзіць да больш сур'ёзных кааперацыйных праектаў, - упэўнены прэм'ер-міністр. - У вас амбіцыйная праграма па павелічэнні колькасці высокатэхналагічных малочнатаварных комплексаў, рабатызаваных па апошнім слове тэхнікі. У нас такія праекты таксама рэалізуюцца. Намі поўнасцю асвоена лінейка даільнага і спадарожнага абсталявання для ферм. Былі б рады, калі б на адной або некалькіх фермах у вас было ўстаноўлена сучаснае беларускае даільнае абсталяванне".
Раман Галоўчанка таксама закрануў тэму авіязносін. "Сімвалічна, што вы прыбылі прамым авіярэйсам з Калугі. Гэта ідэя даўно выношвалася. Упэўнены, будзе зроблена ўсё неабходнае, каб рэгулярныя авіязносіны паміж Беларуссю і Калужскай вобласцю заставаліся надоўга. Гэта вельмі важна ў святле аб'ёму нашага гандлёва-эканамічнага супрацоўніцтва. Вядома ж, дзякуючы гэтаму не толькі эканамічныя сувязі будуць умацоўвацца, але і культурныя", - перакананы кіраўнік беларускага ўрада.
версія для друку
зрабіць стартавай
дабавіць у выбранае