Бізнес-навіны

Беларускія вучоныя працуюць над стварэннем кісламалочнага прадукту для касманаўтаў

Фота з архiва

10 красавіка, Мінск /Кар. БЕЛТА/. Беларускія вучоныя працуюць над стварэннем кісламалочнага прадукту для касманаўтаў. Аб гэтым на прэс-канферэнцыі, прымеркаванай да Сусветнага дня авіяцыі і касманаўтыкі, расказала першы намеснік дырэктара па навуковай рабоце РУП "Інстытут мяса-малочнай прамысловасці" Наталля Фурык.

"Вучонымі інстытута мяса-малочнай прамысловасці была пастаўлена даволі амбіцыйная задача аб пачатку работ па стварэнні комплекснага кісламалочнага прадукту для падтрымання мікрабіёты чалавека ва ўмовах касмічнага палёту. З гэтай мэтай быў падабраны шэраг штамаў малочнакіслых мікраарганізмаў і біфідабактэрый, якія павінны валодаць уласцівасцямі прабіятычных культур і тэхналагічнымі ўласцівасцямі, каб іх можна было выкарыстоўваць для распрацоўкі заквасак", - сказала Наталля Фурык.

Паводле яе слоў, з гэтай мэтай правялі маштабныя даследаванні па стварэнні камбінацый заквасачных культур, вызначаны аптымальныя пажыўныя асяроддзі для развіцця штамаў і іх камбінацый. Былі таксама распрацаваны малочныя асновы, якія дадуць магчымасць вырабіць узоры кісламалочных прадуктаў з выкарыстаннем падабраных заквасачных культур.

"Супрацоўнікі Інстытута мяса-малочнай прамысловасці сумесна з супрацоўнікамі Інстытута медыка-біялагічных праблем, спецыялістамі ракетна-касмічнай карпарацыі "Энергія" і навукова-вытворчым прадпрыемствам "БіяТэхСіс" паспяхова правялі перадпалётную падрыхтоўку касмічнай апаратуры, прызначанай для выкарыстання на борце МКС, - адзначыла Наталля Фурык. – Наша касманаўт Марына Васілеўская правяла шэраг біятэхналагічных эксперыментаў на борце МКС, якія былі накіраваны на захаванне ўзораў прабіятычных штамаў малочнакіслых арганізмаў і біфідабактэрый ва ўмовах касмічнага палёту”.

Яшчэ адзін напрамак эксперыментаў, дадала прадстаўнік НАН, - гэта выраб узораў кісламалочных прадуктаў з комплексам прабіятычных культур ва ўмовах касмічнага палёту. "Эксперыменты былі завершаны, апаратура была дастаўлена на Зямлю. Далей мы будзем вызначаць, што адбылося з мікраарганізмамі пасля таго, як яны пабывалі ў космасе. Такім чынам, мы атрымаем даныя аб малочным прадукце, які атрымаўся ў космасе", - рэзюмавала яна.

версія для друку

зрабіць стартавай

дабавіць у выбранае