Бізнес-навіны

Беларусь і В'етнам актывізуюць супрацоўніцтва ў эканоміцы, гандлі і турызме

Фота з архiва

22 лістапада, Мінск /Кар. БЕЛТА/. Намеснік старшыні Палаты прадстаўнікоў Валерый Міцкевіч сустрэўся 21 лістапада са старшынёй Нацыянальнага сходу Сацыялістычнай Рэспублікі В'етнам Выонгам Дзінем Хюэ. Аб гэтым БЕЛТА паведамілі ў прэс-службе Палаты прадстаўнікоў.

Сустрэча адбылася ў рамках 43-й Генеральнай асамблеі Міжпарламенцкай асамблеі Асацыяцыі дзяржаў - удзельніц Паўднёва-Усходняй Азіі, што праходзіць у г.Пнампень (Каралеўства Камбоджа). У ходзе сустрэчы бакі выказалі задавальненне ў сувязі з магчымасцю сустрэцца з нагоды 30-годдзя ўсталявання дыпламатычных адносін паміж дзвюма краінамі.

Выонг Дзінь Хюэ пацвердзіў, што яго краіна заўсёды надае вялікае значэнне адносінам з традыцыйнымі сябрамі, у тым ліку з Беларуссю. Ён адзначыў, што дружба і шматграннае супрацоўніцтва паміж В'етнамам і Беларуссю паспяхова развіваюцца, бакі каардынуюць намаганні, кансультуюцца і падтрымліваюць адзін аднаго ў такіх механізмах шматбаковага парламенцкага супрацоўніцтва, як Міжпарламенцкая асамблея АСЕАН і Міжпарламенцкі саюз.

Каб узаемадзеянне дзвюх краін стала больш глыбокім, змястоўным і эфектыўным, бакі дамовіліся аб садзейнічанні ў развіцці супрацоўніцтва ў галіне эканомікі, гандлю, інвестыцый, турызму. Бакі маюць намер разглядаць парламенцкае супрацоўніцтва як важны канал беларуска-в'етнамскіх адносін.

Намеснік старшыні Палаты прадстаўнікоў Валерый Міцкевіч павіншаваў В'етнам з выбраннем у члены Савета ААН па правах чалавека. У сваю чаргу Выонг Дзінь Хюэ запрасіў старшыню і намесніка старшыні Палаты прадстаўнікоў, а таксама старшыню Савета Рэспублікі наведаць В'етнам з афіцыйным візітам у бліжэйшы час.

версія для друку

зрабіць стартавай

дабавіць у выбранае