Бізнес-навіны

Беларусь і Узбекістан плануюць развіваць кааперацыю ў лёгкай прамысловасці

Фота з архiва

5 верасня, Мінск /Кар. БЕЛТА/. Беларусь і Узбекістан плануюць развіваць вытворчую кааперацыю ў лёгкай прамысловасці. Аб гэтым заявіла старшыня канцэрна "Беллегпрам" Таццяна Лугіна перад пачаткам пасяджэння секцыі беларуска-ўзбекскага жаночага бізнес-форуму, перадае карэспандэнт БЕЛТА.

"Нашы краіны вельмі блізкія па развіцці лёгкай прамысловасці. У нас наладжаны добрыя адносіны з узбекскімі асацыяцыямі, якія спецыялізуюцца на вытворчасці тэкстылю і гарбарна-абутковым напрамку. Мы ўзаемадзейнічаем, абменьваемся інфармацыяй", - сказала Таццяна Лугіна.

Паводле яе слоў, сёння асноўны ўпор робіцца на вытворчую кааперацыю. "Калі раней мы ў асноўным набывалі сыравіну і паўфабрыкаты ў выглядзе баваўнянага валакна і пражы, трыкатажных палотнаў, тканін, то цяпер разглядаем патэнцыял гэтай краіны як вытворчай пляцоўкі, дзе ёсць усе неабходныя сучасныя магутнасці і працоўны рэсурс. І ў вытворчых кааперацыйных ланцужках плануем далей развівацца", - падкрэсліла кіраўнік канцэрна.

Ужо ёсць пэўныя напрацоўкі ў гэтым пытанні. "У прыватнасці, жодзінскае прадпрыемства "Світанак" у бліжэйшы час адгрузіць першую машыну трыкатажнага палатна, якое выраблена ў Беларусі, а раскройвацца і адшывацца будзе па нашых лякалах і дызайне на ўзбекскіх трыкатажных прадпрыемствах пад нашай маркай", - адзначыла яна.

Узбекістан зацікаўлены ў развіцці фірменнага гандлю з Беларуссю. "Мы будзем адкрываць нашы фірменныя магазіны на тэрыторыі Узбекістана. Гэта будучая кропка росту", - дадала старшыня канцэрна.

У Беларусі ёсць што прапанаваць узбекскай лёгкай прамысловасці. "Гэта тыя тавары, якія не вырабляюцца на рынку Узбекістана. У прыватнасці, карыстаюцца вялікай папулярнасцю нашы баваўняна-поліэфірныя тканіны, якія маюць спецыяльныя ахоўныя ўласцівасці. Акрамя таго, выбудоўваецца работа па шарсцяных і льняных тканінах. Таксама поліэфірныя ніці нашых калег з "Белнафтахіма" даволі запатрабаваны ў лёгкай прамысловасці Узбекістана", - расказала яна.

Асобны пласт узаемадзеяння - гарбарна-абутковая галіна. "Ужо ёсць сумеснае прадпрыемства, якое ў 2018 годзе адкрыў холдынг "Марко". Ён паспяхова працуе, у перспектыве холдынг плануе адкрыць там сумесныя прадпрыемствы па перапрацоўцы аўчыны і каракульчы", - паведаміла Таццяна Лугіна.

Сёння ў рамках першага беларуска-ўзбекскага жаночага бізнес-форуму ў Мінскім гарадскім палацы культуры праходзіць секцыя "Перспектыўныя напрамкі супрацоўніцтва ў сферы лёгкай прамысловасці". Плануецца абмеркаваць пытанні развіцця кааперацыйных сувязей і рэалізацыі сумесных праектаў, забеспячэння галіны сыравінай, матэрыяламі і кваліфікаванымі кадрамі. Прадугледжваецца падпісанне шэрага камерцыйных кантрактаў, а таксама пратакола аб намерах стварэння сумеснага прадпрыемства па вырабе аўчынна-футравай, каракулева-смушкавай, пушніна-футравай сыравіны.

Таксама прайшла азнаямленчая экскурсія па вытворчых цэхах ААТ "Камволь".

версія для друку

зрабіць стартавай

дабавіць у выбранае