Бізнес-навіны

Багданаў: Беларусь разлічвае на развіццё супрацоўніцтва з італьянскім бізнесам

Фота прэс-службы МАРГ

4 кастрычніка, Мінск /Кар. БЕЛТА/. Беларусь разлічвае на развіццё супрацоўніцтва з італьянскім бізнесам. Аб гэтым заявіў сёння журналістам міністр антыманапольнага рэгулявання і гандлю Аляксей Багданаў, перадае карэспандэнт БЕЛТА.

"Нягледзячы на санкцыі з боку Еўрасаюза, у італьянскага бізнесу нават у такія няпростыя часы была і ёсць зацікаўленасць у нарошчванні супрацоўніцтва з Беларуссю. Сёння да нас прыехала італьянская дэлегацыя, з якой мы плануем абмеркаваць пытанні ўзаемадзеяння па пастаўках тавараў крытычнага імпарту ў нашу краіну. Так, мы зацікаўлены ў сыравіне для прамысловай перапрацоўкі, каб нарошчваць аб'ёмы вытворчасці. Італьянскія калегі ў сваю чаргу зацікаўлены ў вытворчасці рэстаранных страў з беларускіх прадуктаў харчавання па італьянскіх тэхналогіях, таму плануем абмеркаваць інвестыцыі у развіццё рэстараннага бізнесу", - расказаў Аляксей Багданаў.

Ён таксама падкрэсліў, што італьянскі бок бачыць, што ў Беларусі спакойная абстаноўка, тут жывуць мірныя людзі і эканоміка краіны развіваецца.

"Для развіцця бізнесу патрэбна добрая атмасфера, якая ў нашай краіне ёсць. Мы заўсёды цесна супрацоўнічалі з італьянцамі, а нашы народы вельмі падобны па менталітэце. Паколькі ў Італіі прайшлі новыя выбары, мы спадзяёмся, што правая кааліцыя будзе больш разважліва ставіцца да існуючай сітуацыі. Хочам верыць, што гэты пасыл спрацуе на карысць Беларусі і супрацоўніцтва паміж нашымі краінамі", - рэзюмаваў міністр.

Як адзначылі ў прэс-службе МАРГ, сустрэча з італьянскай дэлегацыя прайшла ў даверным і канструктыўным рэчышчы. Прадметна абмеркаваны напрамкі далейшага двухбаковага ўзаемадзеяння паміж краінамі. Акрамя згаданых абмяркоўваліся пытанні супрацоўніцтва дзвюх краін у галіне ўзаемных паставак тавараў, сумесныя праекты ў алейна-тлушчавай галіне, таксама былі закрануты аспекты ўзаемадзеяння італьянскага бізнесу з ААТ "Магілёўліфтмаш" ва ўмовах новых глабальных выклікаў.

версія для друку

зрабіць стартавай

дабавіць у выбранае