Бізнес-навіны

Андрэйчанка: тавараабарот Беларусі і Таджыкістана пакуль не адпавядае патэнцыялу дзвюх краін

27 кастрычніка, Мінск /Кар. БЕЛТА/. Тавараабарот Беларусі і Таджыкістана пакуль не адпавядае патэнцыялу дзвюх краін, заявіў старшыня Палаты прадстаўнікоў Уладзімір Андрэйчанка ў час сустрэчы з Надзвычайным і Паўнамоцным Паслом Таджыкістана ў Беларусі Бахтаварам Сафарзадой, перадае карэспандэнт БЕЛТА.

Спікер адзначыў плённую і рэгулярную работу груп дружбы Беларусі і Таджыкістана па міжпарламенцкім супрацоўніцтве. "Лічу самае галоўнае пытанне на сённяшні дзень - узяць пад кантроль рэалізацыю дарожнай карты двухбаковага супрацоўніцтва на 2022-2026 гады, падпісанай кіраўнікамі нашых дзяржаў у Душанбэ. У карце адлюстраваны ўсе напрамкі работы. Таму трэба актыўней працаваць і браць на парламенцкі кантроль, як рэалізуюцца ўсе гэтыя напрамкі. Таму што працаваць ёсць над чым. Ваша краіна і Рэспубліка Беларусь зацікаўлены ў тым, каб нарошчваць гандлёва-эканамічнае супрацоўніцтва", - адзначыў старшыня Палаты прадстаўнікоў.

"$78 млн за 2022 год, паводле нашых даных, - знешнегандлёвы абарот паміж нашымі краінамі. Гэта, вядома ж, невялікая лічба. У гэтым годзе за 8 месяцаў на 15 працэнтаў прыбавілі. Але, думаю, яшчэ вельмі шмат у нас ёсць магчымасцей. І гэтыя лічбы, вядома ж, не адпавядаюць патэнцыялу і вашай краіны, і нашай краіны", - сказаў Уладзімір Андрэйчанка.

Паводле яго слоў, праектаў у нас шмат. "Эканоміка на сённяшні дзень - самае галоўнае. Будзе эканоміка - будуць зарплаты, стабільнасць, дабрабыт людзей, а галоўнае - бяспека дзяржавы, - падкрэсліў спікер. - Таму нам трэба браць на кантроль канкрэтныя напрамкі і канкрэтныя праекты".

версія для друку

зрабіць стартавай

дабавіць у выбранае