Падзеі, факты, анонсы

Каляндар падзей у Беларусі: ЛIСТАПАД 2025

Прэм'ера фільма "Чорны замак" па матывах рамана Уладзіміра Караткевіча

"Чорны замак" – гэта сучасная экранізацыя гістарычнага дэтэктыўнага рамана Уладзіміра Караткевіча "Чорны замак Альшанскі". Пры гэтым з моманту яго першай экранізацыі мінула ўжо 40 гадоў: у 1984-м на экранах прэзентавалі аднайменны фільм кінарэжысёра Міхаіла Пташука, зняты ў жанры гістарычнага дэтэктыва. На гэты раз за пераасэнсаванне рамана ўзяліся сцэнарыст Глеб Шпрыгаў і рэжысёр Кірыл Кузін. Яшчэ да афіцыйнай прэм'еры ў Мінску фільм "Чорны замак" быў удастоены спецпрыза журы конкурсу ігравых фільмаў і спецпрыза Выканкама СНД "Кіно без меж" на ММКФ "Лістапад-2024". Згодна з сюжэтам гістарычнай драмы, малады прафесар Антон Косміч (Яўген Шварц) аказваецца ў бядзе пасля таго, як старадаўняе Евангелле, якое належала роду Альшанскіх, трапляе ў яго антыкварны магазін. Каб выратаваць сябе і разгадаць тайны мінулага, ён адпраўляецца ў Альшаны... У экранізацыі аднаго з самых вядомых твораў беларускай літаратуры прынялі ўдзел Настасся Красоўская, Яўген Стычкін, Яўген Шварц і Віталь Кішчанка.

Калі: 12 снежня 2024 – 2 снежня 2025
Дзе: кінатэатры гарадоў Беларусі

Выстава "Кожная роля – галоўная" да 120-годдзя з дня нараджэння Стэфаніі Станюты

Выстава, прысвечаная 120-годдзю з дня нараджэння народнай артысткі Беларусі і СССР Стэфаніі Станюты, раскрывае яе жыццёвы і творчы шлях. У экспазіцыі прадстаўлены фотаздымкі, тэксты роляў, рукапісы, малюнкі, перапіскі з роднымі і знаёмымі, водгукі крытыкаў і паклоннікаў, дакументы. Наведвальнікі музея могуць убачыць фатаграфіі выдатнай артысткі з сынам-пісьменнікам Аляксандрам, які прысвяціў ёй кнігу, дакументы, звязаныя з Другім беларускім драматычным тэатрам у Віцебску, дзе многія беларускія артысты пачыналі свой шлях пасля навучання ў 1920-я ў вялікіх майстроў у Маскве. Стэфанія Станюта ў 1931-м пасля вяртання са студыі ММТ паступіла ў трупу Першага драматычнага тэатра (цяпер – Купалаўскага), дзе праслужыла 70 гадоў, выканаўшы каля 200 роляў і стаўшы сапраўднай легендай!

Калі: з 13 мая 2025 года
Дзе: Беларускі дзяржаўны архіў-музей літаратуры і мастацтва, вул. Кірыла і Мяфодзія, 4, Мінск
Даведацца больш

Выстава "Адкуль узяўся Бурачок?" да 185-годдзя Францішка Багушэвіча ў Мінску

Мацей Бурачок, Сымон Рэўка з-пад Барысава – такія жартаўлівыя псеўданімы ўзяў для свайго літаратурнага амплуа выдатны пісьменнік, адвакат і грамадскі дзеяч Францішак Багушэвіч. Яго знакамітыя паэтычныя зборнікі "Дудка беларуская" і "Смык беларускі", напісаныя лацінкай, сёння выдаюцца кірыліцай, а старыя аўтэнтычныя экзэмпляры –  вялікая рэдкасць. Аднак з вёскі Кушляны ў Смаргонскім раёне Гродзенскай вобласці, дзе вырас пісьменнік, у калекцыю Музея гісторыі беларускай літаратуры ў розныя часы паступалі сапраўдныя прадметы з мінулага. Наведвальнікі выставы, прымеркаванай да 185-годдзя Францішка Багушэвіча, змогуць зазірнуць у свет сядзібы і прайсці звілістымі сцежкамі паэта, а таксама ўбачыць прадмет інтэр'ера – буфет XIX стагоддзя са сталовай, які належаў сям'і Багушэвічаў.

Калі: да 28 снежня
Дзе: Дзяржаўны музей гісторыі беларускай літаратуры, вул. М. Багдановіча, 13, Мінск

Выстава "Набіванка: традыцыя і сучаснасць" у Полацку

"Набіванка", набойка, выбойка – гэта адна з тэхнік дэкарыравання тканіны з дапамогай трафарэтнай дошкі з рэльефным малюнкам, якая атрымала распаўсюджванне ў XVI–XVII стагоддзях у Віцебску, Магілёве, Полацку, Оршы, Бабруйску. Менавіта ў гэтых беларускіх гарадах у той час размяшчаліся буйнейшыя спецыялізаваныя майстэрні. З дапамогай набівання дэкарыравалі хатні тэкстыль (абрусы, ручнікі, прасціны), а таксама тканіну, з якой выраблялі элементы касцюма: сарафаны, кашулі, фартухі. Наведвальнікі выставы змогуць убачыць рамесную традыцыю адразу на двух узроўнях – гістарычным, які паказвае ўзнікненне і развіццё набіванкі ў XIX стагоддзі – першай палове XX стагоддзя на тэрыторыі Беларусі, і сучасным, што адлюстроўвае адраджэнне і пераасэнсаванне старадаўняга майстэрства ў работах майстроў нашага часу.

Калі: 19 верасня 2025 – 31 студзеня 2026
Дзе: Музей традыцыйнага ручнога ткацтва Паазер'я, вул. Войкава, 1, Полацк

Фэнтэзі-спектакль "МІРАС": новая праграма ў Белдзяржцырку

Унікальны фэнтэзі-спектакль "Мірас" стварылі беларускія і расійскія артысты ў сумесным праекце з Казанскім дзяржаўным цыркам. Беларускія гледачы азнаёмяцца з самабытнай гісторыяй і культурай татарскага народа праз тандэм цыркавога мастацтва і сучасных тэхналогій. Пад купалам мінскага цырка ажывуць старажытныя міфы і легенды, якія цесна пераплятаюцца з рэальнасцю, а традыцыі продкаў будуць адноўлены праз акрабатыку, музыку і магію. Акрамя таго, у новай праграме – жанглёры ў паветры, эквілібр, паветраныя гімнасты і турнікі, акрабатычная дарожка, наезнікі на конях, дрэсіраваныя мядзведзі, авечкі і, вядома, клаўнада…

Калі: 27 верасня – 30 лістапада
Дзе: Беларускі дзяржаўны цырк, пр. Незалежнасці, 32, Мінск

"Архіў. Прастора паміж…": юбілейная выстава да 10-годдзя НЦСМ у Мінску

Новы выставачны праект, прымеркаваны да 10-годдзя Нацыянальнага цэнтра сучасных мастацтваў, аб’яднаў інсталяцыю, жывапіс, фатаграфію, скульптуру, графіку і відэа-арт. Паводле слоў куратараў, розныя формы мастацтва – гэта адначасова мова аўтарскага выказвання і спосаб сумеснага з гледачом пераасэнсавання рэальнасці, устанаўлення сувязі. Само слова "архіў" у назве прадугледжвае мастацкае даследаванне і пашырэнне традыцыйных уяўленняў аб памяці, гісторыі, ідэнтычнасці. Экспазіцыю дапоўняць 10 работ з фондаў, адабраныя супрацоўнікамі розных аддзелаў цэнтра. Сярод іх – творы Мацвея Басава, Мікалая Казакевіча, Віталя Цвіркі і іншых беларускіх мастакоў.

Калі: да 23 лістапада
Дзе: Нацыянальны цэнтр сучасных мастацтваў, вул. Някрасава, 3, Мінск

Інтэрактыўны выставачны праект "Змрок Сярэднявечча" ў Мінску

Наведвальнікі сталічнага археалагічнага музея "Верхні горад" зробяць інтэрактыўнае падарожжа ў свет таямнічага і змрочнага Сярэднявечча (XII–XVI стст.), якое часта называюць Цёмнымі вякамі ў гісторыі чалавецтва. І нядзіўна: яшчэ пяць стагоддзяў таму на рыначнай плошчы кожнага еўрапейскага горада стаяў эшафот, а каля гарадскіх варот – шыбеніцы. У экспазіцыі, прысвечанай правасуддзю, прадстаўлены метады дазнання і прылады катаванняў, якія прымяняліся ў перыяд інквізіцыі і палявання на чарадзеяў і ведзьмаў: маскі ганьбы, дыба, скрыпка пляткарак, слуп ганьбы, іспанскі бот, гарота, ведзьміна збруя, груша пакут… Створаныя для праекта па старадаўніх тэхналогіях экспанаты суправаджаюцца гравюрамі, малюнкамі і карцінамі, якія паказваюць іх у дзеянні, а таксама гістарычнымі каментарыямі.

Калі: 19 верасня 2025 – 18 студзеня 2026
Дзе: археалагічны музей "Верхні город", вул. Кірылы і Мяфодзія, 6, Мінск

LI Фестываль мастацтваў "Беларуская музычная восень" у Мінску

"Беларуская музычная восень" праводзіць ужо 51-ы сезон, аб’ядноўваючы знатакоў вечнай класікі і прадстаўляючы публіцы лепшыя ўзоры сусветнай культурнай спадчыны. Лістападаўскую праграму адкрые канцэртная праграма "Як не любіць мне гэту зямлю…" памяці легенды савецкай эстрады спявачкі Людмілы Зыкінай у выкананні салісткі Кацярыны Булатоўскай і Нацыянальнага акадэмічнага народнага аркестра Рэспублікі Беларусь імя І. Жыновіча пад кіраўніцтвам Аляксандра Крамко. Гледачоў чакае калейдаскоп вакальных, фартэпіянных, сімфанічных, джазавых вечароў, прысвечаных творчасці выдатных кампазітараў і выканаўцаў розных эпох – Пятра Чайкоўскага, Георгія Свірыдава, Гіі Канчэлі, Арва Пярта, а таксама беларускага музыканта, кампазітара і педагога Юрыя Блінова, які стаў першым піяністам-беларусам, што выступіў з сольным канцэртам у знакамітым Карнегі-холе.

Калі: 10 кастрычніка – 30 лістапада
Дзе: Беларуская дзяржаўная філармонія, пр. Незалежнасці, 50, Мінск

Выстава керамікі "Мастацтва жывога агню" ў Мінску

Міжнародны пленэр "Арт-Жыжаль" – візітная картка Бабруйска і прафесійная пляцоўка ў мастацтве керамікі - адбыўся 19-ы раз у горадзе на Бярэзіне. Творчая майстэрня пад адкрытым небам аб’яднала 21 мастака-кераміста з 5 краін: Беларусі, Егіпта, Казахстана, Малдовы, Расіі. На працягу трох тыдняў майстры стваралі арт-аб’екты на тэму "Культура і мастацтва ў вобразах і сімвалах", удзельнічалі ў падрыхтоўцы печаў і штодзённых абпалах. Падагульняючая выстава – "Мастацтва жывога агню" – прадстаўляе работы ўдзельнікаў пленэру-2025, прысвечаныя нацыянальнай гісторыі, традыцыям, падзеям сваіх краін. У экспазіцыі – больш за 50 керамічных вырабаў ад ваз з егіпецкімі арнаментамі да скульптур, натхнёных бяскрайнімі казахскімі стэпамі. Творы ахопліваюць шырокі спектр сюжэтаў: матывы народнага мастацтва, іх сучасныя інтэрпрэтацыі, абстрактныя формы.

Калі: 15 кастрычніка – 9 лістапада
Дзе: Мастацкая галерэя Міхаіла Савіцкага, пл. Свабоды, 15, Мінск

Выставачны праект "НейраБеларусь" у Брэсцкім мастацкім музеі

Праект "НейраБеларусь" прапануе зусім новы погляд на беларускую прыроду, архітэктуру, традыцыі, кухню і гісторыю Сінявокай. Увазе наведвальнікаў прадстаўлена калекцыя са 110 работ, створаных з дапамогай нейрасетак і дапоўненай рэальнасці. Гэта не проста выстава ў прывычным сэнсе слова, а сінтэз тэхналогій і нацыянальнай ідэнтычнасці. Нейрасеткі ствараюць унікальныя візуальныя вобразы Беларусі, дзе старажытнае пераплятаецца з лічбавым, а пазнаваемае – з нечаканым. Для азнаямлення з экспазіцыяй у займальнай форме можна выбраць тэматычны квест, а таксама падкаст, які кожны зможа паслухаць са свайго смартфона.

Калі: 21 кастрычніка – 30 лістапада
Дзе: Брэсцкі мастацкі музей, вул. Герояў абароны Брэсцкай крэпасці, 60В, Брэст

Выстава "Цана вайны" ў Музеі гісторыі Вялікай Айчыннай вайны

Адзін з самых наведваемых музеяў беларускай сталіцы і першы ў свеце, прысвечаны самай кровапралітнай вайне ХХ стагоддзя, упершыню за больш як 80 гадоў сваёй гісторыі прадставіць экспазіцыю грашовых знакаў. Галоўнымі героямі стануць дзве калекцыі – баністыкі і нумізматыкі, у якіх налічваецца 1,6 тыс. адзінак. Наведвальнікі ўбачаць грашовыя знакі, аблігацыі, манеты краін антыгітлераўскай кааліцыі і іх саюзнікаў – Савецкага Саюза, ЗША, Вялікабрытаніі, Францыі, з другога боку – Германіі, Японіі, Італіі, краін, якія былі акупіраваны імі. Экспазіцыю дапоўняць прадметы з іншых калекцый – адзенне, зброя, ваенная амуніцыя, якія даюць магчымасць узнавіць знешні выгляд і экіпіроўку ваеннаслужачых проціборствуючых краін.

Калі: 21 кастрычніка – 22 снежня
Дзе: Беларускі дзяржаўны музей гісторыі Вялікай Айчыннай вайны, пр. Пераможцаў, 8, Мінск
Даведацца больш

ХХХ Міжнародны фестываль арганнай музыкі "Званы Сафіі"

Юбілейны міжнародны фестываль "Званы Сафіі" прагучыць у старажытным горадзе Полацку шэдэўрамі арганнай музыкі эпохі барока, а таксама творамі выдатных кампазітараў XIX і XX стагоддзяў. Знакамітыя музыканты выканаюць творы Вольфганга Амадэя Моцарта, Ферэнца Ліста, Роберта Шумана, Сезара Франка, Людвіга ван Бетховена, Тамаза Альбіноні, Габрыэля Фарэ, Юі Какінумы. Сімвалічна, што адна з тэм свята – 40-годдзе полацкага аргана. У 1985-м спецыяльна для канцэртнай залы ў Сафійскім саборы майстры найстарэйшай чэшскай фірмы Riеger Kloss спраектавалі і ўстанавілі музычны інструмент, прызнаны лепшым у Беларусі.

Праграма форуму прысвечана 340-годдзю з дня нараджэння выдатных прадстаўнікоў эпохі барока Іагана Себасцьяна Баха і Георга Фрыдрыха Гендэля. Парадуе знатакоў класікі шэдэўрамі двух музычных геніяў заслужаная артыстка Рэспублікі Беларусь салістка Сафійскага сабора Ксенія Пагарэлая і камерны аркестр "Еўропа-Цэнтр" пад кіраўніцтвам Раіля Садыкава. Гасцямі фестывалю стануць расійскія арганісты Аляксей Шмітаў і Наталля Міхайлава, каларатурнае сапрана Людміла Трацэўская. Упрыгожаць форум сваім гучаннем і беларускія музыканты Вера Латышава і Канстанцін Мазюк, Кацярына Нікалаева і Таццяна Кармазінава. Сольную праграму прадставіць яркая і самабытная арганістка з Японіі Хірока Іноўэ.

Калі: 26 кастрычніка – 30 лістапада
Дзе: Сафійскі сабор, Полацк, Віцебская вобласць

XXXI Мінскі міжнародны кінафестываль "Лістапад"

Адзін з самых яркіх на прасторы СНД і буйнейшы ў Беларусі кінафорум – ММКФ "Лістапад" – на тыдзень збярэ ў Мінску вядомых акцёраў, рэжысёраў, аматараў мастацтва cinema пад слоганам "Гісторыя, што мяняе погляд". Для ўдзелу ў фестывалі была пададзена рэкордная колькасць – 3655 – заявак са 120 краін! У праграму ўвайшлі 157 кінакарцін з 41 краіны. Міжнароднае журы ігравога кіно ўзначаліў генеральны дырэктар "Масфільма" кінарэжысёр Карэн Шахназараў. Адкрыецца "Лiстапад"-2025 у Палацы Рэспублікі яркай урачыстай цырымоніяй і паказам спартыўнай драмы маладога рэжысёра Дзмітрыя Сарокі "Пераломны момант" – першага поўнаметражнага фільма аб веславанні з 1973 года.

Навінкай ММКФ-2025 стане конкурс кароткаметражных фільмаў, які пабіў рэкорд па колькасці заявак – больш за 2,2 тысячы! Практычна ўсе карціны ўжо з’яўляюцца прызёрамі прэстыжных сусветных кінафестываляў. Сярод іх і паўднёваафрыканская драма "Апошні рэйнджар", намініраваная на "Оскар"-2025 у катэгорыі "Лепшы ігравы кароткаметражны фільм".

У праграме конкурсу "Кіно маладых" публіка азнаёміцца з дзесяццю карцінамі з 13 краін, многія з якіх былі прадстаўлены на "Берлінале". Гэта і італьянская "Апошняя цудоўная рэч", і наватарская драма "Шчаслівы канец" ад японскага рэжысёра Неа Соры, і пераможца "Берлінале" ў катэгорыі "Лепшы дэбют" – шчырая гісторыя-разважанне пра жыццё "Лоры ніколі не плачуць" з В’етнама.

Сярод самых чаканых карцін 31-га ММКФ – фільм-прызёр Канскага фестывалю-2025 франка-іспанская драма "Сірат", гістарычная драма Джэйкаба Шварца "Тамерлан: Узыходжанне апошняга заваёўніка", драматычны фільм "Возера" вучня Жана-Люка Гадара – Фабрыса Араньа, фільм "Мой дзед" рэжысёра Святаслава Уласава, галоўную ролю ў якім выканаў народны артыст Беларусі Уладзімір Гасцюхін.

Калі: 31 кастрычніка – 7 лістапада
Дзе: кінатэатры Мінска і рэгіёнаў, Палац Рэспублікі – цырымонія адкрыцця фестывалю, кінатэатр "Масква" – цырымонія закрыцця

Фестываль агню "Фенікс" у Батанічным садзе НАН Беларусі

Атрымаць задавальненне ад відовішчнага паказу ў асенні вечар запрашае маштабны фестываль агню "Фенікс", які разгорнецца ў Батанічным садзе НАН Беларусі. Наведвальнікаў чакаюць захапляючая шоу-праграма, тэматычныя лакацыі, вогненныя і асеннія фотазоны, разнастайны фудкорт з сагравальнымі пачастункамі і, вядома, кульмінацыя вечара – грандыёзнае вогненнае шоу на вялікім подыуме. Акрамя асноўнай праграмы, з 17:00 выступяць папулярныя беларускія выканаўцы і музычныя калектывы. А для самых маленькіх гасцей прадугледжана дзіцячая пляцоўка з асобнай анімацыяй, забавамі і сюрпрызамі.

Калі: 31 кастрычніка – 2 лістапада (вогненныя шоу ў 19:00 і 21:00)
Дзе: Цэнтральны батанічны сад НАН Беларусі, вул. Сурганава, 2 в, Мінск

"Адважнае падарожжа Мікалая Хрыстафора Радзівіла Сіроткі" ў Нясвіжы

Наведвальнікі Нясвіжскага замка змогуць адправіцца ў "Адважнае падарожжа Мікалая Хрыстафора Радзівіла Сіроткі", якое адбудзецца ў рамках праграмы "Нясвіжскі замак: канікулы з гісторыяй". Гэта незвычайная экскурсія па музейнай экспазіцыі з элементамі тэатралізацыі і квеста. Госці перанясуцца ў Вялікае Княства Літоўскае XVI стагоддзя і даведаюцца аб персоне Мікалая Хрыстафора Радзівіла, які ўвайшоў у гісторыю як магнат, падарожнік і мецэнат, першы ардынат Нясвіжа, ініцыятар будаўніцтва Нясвіжскага замка і першага выдання дакладнай карты ВКЛ, аўтар кнігі з дарожнымі дзённікамі. Галоўнай тэмай будзе падарожжа Мікалая Хрыстафора Радзівіла Сіроткі ў Святую Зямлю. Удзельнікі "адважнага падарожжа" пазнаёмяцца з нясвіжскім князем і яго асяроддзем!

Калі: 3 і 4 лістапада
Дзе: Нацыянальны гісторыка-культурны музей-запаведнік "Нясвіж", вул. Замкавая, 2, Нясвіж, Мінская вобласць

Музычная праграма TRIANGLE у мінскім Планетарыі

Ужо добра вядомы канцэртамі неакласікі праект "Музыка і зоркі" запрашае зрабіць гукавое падарожжа, якое суправаджаецца паўнакупальнай праекцыяй у антуражы Планетарыя. Знатакоў камерных вечароў чакае аўтарская эмбіент-музыка, якая ў спалучэнні з паказам зорак і галактык выклікае неперадавальныя эмоцыі, даючы магчымасць адкрыць прыгажосць Сусвету і прасякнуцца яго веліччу. Праект TRIANGLE, заснаваны ў 2012-м гітарыстам Андрэем Апановічам, прадстаўляе зусім новае гучанне інструмента. Гэта акустычны эмбіент, сыграны на гітары з дапамогай сэмплера і педалей эфектаў.

Калі: 5 і 6 лістапада
Дзе: Мінскі планетарый, вул. Фрунзэ, 2, Мінск

XXII Міжнародная выстаўка індустрыі прыгажосці і здароўя "ІнтэрСтыль"

Адзіная ў Беларусі міжнародная прафесійная выстаўка ў сферы б’юці-індустрыі – "ІнтэрСтыль" – у новым сезоне аб’яднае больш як 60 кампаній і арганізацый, а таксама прафесіяналаў цырульніцкага мастацтва, візажу, lash&brow, ногцевага сэрвісу, касметалогіі і эстэтыкі, SPA-салонаў і клінік, парфумерыі, нутрыцыялогіі, моды і стылю. Гэта пляцоўка для абмену ведамі і вопытам з калегамі, знаёмства гасцей з моднымі тэндэнцыямі, прэзентацыя лепшых матэрыялаў і топ-навінак касметычных сродкаў. Гасцей чакае насычаная праграма мерапрыемстваў, сярод якіх – Міжнародны фестываль "РУЖА ВЯТРОЎ HAIR-2025", першы ў краіне чэмпіянат падолагаў, паказы дызайнераў, майстар-класы і прэзентацыі ад удзельнікаў.

Калі: 5–8 лістапада
Дзе: выставачны павільён, пр. Пераможцаў, 14, Мінск

ЛЕПШАЕ І НОВАЕ: Шоу трох раяляў ад BEL SUONO ў Мінску

Міжнародны дзень піяніста 8 лістапада запомніцца сустрэчай з фартэпіянным трыа BEL SUONO – адзіным у пэўным сэнсе калектывам, які выступае ў прагрэсіўным жанры класічнага красовера. У складзе ансамбля з больш як 10-гадовым стажам – Кірыл Гушчын, Антон Масянкоў і Мікіта Хабін, якія на мінскай сцэне прадставяць грандыёзнае шоу трох раяляў "ЛЕПШАЕ і НОВАЕ" ў суправаджэнні Прэзідэнцкага аркестра Рэспублікі Беларусь пад кіраўніцтвам галоўнага дырыжора Віталя Кульбакова. За вечар прагучаць кампазіцыі, што палюбіліся паклоннікам ужо, а таксама свежыя творы, прэм’ера якіх адбудзецца на сцэне Палаца Рэспублікі.

Калі: 8 лістапада
Дзе: Палац Рэспублікі, пл. Кастрычніцкая, 1, Мінск

Міжнародная спецыялізаваная выстаўка-кірмаш PRODEXPO 2025

"ПРАДЭКСПА" ўжо на працягу больш як 30 гадоў утрымлівае за сабой статус буйнейшай харчовай выстаўкі ў Беларусі. У мінулым сезоне яе плошча вырасла на 30 працэнтаў, а ў гэтым годзе яна ўпершыню адкрыецца на пляцоўцы новага Мінскага міжнароднага выставачнага цэнтра BELEXPO. Тэматыка выстаўкі ахоплівае ўвесь спектр харчовага рынку – ад навінак прадуктаў харчавання і напіткаў, якаснай сыравіны да перадавых тэхналогій вытворчасці, упакоўкі і гандлю ў харчовай індустрыі, адкрыцця і развіцця новых брэндаў. Акрамя экспазіцыі, прадугледжаны маштабная дзелавая праграма, перагаворы паміж рытэйлерамі, пастаўшчыкамі і вытворцамі, Міжнародны кулінарны кубак, Міжнародны чэмпіянат кандытарскага майстэрства, Міжнародны конкурс па антыгравітацыйных тартах "Мары здзяйсняюцца", шоу-прэзентацыя "Беларусь смачная", Міжнародны сімпозіум хлебапёкаў...

Калі: 11–14 лістапада
Дзе: Мінскі міжнародны выставачны цэнтр BELEXPO, вул. П. Мядзёлка, 24, Мінск

Х рэспубліканскі Gastrofest у гарадах Беларусі

Ужо 10-ы раз рэспубліканскі Gastrofest, які палюбіўся жыхарам і гасцям краіны, аб’яднае буйныя гарады і турыстычныя цэнтры ў адзіным фармаце, дзе галоўнымі з'яўляюцца смачная ежа і якасныя напіткі, а таксама крэатыўная падача ад самых лепшых айчынных шэф-повараў. У кожнага сезона фестывалю – свая тэматыка, але нязменная канцэпцыя: установы-ўдзельніцы прапануюць свае найлепшыя сэты па фіксаваным кошце ў пэўны перыяд часу.

Калі: 13–30 лістапада
Дзе: Мінск, Брэст, Віцебск, Гомель, Гродна, Магілёў, Пінск

Гала-канцэрт зорак Вялікага тэатра Беларусі

Калейдаскоп найлепшых сольных нумароў і дуэтаў з рэпертуару Вялікага тэатра Беларусі выканаюць артысты опернай і балетнай трупы. Змест і склад удзельнікаў вечара трымаюцца ў сакрэце. Але вядома, што гала адбудзецца ў суправаджэнні аркестра галоўнага тэатра краіны пад кіраўніцтвам Юрыя Караваева. Галоўны рэжысёр – уладальнік медаля Францыска Скарыны Ганна Маторная, галоўны мастак – лаўрэат рэспубліканскіх конкурсаў Любоў Сідзельнікава, галоўны хормайстар – народная артыстка Беларусі, лаўрэат Дзяржаўнай прэміі Рэспублікі Беларусь Ніна Ламановіч.

Калі: 21 лістапада
Дзе: Вялікі тэатр Беларусі, пл. Парыжскай Камуны, 1, Мінск

XXXVI Міжнародны фестываль сучаснай харэаграфіі IFMC

Знакаміты віцебскі форум сучаснай харэаграфіі – IFMC – у 36-м сезоне збярэ артыстаў і танцавальныя калектывы з Беларусі, Расіі, Італіі, Германіі і іншых краін. Асаблівы вечар адбудзецца ў гонар легендарнага харэографа Яўгена Панфілава – энтузіяста свабоднага танца і стваральніка першага ў Расіі прыватнага тэатра балета. Адкрыецца форум першым выхадам удзельнікаў рэспубліканскага конкурсу, а ў другім аддзяленні гледачоў чакае вечар-дывертысмент "Балеро+" у выкананні Балета Масква (Тэатр "Новая Опера"). У афішы фестывалю-2025 – монаспектакль One Man Ball і харэаграфічны спектакль "Шынель. Гогаль", вечар "Дзве Марыі", пастаноўкі гасцей з Чэлябінска і Пермі… У фінальны дзень лаўрэаты конкурсу прадставяць самыя лепшыя нумары, а тэатр "Балет Яўгена Панфілава" пакажа аднаактовы спектакль "Восем рускіх песень".

Калі: 26–30 лістапада
Дзе: КЗ "Віцебск", пр. Фрунзэ, 1, Віцебск

Юбілейныя канцэрты ў гонар 20-годдзя Хору Валаамскага манастыра ў Беларусі

Гастрольным турам святкуе юбілей Хор Валаамскага манастыра, створаны з нагоды аднаўлення і асвячэння ў жніўні 2005 года Спаса-Праабражэнскага сабора на востраве Валаам. Унікальнасць музычнага калектыву ў тым, што ён з’яўляецца адначасова і богаслужэбна-пеўчым, і канцэртным творчым. Таму рэпертуар хору – песні, рамансы і духоўная музыка – прысвечаны тэме любові. Гледачы акунуцца ў атмасферу старадаўніх распеваў, якімі славіцца Валаамскі манастыр, а таксама пройдуць галоўнымі жыццёвымі дарогамі Хрыста – перанясуцца скрозь час на тэрыторыю Грэцыі, Сербіі і Аргенціны. У другой частцы праграмы прагучаць найлепшыя творы з рэпертуару хору, прысвечаныя Веры ў Бога і любові да Радзімы.

Дзе, калі:
28 лістапада – Пінскі гарадскі Дом культуры, пл. Леніна, 7a, Пінск
29 лістапада – Гродзенская абласная філармонія, вул. Гарнавых, 17, Гродна
30 лістапада – Абласны грамадска-культурны цэнтр, вул. Камуністычная, 1, Брэст
1 і 2 снежня – ДК МТЗ, вул. Даўгабродская, 24, Мінск
3 снежня – Грамадска-культурны цэнтр, вул. Ланге, 17, Гомель
4 снежня – Віцебская абласная філармонія, вул. Леніна, 69, Віцебск