Падзеі, факты, анонсы

Каляндар падзей у Беларусі: ЧЭРВЕНЬ 2022

ЧЭРВЕНЬ 2022

"Магія графікі": казачная выстава мастака Валерыя Славука ў Мінску

Мастак-ілюстратар і графік Валерый Славук вядомы як майстар кніжнага афармлення, а адна з галоўных тэм у творчасці – беларуская і славянская міфалогія. Многім палюбіліся яго ілюстрацыі да народных казак "Удовін сын", "Піліпка-сынок", "Алёнка", а таксама да папулярных твораў сусветнай і беларускай класікі – "Айвенга" В.Скота, "Чорны млын" Ю.Брэзана, "Шляхціц Завальня" Я.Баршчэўскага, "Вясна ўвосень" У.Караткевіча. Выстава, прысвечаная 75-годдзю мастака, прызначана паказаць "Магію графікі" ва ўсёй разнастайнасці традыцыйных вобразаў сусветнай і беларускай міфалогіі, сярод якіх харызматычныя каты, насякомыя, магі, дамавікі, волаты, русалкі, вадзяныя…

Калі: 19 красавіка – 1 ліпеня
Дзе: Нацыянальная бібліятэка Беларусі, пр. Незалежнасці, 116, Мінск

Праграма "Водпуск Без Шкарпэтак?!" у Белдзяржцырку

Напярэдадні летняга сезона і самых доўгіх дзіцячых канікулаў артысты Белдзяржцырка запрашаюць гледачоў атрымаць асалоду ад новай праграмы "Водпуск Без Шкарпэтак?!" Адметнасць шоу – яркае клоўнскае трыа "Без шкарпэтак" – уладальнікі мноства ўзнагарод прэстыжных цыркавых фестываляў у Венгрыі, Францыі, Расіі, Ізраілі, Іспаніі, а таксама знакамітага форуму ў Монтэ-Карла. Акрамя іскрамётнага гумару ад прадстаўнікоў камічнага жанру, гледачы ўбачаць арыгінальныя цыркавыя нумары паветраных гімнастаў, канатаходцаў, наезнікаў на конях, сабачак на скейтбордах, незвычайную гульню ў більярд, вышэйшую школу верхавой язды і нават бокс з кенгуру ад дрэсіроўшчыка Антона Светлакова.

Калі: 14 мая – 29 чэрвеня
Дзе: Беларускі дзяржаўны цырк, пр. Незалежнасці, 32, Мінск

V Фестываль мастацтва "Арт-Мінск"

Больш за 1000 заявак і 550 адабраных работ сучасных беларускіх мастакоў з усёй краіны: вынікі можна ўбачыць у экспазіцыі фестывалю "Арт-Мінск"–2022. З 2018 года арт-форум прадстаўляе актуальныя напрамкі нацыянальнага мастацтва і ўжо з'яўляецца адным з буйнейшых выставачных праектаў у Беларусі. Арганізатары імкнуцца паказаць работы, створаныя ў розных тэхніках і відах выяўленчага мастацтва, у роўнай ступені ўдзяляючы ўвагу як класічным жанрам, так і сучаснаму мастацтву. Таму выставачная прастора выбудавана якраз для найбольш поўнай рэпрэзентацыі стылявых напрамкаў. Большасць работ можна набыць на анлайн-платформе Аrtcenter.by, а таксама падтрымаць мастакоў пры дапамозе галасавання. Пасля завяршэння фестывалю аўтары, якія набралі большую колькасць галасоў, будуць узнагароджаны.

Калі: з 13 мая
Дзе: Палац мастацтва, вул. Казлова, 3, Мінск

Музычна-турыстычны сезон у Верхнім горадзе

Новы турыстычны сезон, прысвечаны 955-годдзю Мінска і Году гістарычнай памяці, стартаваў у сталічным Верхнім горадзе 21 мая. Кожную суботу да верасня ён будзе радаваць гасцей яркімі падзеямі. У праграме–2022 – вечары джаза, праект "Класіка ля Ратушы", канцэрт акадэмічнага ансамбля "Харошкі". Акрамя таго, у гэтым сезоне ля атэля "Манастырскі" адкрыецца тэатральны дворык, дзе будуць выступаць студэнцкія і прафесійныя калектывы. Госці і жыхары сталіцы таксама змогуць наведаць кінапаказы пад адкрытым небам і ўбачыць папулярныя карціны кінастудыі "Беларусьфільм". А яшчэ сталічныя бібліятэкі арганізуюць творчую пешаходку, дзе можна азнаёміцца з навінкамі літаратуры і сустрэцца з пісьменнікамі.

Калі: 21 мая – 17 верасня
Дзе: плошча Свабоды, Верхні горад, Мінск

XIII Рэспубліканскі фестываль нацыянальных культур у Гродне

Адзін з самых любімых і каларытных фестываляў краіны разгорнецца ў Гродне ў першыя дні лета. Сёння ў Беларусі пражываюць прадстаўнікі 156 нацыянальнасцей, з іх каля 25 аб'яднаны ў 205 грамадскіх арганізацый. Раз у два гады гэту дзіўную разнастайнасць культур з усяго свету можна ўбачыць і пачуць на вуліцах старадаўняга горада. У першы дзень фестывалю 3 чэрвеня адбудзецца ўрачыстае адкрыццё Дома рыбака ў Гродне і пройдзе круглы стол "Беларусь – наш агульны дом: адзінства нацый і пакаленняў". У другі дзень Гродна ўпрыгожыць тэматычная скульптура, прысвечаная фестывалю, а ў цэнтры горада размесцяцца нацыянальныя падворкі, дзе будуць прадстаўлены асаблівасці культур, традыцыйнае адзенне, нацыянальная кухня і рамеснае майстэрства 31 нацыянальнасці, якая пражывае на тэрыторыі Беларусі. Таксама ў бягучым годзе фестываль паўторыць традыцыю і ў трэці дзень адправіцца на Аўгустоўскі канал, дзе гасцей будуць чакаць інтэрактыўныя зоны, канцэртная і спартыўная пляцоўкі.

Калі: 3–5 чэрвеня
Дзе: Гродна, Аўгустоўскі канал

Фестываль воднага турызму "Мотальская рэгата"

"Мотальская рэгата" збярэ аматараў веславання на байдарках і каноэ і экстрэмальных актыўнасцей на прыродзе. Удзельнікам давядзецца адкрыць водны турыстычны сезон: старт намечаны на 5 чэрвеня ў Спораве, а фінішаваць удзельнікі будуць у Моталі, які вядомы як малая радзіма першага прэзідэнта Ізраіля Хаіма Вейцмана. Тут жа праводзіцца смачны летні фестываль "Мотальскія прысмакі", які знаёміць з кулінарнымі асаблівасцямі розных раёнаў Брэстчыны. Акрамя водных спаборніцтваў і частавання на фуд-кортах, гасцей чакае забаўляльная праграма: міні-футбол, пляжны валейбол, дартс, фігурнае кіраванне байдаркамі і веласіпедамі…

Калі: 5–6 чэрвеня
Дзе: Брэсцкая вобласць, аграгарадок Спорава (Бярозаўскі раён) – аграгарадок Моталь (Іванаўскі раён)

VII Міжнародны фестываль "Балетнае лета ў Вялікім"

Летні фестываль у Вялікім тэатры Беларусі адкрыецца (7 і 8 чэрвеня) балетам "Эфект Пігмаліёна" ад Санкт-Пецярбургскага дзяржаўнага акадэмічнага тэатра балета Барыса Эйфмана. Сімвалічна, што ў адной з галоўных роляў выступіць ураджэнка беларускай сталіцы, вядучая салістка, лаўрэат прэмій "Залатая маска" і "Залаты сафіт" Любоў Андрэева. Прадоўжаць праграму самыя новыя пастаноўкі Вялікага: "Лебядзінае возера" ў новай інтэрпрэтацыі Валянціна Елізар'ева (сакавік 2021 года), казачны "Канёк-гарбунок" (кастрычнік 2021 года) і "Спячая прыгажуня" (сакавік 2022 года). На заканчэнне фестывалю адбудзецца гала-канцэрт зорак сусветнага балета. Сярод удзельнікаў – салісты Марыінскага, Вялікага тэатра Расіі, Санкт-Пецярбургскага Тэатра балета Барыса Эйфмана, Тэатра балета класічнай харэаграфіі La Classique, Каірскай оперы…

Калі: 7–12 чэрвеня
Дзе: Вялікі тэатр оперы і балета Беларусі, пл. Парыжскай Камуны, 1, Мінск

Свята "Ружанская брама"–2022

"Ружанская брама", якая дэбютавала ў летняй праграме Беларусі ў 2011 годзе, запрашае гасцей правесці выхадныя ў атмасферы сярэдневяковага свята. Займальнае дзейства пачнецца на галоўнай плошчы Ружан, а пасля абеду перамесціцца на тэрыторыю Ружанскага палацавага комплексу. Госці змогуць азнаёміцца з музейнай экспазіцыяй, наведаць рамесную выстаўку, прыняць удзел у гульнявых праграмах, атрымаць асалоду ад выступленняў творчых калектываў. На святочнай сцэне выступяць народныя калектывы – удзельнікі фестывалю "Вянок дружбы", а таксама аматарскія калектывы Брэсцкай вобласці. У 19:30 іх зменяць удзельнікі абласнога свята-конкурсу эстраднай джазавай музыкі "Пружанскі блюз" і беларускі дзяржаўны харэаграфічны ансамбль"Харошкі".

Калі: 8–9 чэрвеня
Дзе: Ружанскі палацавы комплекс, г.п. Ружаны, Пружанскі раён, Брэсцкая вобласць

ХХІ Нацыянальны фестываль беларускай песні і паэзіі "Маладзечна"

Адзіны ў Беларусі фестываль нацыянальнай песні і паэзіі ў гэтым годзе прымеркаваны да дзвюх значных дат – 140-годдзя класікаў беларускай літаратуры Янкі Купалы і Якуба Коласа, а таксама 75-годдзя з дня нараджэння заснавальніка і ідэйнага натхняльніка форуму – дырыжора Міхаіла Фінберга. Галоўная падзея – Нацыянальны конкурс маладых выканаўцаў беларускай эстраднай песні: па выніках рэгіянальных тураў на сцэну выйдзе 21 удзельнік. Акрамя цырымоній адкрыцця і закрыцця адбудуцца канцэрты "Музыка беларускіх кампазітараў-майстроў мастацтва – пакаленню XXI стагоддзя" і "Джазавы калейдаскоп". Навінкай сезона стане творчы праект "Сустрэча ля раяля. Беларускі раманс" з удзелам беларускіх кампазітараў, а таксама салістаў Вялікага тэатра Беларусі.

Калі: 10–11 чэрвеня
Дзе: Дом культуры, пл. Цэнтральная, 4, Маладзечна

Gastrofest. Vegan у Мінску

Пакаштаваць веганскую кухню і ацаніць новыя смакавыя спалучэнні змогуць беларусы і госці краіны ва ўстановах удзельнікаў фестывалю Gastrofest. Vegan. Кошт аднаго сэта па традыцыі фіксаваны. Акрамя таго, можна заказаць сэт дамоў. Паклоннікаў веганскага фэсту чакаюць прыемныя сюрпрызы: партнёр фестывалю брэнд Borjomi рыхтуе для гасцей розыгрыш запасу мінеральнай вады на ўсё лета.

Калі: 16–30 чэрвеня
Дзе: кафэ і рэстараны Мінска

Фестываль "Вечары Вялікага тэатра ў замку Радзівілаў"

Легендарная рэзідэнцыя князёў Радзівілаў у Нясвіжы адкрывае летні сезон. Open air фестываль збярэ зорак опернай і балетнай сцэны, а таксама паклоннікаў класічнага вакальнага, опернага і балетнага мастацтва. Праграма–2022 парадуе навінкамі, сярод якіх сімфанічныя і камерныя канцэрты, што прадстаўляюць панараму беларускай вакальнай музыкі ХХ–ХХІ стагоддзяў, балетныя і оперныя спектаклі з сусветнай залатой калекцыі, сустрэчы з маладымі класічнымі калектывамі – струнным квартэтам Vivat-quartet і секстэтам A.M.A.D.I.S.Brass…

17 чэрвеня

13.00 – канцэрт "Беларускія прэм'еры". Тэатральная зала Нясвіжскага замка
16.00 – тэатралізаваны канцэрт "У час шумнага балю". Тэатральная зала Нясвіжскага замка
21:00 – балет "Бахчысарайскі фантан". Унутраны дворык замка Радзівілаў

18 чэрвеня

13.00 – канцэрт "Музычныя легенды старадаўняга замка". Тэатральная зала Нясвіжскага замка
15:30 – канцэрт "Песні вялікай краіны".  Тэатральная зала Нясвіжскага замка
20:00 – опера "Лятучая мыш". Унутраны дворык замка Радзівілаў

19 чэрвеня

12:00 – канцэрт "Музычная скарбніца Нясвіжа". Тэатральная зала Нясвіжскага замка
15:00 – канцэрт "Нясвіжскі кактэйль з A.M.A.D.I.S.Brass". Тэатральная зала Нясвіжскага замка
19:30 – гала-канцэрт "Замкавыя забавы ў Нясвіжы". Унутраны дворык замка Радзівілаў

Калі: 17–19 чэрвеня
Дзе: Нацыянальны гісторыка-культурны музей-запаведнік "Нясвіж", Мінская вобласць

Гарадскі пікнік Vulitsa Ezha 2022 у Мінску

Сёмы сезон Vulitsa Ezha адзначыць адразу трыма фестывалямі. У маляўнічым месцы на тэрыторыі сталічнага Батанічнага саду госці змогуць прадэгуставаць спецыяльнае меню фуд-корта, зазірнуць у кактэйльныя бары з чылаўт-зонай, наведаць Local Food Market са свежай фермерскай прадукцыяй, навучыцца гатаваць новыя стравы ў шэфаў, набыць унікальныя рэчы на дызайнерскім маркеце. Акрамя таго, гасцям прапануюць атрымаць асалоду ад цікавых фільмаў у кінатэатры пад адкрытым небам, DJ-сэтамі і канцэртамі жывой музыкі. Будуць арганізаваны забавы ў зонах актывацый і яркія лакацыі для інста-фотасесій.

Калі: 18–19 чэрвеня, 23–24 ліпеня, 3–4 верасня
Дзе: Цэнтральны батанічны сад НАН Беларусі, вул. Сурганава, 2В, Мінск

Летнія вечары ў Мірскім замку: музычнае шоу ў стылі "Кінахіт"

Сезон летніх вечароў адкрывае замкавы комплекс "Мір". Арганізатары запрашаюць атрымаць асалоду ад лепшых хітоў савецкага кінематографа ля сцен адной з найпрыгажэйшых выдатных мясцін Беларусі, помніка Сусветнай спадчыны ЮНЕСКА. Артысты і аркестр Беларускага дзяржаўнага акадэмічнага музычнага тэатра падораць феерычнае шоу, у якім прагучаць легендарныя мелодыі са знакамітых карцін. Сярод іх "Каўказская палонніца", "12 крэслаў", "Мы з джаза", "Чалавек з бульвара Капуцынаў", "Гардэмарыны, наперад!", "Жорсткі раманс", "Іван Васільевіч мяняе прафесію", "Іронія лёсу, або З лёгкай парай!" У гледачоў будзе магчымасць успомніць музыку, знаёмую з самых юных гадоў, ці ж упершыню пачуць класіку і натхніцца на прагляд гэтых цудоўных фільмаў.

Калі: 18 чэрвеня
Дзе: Мірскі замак, вул. Чырвонаармейская, 2, Гродзенская вобласць

Канцэрт Queen Show & Marc Martel

Перанесены з-за пандэміі канцэрт трыб'ют-шоу Queen адбудзецца ў Мінску. Паклоннікі пачуюць 40 хітоў легендарнай групы, у тым ліку Bohemian Rhapsody, Show must go on, Radio Ga Ga, Somebody to Love. Вакаліста Марка Мартэла называюць жывым увасабленнем Фрэдзі Мерк'юры з-за надзвычайнага падабенства са спеваком, прычым не толькі ў знешніх даных, але і ў манеры выканання і паводзін на сцэне, вакальных інтанацый. Жыццё Марка змянілася пасля таго, як у 2011 годзе ён выканаў фрагмент песні Somebody To Love на конкурсе праекта Queen Extravaganza, пакарыўшы гледачоў і легендарных музыкантаў. А на работу для фільма "Багемская рапсодыя" яго благаславіў ударнік Queen Роджэр Тэйлар.
 
Калі: 21 чэрвеня
Дзе: Палац Рэспублікі, пл. Кастрычніцкая, 1, Мінск

Ілюзійнае шоу Віктара Шышко "Спячая прыгажуня"

"Спячая прыгажуня" – ілюзійнае шоу ад фіналіста юбілейнага сезона шоу "Мінута славы", удзельніка тэлепраекта "Здзіві мяне!", госця тэлепраектаў "Tu si que vales" Canale-5 (Італія) і "Le Plus Grand Cabaret" France 2 & TV5 Monde (Францыя) Віктара Шышко. Знаёмы з дзяцінства сюжэт з казкі Шарля Перо прадстаўлены ў нечаканай інтэрпрэтацыі: незвычайныя трукі з людзьмі, якія перамяшчаюцца ў прасторы, лунаюць у паветры, знікаюць і гэтак жа раптоўна з'яўляюцца, аб'яднаны чароўнай гісторыяй. Тоны дэкарацый і спецыяльнай апаратуры, касцюмы, магічныя спецэфекты – усё працуе на падарожжа ў свет ілюзій. А самыя бясстрашныя госці могуць стаць удзельнікамі і пераканацца ў рэальнасці таго, што адбываецца.

Калі: 23 чэрвеня
Дзе: ПК МАЗ, пр. Партызанскі, 117а

XVI Міжнародны фестываль народнай творчасці "Вянок дружбы"

Старажытны горад на рацэ Бярэзіне – Бабруйск – запрашае адсвяткаваць сваё 635-годдзе. У бягучым годзе адзін з самых самабытных фестываляў Беларусі ўвойдзе ў праграму Дня горада і план мерапрыемстваў СНД, прысвечаны Году народнай творчасці і культурнай спадчыны. "Вянок дружбы" 16-ы раз аб'яднае дзясяткі этнасаў і культур пад сцягам дружбы. Яго асаблівасцю з'яўляецца тое, што ўдзельнікі форуму не спаборнічаюць, а іх выступленні праходзяць пад дэвізам роўнай значнасці і мастацкай каштоўнасці ўсіх нацыянальных культур і традыцый. Калектывы прымуць удзел у выстаўцы-прэзентацыі нацыянальнага сувеніра, нацыянальных пачастункаў, выстаўцы-конкурсе "Вянок як сімвал фестывалю – у падарунак фестывалю", канцэртах і творчых сустрэчах у Бабруйску і Магілёўскай вобласці.

Калі: 23–27 чэрвеня
Дзе: Бабруйск, Магілёўская вобласць

Symphonic Drive Orchestra: crossover concert у Мінску

Гасцей чакае вечар, пабудаваны ў адпаведнасці з прынцыпамі Classical crossover – музычнага стылю, які спалучае акадэмічную і поп-музыку. Яны злучацца ў канцэрце пад кіраўніцтвам дырыжора Вячаслава Бартноўскага, у якім прымуць удзел салісты Аляксандр Музыкантаў (фартэпіяна), Мікалай Федарэнка (труба), Лізавета Козак (домра). Спецыяльныя госці – Надзея Лазуцкая (домра) і Дар'я Бабко (саксафон). У праграме – сюіта Д. Шастаковіча з балета "Болт", канцэрт №1 для фартэпіяна з аркестрам С. Пракоф'ева, сюіта з балета П. Чайкоўскага "Лебядзінае возера", джазавыя кампазіцыі і папулярныя тэмы (Jazz Medley) з класічных твораў.

Калі: 29 чэрвеня
Дзе: Беларуская дзяржаўная філармонія, пр. Незалежнасці, 50, Мінск