Падзеі

6 мая, Мінск /Кар. БЕЛТА/. Каардынацыйная камісія Еўрапейскіх алімпійскіх камітэтаў (ЕАК) па пытаннях падрыхтоўкі да II Еўрапейскіх гульняў наведае Мінск 12 мая, паведамілі карэспандэнту БЕЛТА ў прэс-службе Нацыянальнага алімпійскага камітэта Беларусі.

У час візіту прадстаўнікі ЕАК правядуць рабочыя нарады з першым віцэ-прэзідэнтам НАК Андрэем Асташэвічам і міністрам спорту і турызму Беларусі Аляксандрам Шамко. На сустрэчы будуць абмеркаваны пытанні спартыўнай праграмы, умовы кантракта на правядзенне Еўрагульняў і аспекты функцыянавання дырэкцыі турніру.

У складзе рабочай групы ў беларускую сталіцу прыбудуць старшыня каардынацыйнай камісіі ЕАК, прэзідэнт НАК Грэцыі Спірас Капралас, намеснік старшыні каардынацыйнай камісіі ЕАК, прэзідэнт НАК Харватыі Златка Мацеша, фінансавы менеджар ЕАК Джавані дэ Анджэліс (Італія), камерцыйны кансультант ЕАК Эндру Крэйг (Вялікабрытанія), галоўны кансультант па правядзенні Еўрапейскіх гульняў ЕАК Пірс О'Калаган (Ірландыя), менеджар ЕАК па сувязях з арганізатарамі Еўрапейскіх гульняў Стыў Скот (Вялікабрытанія).

Каардынацыйная камісія наведае спартыўныя аб'екты, на якіх плануецца правядзенне Еўрагульняў. У першую чаргу гасцей цікавіць "Мінск-Арэна", студэнцкая вёска (уздоўж вул. Чурлёніса паміж пр. Дзяржынскага і Каралінскім праездам), вяслярны канал РЦАП па вяслярных відах спорту (Заслаўскае вадасховішча), палац спорту "Уручча", спартыўна-стралковыя комплексы імя маршала С.Цімашэнкі і Sporting Сlub, САК "Алімпійскі", рэспубліканскі стадыён "Дынама", Палац спорту, Palova Arena, Футбольны манеж, "Чыжоўка-Арэна".

Права правядзення II летніх Еўрапейскіх гульняў Беларусь атрымала ў час 45-й Генеральнай асамблеі Еўрапейскіх алімпійскіх камітэтаў, якая адбылася ў Мінску ў кастрычніку 2016 года. I Еўрапейскія гульні прайшлі 12-28 чэрвеня 2015-га ў сталіцы Азербайджана Баку. Беларускія атлеты заваявалі на гэтым спартыўным форуме 43 медалі: 10 залатых, 11 сярэбраных і 22 бронзавыя. У медальным заліку зборная Беларусі заняла 7-е месца.