Афіцыйны сайт Рэспублікі Беларусь
22 чэрвеня - Дзень усенароднай памяці ахвяр Вялікай Айчыннай вайны
Бізнес
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Бізнес | Бізнес-навіны

Бізнес-навіны

19 Кст 2016

Забароўскі: На перагаворах з МВФ па тарыфах на ЖКП прыярытэт аддаецца мерам сацабароны

19 кастрычніка, Мінск /Кар. БЕЛТА/. На перагаворах з Міжнародным валютным фондам у частцы павышэння тарыфаў на жыллёва-камунальныя паслугі для насельніцтва прыярытэт аддаецца мерам сацыяльнай абароны, заявіў у час круглага стала на сайце БЕЛТА першы намеснік міністра эканомікі Беларусі Аляксандр Забароўскі, перадае карэспандэнт БЕЛТА.

"Як у пачатку нашага дыялогу з МВФ, так і цяпер беларускі бок настойвае на тым, каб у першую чаргу быў аддадзены прыярытэт мерам сацыяльнай абароны. Таксама нашы манаполіі павінны мець дакладны і амбіцыйны план зніжэння затрат. Зразумела, што гэтыя змяненні не ў адзін год адбываюцца, размова аб сярэднетэрміновай праграме", - адзначыў Аляксандр Забароўскі.

Паводле яго слоў, існуючая сістэма субсідзіравання ў сектары жыллёва-камунальнай гаспадаркі Беларусі мае два элементы. Першы - гэта перакрыжаванае субсідзіраванне, калі прадпрыемствы за кошт больш высокіх тарыфаў для сябе аплачваюць частку кошту паслуг для насельніцтва. У выніку на агульным рынку Еўразійскага эканамічнага саюза беларускія вытворцы знаходзяцца ў горшых умовах у параўнанні з канкурэнтамі, што, зразумела, уплывае на іх канкурэнтаздольнасць. Асабліва гэта датычыцца энергаёмістых прадпрыемстваў - металургіі, нафтахімічнага комплексу, машынабудавання. Другі элемент - гэта бюджэтны канал, які накіраваны на субсідыі ўсім слаям насельніцтва незалежна ад іх даходу. "Таму з класічнага пункту гледжання існуючы механізм субсідзіравання паслуг ЖКГ патрабуе ўдасканалення, што прынясе шэраг істотных эфектаў для эканомікі. Адыход ад перакрыжаванага субсідзіравання дасць магчымасць павысіць канкурэнтаздольнасць беларускіх прадпрыемстваў, а частка бюджэтных сродкаў, якая цяпер раўнамерна размяркоўваецца ўсім слаям насельніцтва, будзе мэтава накіравана на субсідыі найменш абароненым грамадзянам", - растлумачыў першы намеснік міністра.

Адносна перагаворнай пазіцыі беларускага боку Аляксандр Забароўскі расказаў, што МВФ прапануецца разглядаць тарыфы на ЖКП не адасоблена, як гэта было ў многіх класічных праграмах фонду, а ва ўвязцы з трыма важнейшымі тэмамі. Першая тэма - сур'ёзнае зніжэнне затрат манаполій. "Мы лічым несправядлівым перакладаць вельмі вялікія затраты манаполій на насельніцтва. Таму працэс змянення тарыфаў павінен ісці ва ўвязцы са зніжэннем затрат манаполій і павышэннем эфектыўнасці работы сістэм ЖКГ і энергетыкі", - расказаў ён.

Другі момант, паводле слоў першага намесніка міністра, звязаны з тым, што працэс павінен ісці паралельна з разгортваннем эфектыўнай сістэмы адраснай сацыяльнай абароны насельніцтва. "Інакш кажучы, не павінна атрымацца так, што тарыфы павысіліся, а сістэма адраснай сацабароны не паспела адрэагаваць на патрэбы малазабяспечаных, слабаабароненых грамадзян", - растлумачыў Аляксандр Забароўскі.

Трэцяя тэма заключаецца ў тым, што неабходна мець на ўвазе развіццё энергетычнага рынку ў ЕАЭС. "У сярэднетэрміновым перыядзе цэны на энерганосьбіты ў саюзе павінны быць уніфікаваны. Праведзеныя перагаворы з расійскімі калегамі гэта пацвярджаюць. Таму мы павінны ўзважана падыходзіць да сярэднетэрміновага прагнозу цэн на прыродны газ для таго, каб загадзя не задзіраць разліковыя затраты манаполій", - лічыць ён.

Пры гэтым Аляксандр Забароўскі падкрэсліў, што ёсць дзве асноўныя кропкі павышэння кампенсацыі затрат насельніцтвам: да канца 2017 года павінны выйсці на 75 працэнтаў, да канца 2018 года - на 100 працэнтаў. "У прынцыпе, гэтыя лічбы не з'яўляюцца навіной, яны адлюстраваны ў праграме дзейнасці ўрада. Другое пытанне, наколькі павінны быць павышаны тарыфы ў абсалютнай велічыні, каб мы дасягнулі мэты па ўзроўні пакрыцця тарыфамі затрат", - сказаў ён. Паводле яго слоў, наперадзе вялікая работа з манаполіямі, з сістэмай адраснай сацыяльнай абароны насельніцтва. "Усё павінна прайсці так, як патрабуе кіраўнік дзяржавы: максімальна празрыста і эфектыўна, каб у выніку павысілася эфектыўнасць размеркавання рэсурсаў у эканоміцы", - адзначыў першы намеснік міністра.

Ён падкрэсліў, што МВФ чуе пазіцыю беларускага боку, але просіць сур'ёзных гарантый таго, што заяўленыя ўзроўні пакрыцця затрат насельніцтвам на паслугі ЖКГ будуць дасягнуты.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі