Бізнес-навіны

Харчпрам, машынабудаванне, медыцына: калектыўную экспазіцыю Беларусі арганізуюць на выстаўцы ў Ханоі

Фота з архiва

28 студзеня, Мінск /Кар. БЕЛТА/. У актыўную стадыю ўвайшла падрыхтоўка калектыўнай экспазіцыі Беларусі на міжнароднай шматгаліновай выстаўцы Vietnam Expo, якая пройдзе з 2 па 5 красавіка ў Ханоі, паколькі пашырэнню дзелавых кантактаў з гэтай сацыялістычнай рэспублікай у нашай краіне ўдзяляецца асаблівая ўвага. Аб гэтым паведамілі БЕЛТА ў Нацыянальным цэнтры маркетынгу.

Vietnam Expo - вядучая міжнародная шматгаліновая выстаўка ў Паўднёва-Усходняй Азіі, праводзіцца пры падтрымцы Міністэрства прамысловасці і гандлю В'етнама, профільных міністэрстваў і асацыяцый. Пералік тэматычных раздзелаў самы разнастайны: харчовая прамысловасць, сельская гаспадарка, машынабудаванне, энергетыка, металургія, нафтахімія, будаўніцтва, навукова-тэхнічныя распрацоўкі, медыцына і фармацэўтыка.

"У нас ёсць вопыт арганізацыі беларускай экспазіцыі на Vietnam Expo. У 2023 годзе ў Хашыміне айчынная экспазіцыя была прадстаўлена на закрытай (168 кв.м) і адкрытай (55 кв.м) выставачных плошчах 36 прадпрыемствамі нафтахімічнай, машынабуданічай, харчовай, сельскагаспадарчай, электратэхнічнай, навуковай і адукацыйнай сфер", - пракаменціравалі ў цэнтры.

Акрамя ўдзелу ў выстаўцы ў якасці экспанента, можна выкарыстаць і другі варыянт развіцця кантактаў з прадстаўнікамі бізнесу В'етнама, напрыклад, прыняць удзел у дзелавым візіце ў Ханой у тэрміны правядзення Vietnam Expo.

В'етнам - адзін з рынкаў Паўднёва-Усходняй Азіі, які найбольш дынамічна развіваецца. Па-першае, дзяржава актыўна развівае міжнародныя гандлёва-эканамічныя сувязі і з'яўляецца членам больш як 60 інтэграцыйных аб'яднанняў (ААН, СГА, АЦЭС, АСЕАН) і цэнтрам прыцяжэння для замежных інвестыцый. Па-другое, знешнегандлёвы абарот краіны ў 2023 годзе склаў $683 млрд, імпарт і экспарт у якім размеркаваліся практычна роўнымі долямі. Як дадалі ў цэнтры, значную ролю для развіцця адносін адыгрывае і тое, што дзейнічае пагадненне аб свабодным гандлі паміж ЕАЭС і В'етнамам, у рамках якога крок за крокам устараняюцца існуючыя бар'еры і ствараюцца ўмовы для бесперашкоднага руху тавараў і паслуг.

версія для друку

зрабіць стартавай

дабавіць у выбранае