Бізнес-навіны

"Ужо сёння дбаем аб доўгатэрміновай бяспецы". Як у Беларусі мінімізуюць утварэнне адходаў БелАЭС

Фота з архiва

10 мая, Мінск /Кар. БЕЛТА/. Начальнік цэха радыяцыйнай бяспекі Беларускай атамнай электрастанцыі Аляксандр Ракаўчук у праекце БЕЛТА "Краіна гаворыць" расказаў, як у Беларусі мінімізуюць утварэнне радыеактыўных адходаў.

У ходзе тэхналагічных працэсаў на станцыі ўтвараюцца радыеактыўныя адходы трох тыпаў па агрэгатным стане: газападобныя, вадкія і цвёрдыя.

"Пры гэтым ключавы прынцып нашай работы - забеспячэнне бяспекі як пры абыходжанні з адходамі, так і для будучых пакаленняў. Мы не павінны ствараць абцяжарвання для будучай эксплуатацыі і ўжо сёння дбаем аб доўгатэрміновай бяспецы", - падкрэсліў Аляксандр Ракаўчук.

Таму на БелАЭС вядзецца работа па мінімізацыі ўтварэння радыеактыўных адходаў. Газападобныя адходы праходзяць спецыяльную ачыстку перад выкідам праз вентыляцыйныя трубы энергаблокаў. Ступень ачысткі паветра, якое выходзіць з зоны кантралюемага доступу, складае не менш за 99 працэнтаў. Вадкія радыеактыўныя адходы падвяргаюцца цэментаванню і змяшчаюцца ў незваротныя ахоўныя кантэйнеры, якія захоўваюцца ў спецыялізаваных сховішчах на тэрыторыі станцыі. А цвёрдыя радыеактыўныя адходы (рыззё, апілкі, інструменты, дэзактывацыя якіх неэфектыўная) падлягаюць прасаванню, сартаванню і таксама захоўваюцца ў межах перыметра станцыі.

* Праект створаны за кошт сродкаў мэтавага збору на вытворчасць нацыянальнага кантэнту

версія для друку

зрабіць стартавай

дабавіць у выбранае