Бізнес-навіны

У МУС Літвы расказалі аб падрабязнасцях рашэння адкрыць граніцу з Беларуссю

Фота з архiва

19 лістапада, Мінск /Кар. БЕЛТА/. Урад Літвы прыняў рашэнне датэрмінова адкрыць два пункты пропуску на граніцы з Беларуссю. МУС Літвы паведаміла падрабязнасці гэтага рашэння, інфармуюць літоўскія СМІ.

Пункты пропуску "Мядзінінкай" (сумежны "Каменны Лог") і "Шальчынінкай" (сумежны "Беняконі") павінны аднавіць работу з чацвярга, 20 лістапада. У МУС адзначылі, што пастанова ўрада ўступіць у сілу з 00.00 (па Вільнюсе).

Паводле слоў кіраўніка МУС Літвы Уладзіслава Кандратовіча, рашэнне аб аднаўленні работы пунктаў пропуску прынята на падставе рэкамендацый Камісіі па нацыянальнай бяспецы Літвы.

Абмежаванні на перасячэнне дзяржаўнай граніцы, устаноўленыя пастановай урада Літвы, больш не з'яўляюцца неабходнымі для забеспячэння ўнутранай бяспекі. "У сувязі з гэтым прапануем прызнаць пастанову ўрада Літвы ад 29 кастрычніка 2025 года страціўшай сілу", - сказаў кіраўнік МУС Літвы.

Літоўская нацыянальная асацыяцыя аўтамабільных перавозчыкаў Linava са свайго боку заявіла, што вітае рашэнне аб адкрыцці пунктаў пропуску на граніцы з Беларуссю. Раней прадстаўнікі літоўскіх перавозчыкаў не раз заяўлялі, што закрыццё КПП негатыўна ўплывае на работу транспартнага сектара і прыводзіць да вялікіх страт для галіны.

Урад Літвы 29 кастрычніка прыняў рашэнне закрыць да 30 лістапада два кантрольна-прапускныя пункты на літоўска-беларускай граніцы. Рух праз пункт пропуску "Шальчынінкай" ("Беняконі") быў закрыты поўнасцю, а праз пункт пропуску "Мядзінінкай" ("Каменны Лог") маглі праязджаць толькі асобы, для якіх зроблены выключэнні.

Раней, 18 лістапада, прэм'ер Літвы Інга Ругіненэ заявіла, што Камісія па нацбяспецы рэкамендуе адкрыць гэтыя КПП датэрмінова. Падрыхтоўка да адкрыцця граніцы, паводле яе слоў, зойме адзін дзень. Ругіненэ таксама адзначала, што падтрымала б такое рашэнне.

версія для друку

зрабіць стартавай

дабавіць у выбранае