Бізнес-навіны

23 кастрычніка, Мінск /Кар. БЕЛТА/. Сусветны тыдзень прадпрымальніцтва пройдзе з 16 па 22 лістапада ў 140 краінах свету, у тым ліку і ў Беларусі, паведамілі БЕЛТА ў прэс-службе Міністэрства эканомікі.

У Беларусі гэта ініцыятыва праходзіць пяты раз. "Сусветны тыдзень прадпрымальніцтва - добры матывацыйны пасыл для адкрыцця ўласнай справы, а таксама пляцоўка для абмену вопытам паміж замежнымі і беларускімі партнёрамі. Тыдзень збярэ на адной пляцоўцы лідараў бізнесу, міжнародных экспертаў, дыпламатаў, прадстаўнікоў фінансавых інстытутаў, бізнес-саюзаў і ўлады", - адзначылі ў Мінэканомікі.

Ключавая падзея тыдня - V Міжнародны форум прадпрымальніцтва - запланавана на 16 лістапада. Плануецца правядзенне дыскусіі на тэму "Дзейсныя фінансавыя інструменты для падтрымкі бізнесу" з удзелам экспертаў Банка развіцця, Сусветнага банка, Еўрапейскага банка рэканструкцыі і развіцця, Банка падтрымкі малога і сярэдняга бізнесу. Таксама плануецца абмеркаванне новых магчымасцей для развіцця малога і сярэдняга бізнесу з удзелам прадстаўнікоў Савета па развіцці прадпрымальніцтва. У прыватнасці, пройдуць майстар-класы такіх паспяховых бізнесменаў-практыкаў, як Алег Хусаенаў, Аляксандр Кныровіч, Аркадзь Добкін, Валерый Цапкала. На адкрыцці мерапрыемства запланаваны выступленні памочніка Прэзідэнта Кірыла Рудага і міністра эканомікі Уладзіміра Зіноўскага.

Пад эгідай Сусветнага тыдня прадпрымальніцтва ў Беларусі з 16 па 22 лістапада пройдуць і іншыя мерапрыемствы, сярод якіх Міжнародная стартап-канферэнцыя з удзелам лідараў амерыканскага, еўрапейскага і беларускага стартап-асяроддзя (17 лістапада), тэматычная канферэнцыя "Выхад на новыя рынкі" з удзелам прадстаўнікоў пасольстваў краін ЕС, міжнародных бізнес-асацыяцый, прамысловых кааперацый і вытворчых кампаній (18 лістапада), біржа кансультацый для бізнесу (20 лістапада).