Бізнес-навіны

Шулейка: у Беларусі і Узбекістана ёсць канструктыўнае ўзаемадзеянне на ўсіх узроўнях

3 верасня, Віцебск /Кар. БЕЛТА/. У Беларусі і Узбекістана ёсць канструктыўнае ўзаемадзеянне на ўсіх узроўнях. Аб гэтым расказаў намеснік прэм'ер-міністра Юрый Шулейка на пленарным пасяджэнні ІІІ Беларуска-ўзбекскага жаночага бізнес-форуму на тэму "Беларусь - Узбекістан: супрацоўніцтва як фактар устойлівага развіцця", перадае карэспандэнт БЕЛТА.

Юрый Шулейка адзначыў, што ІІІ Беларуска-ўзбекскі жаночы бізнес-форум прадастаўляе выдатную магчымасць беларускім прадстаўнікам бізнесу азнаёміць сваіх патэнцыяльных партнёраў і калег з інавацыйнымі дасягненнямі айчынных вытворцаў, абмяняцца перадавым вопытам, перспектыўнымі ідэямі і прапановамі, вызначыць новыя пункты росту.

"Маючы адкрытую экспартна накіраваную эканоміку, адным з ключавых напрамкаў развіцця для нас з'яўляецца выбудоўванне ўзаемавыгадных, добрасумленных адносін з краінамі-партнёрамі. У гэтым кантэксце супрацоўніцтва Беларусі і Узбекістана - добры прыклад таго, як павінны развівацца адносіны паміж дзяржавамі", - адзначыў віцэ-прэм'ер.

Паводле яго слоў, у дзвюх краін ёсць канструктыўнае ўзаемадзеянне на ўсіх узроўнях. У прыватнасці, актыўна развіваюцца кантакты па лініі парламента і ўрада, а таксама расце інтэнсіўнасць узаемадзеяння на ўзроўні галін і рэгіёнаў. "Істотную ролю ў каардынацыі развіцця двухбаковых адносін адыгрывае інстытут сумеснай міжурадавай камісіі, які ўжо даўно даказаў сваю эфектыўнасць і запатрабаванасць. 11-е пасяджэнне камісіі адбылося ў чэрвені гэтага года ў Мінску і дало магчымасць разгледзець асноўныя моманты нашага супрацоўніцтва. Дадзена пазітыўная ацэнка дасягнутаму ўзроўню ўзаемадзеяння ва ўсіх сферах эканомікі", - сказаў Юрый Шулейка.

Акрамя таго, уведзены і паспяхова развіваюцца новыя фарматы ўзаемадзеяння. "Гэта і жаночы бізнес-форум, у якім мы сёння прымаем удзел, і форумы рэгіёнаў, і дзелавы савет. Аднак, безумоўна, тон усяму вышэйпералічанаму задае дыялог кіраўнікоў нашых дзяржаў. Праведзеныя двухбаковыя візіты прэзідэнтаў у апошнія гады вывелі ўзаемадзеянне на якасна новы ўзровень", - звярнуў увагу ён.

Фармат Беларуска-ўзбекскага жаночага бізнес-форуму стаў адлюстраваннем не толькі цеснага ўзаемадзеяння беларускіх і ўзбекскіх дзелавых колаў, але і той практычнай актыўнасці, якую праяўляюць жанчыны-прадпрымальнікі. На думку намесніка прэм'ер-міністра, безумоўна, гэта будзе садзейнічаць паспяховай рэалізацыі пастаўленых задач. "Мы бачым, што ва Узбекістане вельмі пазітыўна ўспрымаюць беларускі бізнес. Аналагічна і ў нас цёпла ставяцца да ўзбекскіх прадпрымальнікаў, - адзначыў ён. - За мінулыя гады мы дасягнулі нядрэнных вынікаў ва ўзаемным гандлі. Гэты паказчык павялічыўся за апошнія гады на 12 працэнтаў. З задавальненнем адзначаем, што па выніках першага паўгоддзя гэтага года захоўваецца дадатная дынаміка ўзаемнага тавараабароту з ростам на 18 працэнтаў".

Даволі актыўна ідзе рэалізацыя дарожнай карты супрацоўніцтва на 2024-2025 гады. Далейшае развіццё эканамічных адносін і іх практычнае напаўненне Беларусь бачыць у пераходзе да ўзаемнага інвесціравання ў прамкааперацыю. "Добра, што патэнцыял для нарошчвання інвестыцыйнай дзейнасці ў нас даволі вялікі. У 2024 годзе аб'ём беларускіх інвестыцый у эканоміку Узбекістана павялічыўся больш як на чвэрць да ўзроўню 2023 года. Дадатная дынаміка захоўваецца і ў бягучым годзе, - запэўніў Юрый Шулейка. - Павялічваецца колькасць кампаній з капіталам з Узбекістана - іх ужо 78, гэта значыць, за год прыраслі на дзевяць арганізацый. Для пашырэння супрацоўніцтва неабходна больш актыўна знаходзіць спалучэнне па сумесных праектах. Там, дзе мы адзін аднаго дапаўняем па кампетэнцыях, сыравінным складніку, рынках збыту".

Для стварэння прывабнага інвестыцыйнага асяроддзя беларускім бокам на пастаяннай аснове прымаюцца ўсе неабходныя практычныя меры, дадаў ён. У прыватнасці, абноўлены закон аб інвестыцыях устанаўлівае шэраг важных гарантый. "Так, уведзена стабілізацыйная агаворка, пашыраны пакет ільгот і прэферэнцый, напрыклад, вызваленне ад падатку на прыбытак на пяць гадоў, кампенсацыя затрат на інфраструктуру. Таксама ўкаранёны бюджэтныя трансферы, кампенсацыя часткі капітальных затрат па праекце да 35 працэнтаў. Пры вытворчасці пэўнай імпартазамяшчальнай прадукцыі прадугледжана магчымасць заключэння спецыяльнага інвестыцыйнага дагавора. Спрошчаны фармат рэалізацыі праекта з пакетам стандартных ільгот", - расказаў віцэ-прэм'ер.

У адносінах з Узбекістанам Беларусь нацэлена на доўгатэрміновае ўзаемадзеянне, стварэнне вытворчасцей прадукцыі з высокай дабаўленай вартасцю, падкрэсліў ён. "З улікам існуючых рэсурсаў бачым сур'ёзны патэнцыял у машынабудаванні, лёгкай прамысловасці, - адзначыў Юрый Шулейка. - Пастаўляючы сваю тэхніку і абсталяванне, мы, зразумела, не забываем аб іх якасным абслугоўванні. На гэты момант па ўсім Узбекістане ідзе стварэнне сеткі сэрвісных цэнтраў па рамонце трактароў BELARUS. Пры гэтым вядзецца работа па адкрыцці вучэбных класаў МТЗ для падрыхтоўкі спецыялістаў".

Адначасова ўвага ўдзяляецца супрацоўніцтву ў галіне аховы здароўя. Віцэ-прэм'ер сказаў, што арганізацыямі холдынга "Белфарм" вядзецца работа па лакалізацыі вытворчасці лекавых сродкаў ва Узбекістане.

"Перспектыўным бачыцца ўзаемадзеянне па абмене працоўнымі рэсурсамі, сумеснымі навуковымі работамі, распрацоўцы інавацыйнай прадукцыі з высокай дабаўленай вартасцю. Беларусь з'яўляецца прыхільніцай шматпланавага, узаемавыгаднага супрацоўніцтва з Узбекістанам, які для нас заўсёды быў і будзе блізкім партнёрам. Дзякуючы ўзаемнай актыўнасці беларускіх і ўзбекскіх дзелавых колаў можна смела гаварыць аб тым, што ўжо трэці па ліку жаночы бізнес-форум - гэта не толькі добрая пляцоўка для пошуку новых кантактаў, але і сустрэча добрых сяброў, заўсёды гатовых падставіць адзін аднаму сваё плячо. Упэўнены, што напрацаваныя ў ходзе гэтага форуму кантакты, ідэі і дамоўленасці нададуць істотны імпульс развіццю беларуска-ўзбекскіх сувязей", - рэзюмаваў Юрый Шулейка.

версія для друку

зрабіць стартавай

дабавіць у выбранае