4 чэрвеня, Мінск /Кацярына Марковіч - БЕЛТА/. Іракскі бок прапануе наладзіць прамыя авіязносіны паміж Мінскам і Багдадам. Адпаведную прапанову агучыў старшыня Федэрацыі гандлёвых палат Ірака Джафар Расул Джафар аль-Хамадані на сустрэчы з кіраўніцтвам Беларускай гандлёва-прамысловай палаты, паведамілі БЕЛТА ў БелГПП.
Цяпер прамыя авіязносіны Беларусі з Іракам адсутнічаюць. Прадстаўнікі Ірака лічаць, што неабходна развіваць прамыя авіязносіны паміж дзвюма краінамі, у прыватнасці паміж Мінскам і Багдадам. Гэта дасць магчымасць больш актыўна супрацоўнічаць у сферы бізнесу.
Старшыня Беларускай гандлёва-прамысловай палаты Міхаіл Мятлікаў адзначыў, што бакам трэба прапрацаваць, наколькі рэйс будзе запатрабаваны. Кіраўнік БелГПП нагадаў, што ў палаты ёсць такі станоўчы прыклад. Так, сумесна з партнёрамі з Сербіі ў палаце прынялі рашэнне арганізаваць авіязносіны Мінск - Бялград і выступілі ініцыятарамі гэтай ідэі. Цяпер авіязносіны паміж сталіцамі наладжаны і станоўча ўплываюць на дзелавыя сувязі дзвюх краін.
Таксама ў час сустрэчы бакі разгледзелі пытанні гандлёва-эканамічнага супрацоўніцтва паміж Беларуссю і Іракам. Удзельнікі перагавораў абмеркавалі падпісанне мемарандума аб супрацоўніцтве паміж БелГПП і Федэрацыяй гандлёвых палат Ірака і стварэнне Беларуска-іракскага дзелавога савета, а таксама магчымасць арганізацыі візіту беларускіх дзелавых колаў у Багдад у час правядзення ў гэтым горадзе пасяджэння Беларуска-іракскай камісіі па гандлёва-эканамічным супрацоўніцтве.
У сустрэчы прыняў удзел пасол Ірака ў Беларусі Хайдар Хадзі.
Пн | Аўт | Сер | Чцв | Пт | Сб | Нядз |
---|