Бізнес-навіны

Рачкоў: тавараабарот паміж Беларуссю і Алжырам у першым квартале 2026 года вырас больш як у 10 разоў

Фота з архiва

24 мая, Мінск /Кар. БЕЛТА/. Тавараабарот паміж Беларуссю і Алжырам у першым квартале 2026 года вырас больш як у 10 разоў, адзначыў у каментарыі журналістам старшыня Пастаяннай камісіі па міжнародных справах Палаты прадстаўнікоў Сяргей Рачкоў у Беларускім дзяржаўным музеі гісторыі Вялікай Айчыннай вайны, з наведвання якога пачала свой афіцыйны візіт у Беларусь парламенцкая дэлегацыя Алжыра, перадае карэспандэнт БЕЛТА.

"У першым квартале 2026 года ўзаемны тавараабарот вырас больш як у 10 разоў. Вядома, упор мы робім на пытанні стварэння сумесных вытворчасцей. У нас у рабоце больш за дзесяць сур'ёзных праектаў па машынабудаванні, сельскай гаспадарцы, угнаеннях, па навуцы і тэхналогіях", - сказаў Сяргей Рачкоў.

Паводле яго слоў, у беларускага боку таксама ёсць цікавасць да таго, каб алжырскія студэнты больш актыўна прыязджалі ў рэспубліку на навучанне.

Вельмі перспектыўным бачыцца праект па стварэнні сумеснай вытворчасці грузавікоў МАЗ, звярнуў увагу парламентарый. Ён заўважыў, што беларускія трактары вядомы ў Алжыры яшчэ з савецкіх часоў, і ў гэтай краіне зацікаўлены ў стварэнні сумеснай вытворчасці.

"Алжыр - гэта, акрамя здабычы нафты і газу, і сельскагаспадарчая краіна. Пытанні харчовай бяспекі стаяць на першым плане, і ў гэтых адносінах Рэспубліка Беларусь ужо аказвае дапамогу алжырскім партнёрам. Таму механізацыя сельскай гаспадаркі ў тым ліку ўваходзіць у шэраг прыярытэтных задач, якія вырашаюцца і Алжырам, і Беларуссю", - адзначыў Сяргей Рачкоў.

Беларусь прапануе і будзе прапаноўваць сваю дапамогу ў тых сферах, у якіх мае адпаведнага ўзроўню напрацоўкі, вопыт, а таксама зацікаўленасць у папулярызацыі сваёй прадукцыі, тэхналогій, дадаў парламентарый.

Сяргей Рачкоў нагадаў, што дарожная карта двухбаковага супрацоўніцтва, якая была падпісана ў ходзе візіту Прэзідэнта Беларусі Аляксандра Лукашэнкі ў Алжыр, мае вельмі шмат напрамкаў і мерапрыемстваў, якія паспяхова выконваюцца.

Як паведамлялася, парламенцкая дэлегацыя Алжырскай Народнай Дэмакратычнай Рэспублікі на чале са старшынёй Нацыянальнага народнага сходу парламента Алжыра Ібрагімам Бугалі ўпершыню ў гісторыі беларуска-алжырскіх адносін прыбыла ў Беларусь. Афіцыйны візіт парламенцкай дэлегацыі Алжыра, які пачаўся па запрашэнні Палаты прадстаўнікоў Нацыянальнага сходу Рэспублікі Беларусь, будзе праходзіць 23-26 мая. Запланаваны сустрэчы з кіраўніцтвам Палаты прадстаўнікоў, наведванне прамысловых і сельскагаспадарчых прадпрыемстваў, а таксама культурна-гістарычных аб'ектаў краіны.

версія для друку

зрабіць стартавай

дабавіць у выбранае