Бізнес-навіны

22 мая, Мінск /Кар. БЕЛТА/. РУП "Беларуская АЭС" прынялі ў склад Маскоўскага цэнтра Сусветнай асацыяцыі арганізацый, што эксплуатуюць атамныя электрастанцыі (САА АЭС-МЦ), на пазачарговым агульным сходзе арганізацыі, які прайшоў у Венгрыі. Адпаведная інфармацыя размешчана на афіцыйным сайце САА АЭС-МЦ, паведамляе БЕЛТА.

У паведамленні ўдакладняецца, што працэдура ўступлення ў сусветную асацыяцыю ўключае ў сябе два этапы: прыняцце рашэння на пазачарговым агульным сходзе і наступнае яго зацвярджэнне на савеце кіраўнікоў САА АЭС.

Рашэнне аб прыняцці ў САА АЭС ва ўрачыстай абстаноўцы падпісалі генеральны дырэктар РУП "Беларуская АЭС" Міхаіл Філімонаў сумесна са старшынёй пазачарговага сходу Ладзіславам Штэпанекам. Кіраўнік беларускага прадпрыемства выказаў упэўненасць у тым, што гэта дзеянне пойдзе на карысць развіцця атамнай энергетыкі рэспублікі.

У сваю чаргу дырэктар Маскоўскага цэнтра САА АЭС Васіль Аксёнаў запэўніў прадстаўнікоў новых арганізацый - удзельнікаў асацыяцыі ў тым, што ім заўсёды будзе аказана дапамога і падтрымка з боку яе членаў і сакратарыята. Ён таксама выказаў надзею на адкрытасць ва ўзаемадзеянні і на працяглае паспяховае супрацоўніцтва.

Акрамя БелАЭС, у час пазачарговага сходу ў склад Маскоўскага цэнтра САА АЭС увайшла венгерская кампанія MVM. "З гэтага часу САА АЭС-МЦ аб'ядноўвае ў сваіх радах 22 арганізацыі з 13 краін свету", - гаворыцца ў паведамленні.

Сусветная асацыяцыя арганізацый, што эксплуатуюць атамныя электрастанцыі, аб'ядноўвае ўсіх аператараў АЭС свету. Яна садзейнічае абмену вопытам эксплуатацыі, каб яе члены маглі працаваць сумесна для дасягнення найвышэйшага ўзроўню бяспекі і надзейнасці пры эксплуатацыі сваіх АЭС. Перадумовай стварэння САА АЭС была аварыя на Чарнобыльскай АЭС у 1986 годзе. Афіцыйнае ўтварэнне САА АЭС было абвешчана на ўстаноўчай асамблеі 15 мая 1989 года ў Маскве.