Бізнес-навіны

Пасол Беларусі наведаў міжнародную выстаўку валокнаў і пражы ў Турцыі, дзе прадстаўлена і наша прадукцыя

Фота Пасольства Рэспублікі Беларусь у Турэцкай Рэспубліцы

28 сакавіка, Мінск /Кар. БЕЛТА/. Надзвычайны і Паўнамоцны Пасол Рэспублікі Беларусь у Турцыі Анатоль Глаз 26-27 сакавіка прыняў удзел у рабоце 22-й міжнароднай выстаўкі валокнаў і пражы International Istanbul Yarn Fair. Аб гэтым карэспандэнту БЕЛТА паведамілі ў беларускай загранустанове ў Турцыі.

На мерапрыемстве былі прадстаўлены флагманы нафтахімічнай галіны Беларусі ў рамках аб'яднанага стэнда канцэрна "Белнафтахім". Сярод іх - буйнейшы вытворца прадуктаў нафтахіміі, уключаючы поліакрыланітрылавыя валокны, ААТ "НАФТАН", адзін з вядучых у СНД вытворцаў шкловалакна ААТ "Полацк-Шкловалакно", а таксама "Завод Хімвалакно" ААТ "Гродна Азот".

Стамбульскі кірмаш пражы аб'ядноўвае больш за 500 кампаній, звыш 16 000 спецыялістаў і прадстаўнікоў галіновых вытворцаў, якія прэзентуюць шырокі асартымент пражы і сыравіны. Дзякуючы шырокай аўдыторыі прафесійных наведвальнікаў з Еўропы, Азіі і Балкан, Стамбульскі кірмаш пражы заслужана з'яўляецца буйнейшым месцам сустрэчы сусветных вытворцаў. У бягучым годзе ў мерапрыемстве прымаюць удзел прадстаўнікі з больш як 80 краін.

Пасол Беларусі ў ходзе работы на выстаўцы правёў шэраг дзелавых сустрэч і перагавораў, некалькі В2В-сесій з прадстаўнікамі галіновых рэгіянальных кампаній і замежнымі партнёрамі, а таксама абмеркаваў з экспарцёрамі і імпарцёрамі планы паставак беларускай прадукцыі на турэцкі рынак у бягучым годзе.

Беларускім экспанентам пасол уручыў дыпломы БелГПП за актыўны ўдзел у выстаўцы і пашырэнне нашай прадукцыі ў Турцыі.

версія для друку

зрабіць стартавай

дабавіць у выбранае