Бізнес-навіны

Падпісанне пагаднення аб перавалцы беларускіх нафтапрадуктаў у партах РФ перанеслі з-за ўнутрыдзяржаўных працэдур

Фота з архiва

12 лютага, Мінск /Кар. БЕЛТА/. Падпісанне пагаднення аб перавалцы беларускіх нафтапрадуктаў у партах РФ адбудзецца пасля 15 лютага, гэта звязана з завяршэннем унутрыдзяржаўных працэдур, паведаміла карэспандэнту БЕЛТА прэс-сакратар Міністэрства транспарту і камунікацый Ганна Курылёнак.

"Цяпер завяршаюцца ўнутрыдзяржаўныя працэдуры па падрыхтоўцы да падпісання пагаднення паміж Беларуссю і Расіяй аб арганізацыі супрацоўніцтва ў галіне перавозкі і перавалкі нафтапрадуктаў. У сувязі з гэтым сустрэча будзе перанесена", - сказала Ганна Курылёнак.

Акрамя таго, яна звярнула ўвагу, што цяпер не гатовы кантракты з расійскімі аператарамі тэрміналаў марскіх партоў і з чыгуначным аператарам, якія павінны падпісвацца разам з пагадненнем.

Раней Міністэрства транспарту Расіі анансавала падпісанне пагаднення аб арганізацыі перавалкі беларускіх нафтапрадуктаў у расійскіх партах 15 лютага.

Праект пагаднення прадугледжвае перавалку беларускімі прадпрыемствамі больш як 9,8 млн т грузаў у расійскіх партах на Балтыцы ў 2021-2023 гадах. Размова ідзе пра такія грузы, як мазут, бензін і масла. Пагадненне прадугледжвае заключэнне кантрактаў па прынцыпе take-or-pay. Калі грузаадпраўшчык забяспечвае перавалку ў аб'ёме меншым, чым дамоўлена, марскі тэрмінал у любым выпадку атрымлівае плату за ўвесь ўзгоднены аб'ём.

Дзеянне пагаднення разлічана да канца 2023 года з магчымасцю аўтаматычнага прадаўжэння.

версія для друку

зрабіць стартавай

дабавіць у выбранае