Бізнес-навіны

Па выніках Беларуска-егіпецкага бізнес-форуму падпісана кантрактаў на $6,5 млн

Фота з архiва

7 мая, Мінск /Кар. БЕЛТА/. Па выніках Беларуска-егіпецкага бізнес-форуму, які прайшоў сёння, 7 мая, падпісана кантрактаў на $6,5 млн, паведамілі карэспандэнту БЕЛТА ў Беларускай гандлёва-прамысловай палаце.

"Па выніках 2025 года тавараабарот паміж Беларуссю і Егіптам склаў $110 млн. Але гэта далёка не тая мяжа, якую мы можам дасягнуць. Дзякуючы патэнцыялу нашых краін мы ўпэўнены: можам ставіць перад сабой больш высокія паказчыкі. Аднак для іх дасягнення перш за ўсё патрэбны кантакты бізнесу з бізнесам, - адзначыў намеснік міністра антыманапольнага рэгулявання і гандлю Алег Дзікун. - Нашы краіны і народы звязвае перш за ўсё глыбокая павага да сваёй сваёй гісторыі і традыцый, а таксама надзвычайная працавітасць. Нашы народы даказалі: усё самае каштоўнае ў сваёй гісторыі мы стварылі сваёй працай, стараннасцю і вернасцю роднай зямлі".

У бізнес-форуме прынялі ўдзел каля 150 прадстаўнікоў беларускага і егіпецкага бізнесу. Яны сабраліся ў Мінску, каб прэзентаваць сваю прадукцыю і абмеркаваць рэалізацыю сумесных праектаў. Мерапрыемства арганізавана ў рамках візіту ў Рэспубліку Беларусь міністра інвестыцый і знешняга гандлю Егіпта Махамеда Фарыда Салеха для ўдзелу ў пасяджэнні Беларуска-егіпецкай сумеснай гандлёвай камісіі.

У пленарнай частцы бізнес-форуму прыняло ўдзел кіраўніцтва Міністэрства антыманапольнага рэгулявання і гандлю, Беларускай гандлёва-прамысловай палаты. Прадстаўнікі беларускіх і егіпецкіх прадпрыемстваў выступілі з прэзентацыямі, а таксама падпісалі камерцыйныя кантракты і пагадненні. Пасля заканчэння пленарнай часткі бізнес-форуму прайшлі пашыраныя беларуска-егіпецкія В2В-перагаворы.

Беларусь пастаўляе ў Егіпет трактары і іншую тэхніку, малочную прадукцыю, вырабы дрэваапрацоўкі, а таксама металапракат. З Егіпта ў Беларусь пастаўляюцца фрукты, спецыі, хімічная прадукцыя.

Дэлегацыя Арабскай Рэспублікі Егіпет на чале з міністрам інвестыцый і знешняга гандлю Махамедам Фарыдам Салехам наведвае Беларусь з 4 па 8 мая.

версія для друку

зрабіць стартавай

дабавіць у выбранае